1 Samuela 24:1-22
24 KUA liu mai a Saulo he tutuli e ia e tau tagata Filisitia, ti tala age e lautolu kia ia, kua pehe age, Kitiala, ko Tavita, ha ha he vao a ia i Enekati.
2 Ti uta ai e Saulo e tau tagata tolu e afe, ne fifili mai ia Isaraela oti, ti o atu a lautolu ke kumi a Tavita mo e hana tau tagata ke he tau maka he tau koti he vao.
3 Kua hohoko a lautolu ke he tau pa mamoe, ke he puhala ne ha i ai e ana, ti hu atu ai a Saulo ke he ana ke ufiufi ai hana tau ve, ka e nonofo a Tavita mo e hana tau tagata ke he gataaga he ana.
4 Ti pehe age ai e tau tagata a Tavita kia ia, Kitiala, ko e aho hanai ne pehe mai ai a Iehova hau a Atua kia koe, Kitiala, to tuku atu e au ke he lima hāu a ia ne fai fi kia koe, ti eke e koe kia ia e tau mena kua loto a koe ki ai. Ti matike a Tavita; ti hehele kehe fufu e ia e kala tapulu a Saulo.
5 Kua mole ia ti hukia e loto a Tavita ia ia ni, ha kua hehele kehe e ia e kala tapulu a Saulo.
6 Ti pehe age a ia ke he hana tau tagata, Kia fakamamao e Iehova ia au ke eke ai e au e mena na ke he haku a iki, ko ia ne fakauku e Iehova, ke fakahoko ai haku lima kia ia, ha ko ia ne fakauku ai e Iehova.
7 Ne hataki age e Tavita hana tau tagata ke he tau kupu na; ti nakai toka e ia a lautolu ke tutu atu kia Saulo; ti matike a Saulo ti fano atu a ia ke he hana puhala.
8 Kua mole atu a ia ti matike ai a Tavita, kua fina atu a ia he ana, ti ui age a ia kia Saulo, kua pehe age, Haku iki na e, ko e patuiki. Kua haga ki tua a Saulo, ti tukutuku hifo ai a Tavita ke he kelekele, mo e fakaveli fakafohifo a ia kia ia.
9 Ti pehe age a Tavita kia Saulo, Ko e ha ne fanogonogo ai a koe ke he tau kupu he tau tagata, kua pehe, Kitiala, a Tavita, kua kumi e ia ke ekefakakelea atu kia koe?
10 Kitiala, ko e aho nai kua fioia ai hāu a na fofoga, ne tuku mai e Iehova a koe ke he aho nai ke he haku lima ke he ana, ti pehe mai e taha ke keli e au a koe; ka e fakaalofa atu au kia koe, mo e pehe atu au, nakai fakahoko atu e au haku lima ke he iki haku, ha kua fakauku ai e Iehova a ia.
11 Haku matua na e, kia kitekite mai foki a koe ke he kala tapulu hau ke he lima haku, ha kua helehele kehe e au e kala tapulu hau, ka e nakai keli e au a koe, kia iloa ai e koe, mo e fioia e koe kua nakai ha ha ia au ha mahani kelea, po ke fakafualoto, ti nakai hala au kia koe; ka ko koe, kua takahao mai a koe kia au ke keli au.
12 Kia fakafili e Iehova kia taua mo koe, mo e taui atu e Iehova kia koe ha ko au; ka ko e lima haku, nakai hoko ia kia koe.
13 Tuga ne pehe mai e kupu fakatai ke he vaha i tuai, Kua tupu mai ai e mahani kelea he tau tagata mahani kelea; ka e nakai hoko atu haku lima kia koe.
14 Kua haele mai e patuiki a Isaraela ke mui mai kia hai? kua tutuli mai a koe kia hai? kua tutuli mai a koe ke he kuli mate, kua tutuli a koe ke he kutu.
15 Kia eke a Iehova mo fakafili, ti fakafili mai e ia kia taua mo koe, mo e kitekite mai ti fakatonu mai e ia haku a mena, mo e laveaki e ia au mai he lima hau,
16 Kua oti he vagahau a Tavita ke he tau kupu na kia Saulo, ti pehe age ai a Saulo, Ko e leo hau kia hanā haku a tama na e ma Tavita? Ti tagi ai a Saulo mo e leo lahi.
17 Ti pehe age a ia kia Tavita, Kua mua hau a mahani tututonu ke he haku, ha kua taui mai e koe kia au ke he mitaki; ka ko au kua taui atu e au kia koe ke he kelea.
18 Ti kua tala mai e koe kia au ke he aho nai e mena mitaki kua eke e koe kia au; he tuku atu e Iehova au ke he lima hau ti nakai keli ai e koe au.
19 Kaeke ke moua he tagata a ia kua fai fi kia ia, to fakafano atu kia e ia a ia ke fano mo e mitaki? Kia taui atu e Iehova kia koe ke he mitaki, ha ko e mena mitaki kua eke e koe kia au ke he aho nai.
20 Hanai, kitiala, kua iloa e au to eke ni a koe mo patuiki; ti fakamau ai e kautu a Isaraela kia koe.
21 Hanai, kia omonuo mai e koe kia au kia Iehova, ke nakai fakaoti e koe haku a fanau ka mole atu au, mo e ua tamate e koe haku a higoa ke he magafaoa he haku a matua tane.
22 Kua omonuo a Tavita kia Saulo, ti fano a Saulo ke he hana fale; ti o hake a Tavita mo e hana tau tagata ke he taue.