1 Samuela 25:1-44
25 KUA mate a Samuela, ti fakapotopoto a Isaraela oti, ti tagi aue ai a lautolu ha ko ia, mo e tanu e lautolu a ia ke he hana fale i Rama. Ti matike a Tavita mo e hifo a ia ke he tutakale ko Parana.
2 Ne ha i ai i Maona e taha tagata, ko e hana tau mena foki ha ha i Karamelu; ko e tagata lahi mau mena a ia, ha ha ia ia e tau mamoe ne tolu e afe, mo e tau koti ne taha e afe; ti hifi ai e ai hana tau mamoe i Karamelu.
3 Ko Napalu e higoa he tagata, ko Apikaila e higoa he hoana hana; ko e fifine ne ha i ai e loto manamanatu hifo mitaki, mo e mata mitaki a ia, ka ko e tane ko e tagata mahani uka a ia, ti kelea hana tau mena ne fa eke; ko e tagata he magafaoa a Kalepa a ia.
4 Kua logona e Tavita ke he tutakale kua hifi e Napalu hana tau mamoe;
5 Ti fakafano atu e Tavita e tau fuata tokohogofulu; kua pehe age a Tavita ke he tau fuata, Kia o hake a mutolu ki Karamelu, ti o age a mutolu kia Napalu, mo e fakaalofa age a mutolu kia ia ke he haku a higoa;
6 Ti pehe age a mutolu kia ia ne moui mo e monuina, Kia monuina a koe, kia monuina hau a magafaoa, kia monuina hau a tau mena oti ni.
7 Hanai, kua logona e au ha ha ia koe e tau tagata hifi mamoe, hanai, ko e hau a tau leveki mamoe ne nonofo a lautolu mo mautolu, ti nakai haofia ai a lautolu; ti nakai ni galo ha mena taha kia lautolu ke he tau aho oti he nonofo ai a lautolu i Karamelu.
8 Kia huhu age a koe ke he hau a tau fuata, to tala atu ai e lautolu kia koe; ti fakaalofa mai a koe ke he tau fuata; ha ko e aho mitaki kua o atu ai a lautolu; kia foaki mai fakahanoa e mena ke moua ai e koe ke he hau a tau fekafekau mo e hau a tama ko Tavita.
9 Kua hohoko atu e tau fuata a Tavita, ti vagahau ai a lautolu kia Napalu, ke lata mo e tau kupu oti na ke he higoa a Tavita, ti fakanonono ai a lautolu.
10 Ti tali age ai a Napalu ke he tau fekafekau a Tavita, kua pehe age, Ko hai kia a Tavita? ko hai foki e tama a Iese? kua tokologa e fekafekau ke he vaha nai, kua takitaha a lautolu mo e hola kehe he iki ha lautolu.
11 Ke uta kia e au haku a tau areto, mo e haku tau vai, mo e haku a tau manu ne keli e au ma e haku a tau tagata hifi mamoe, mo e ta age e au ke he tau tagata nakai iloa e au po ke o mai i fe a lautolu?
12 Ti liliu mai ai e tau fuata a Tavita ke he ha lautolu a puhala, ti liliu mai ai a lautolu; kua hohoko mai a lautolu, ti tala mai a lautolu kia ia tuga ne tau kupu oti na.
13 Ti pehe age ai a Tavita ke he hana tau tagata, Kia takitaha mo e pipi ai hana pelu; ti takitaha a lautolu mo e pipi ai e ia hana pelu, ti pipi ai foki e Tavita hana pelu; ti mumui hake ai kia Tavita tokai ko e tokofa e teau tagata, ka e nonofo ai mo e koloa e tokoua e teau tagata.
14 Ti tala age e taha he tau fuata kia Apikaila ko e hoana a Napalu, kua pehe age, Kitiala, ne fakafano mai e Tavita e tau fekafekau mai he tutakale ke fakaalofa mai ke he iki ha tautolu; ka e oho atu a ia mo e favale kia lautolu.
15 Ka e totonu lahi e tau tagata ia kia mautolu; ti nakai haofia ai a mautolu, ti nakai galo ha mena taha ha mautolu, ke he tau aho oti ne o fano ai a mautolu mo lautolu, he nonofo ai a mautolu ke he vao.
16 Ne eke a lautolu mo kaupa kia mautolu ke he po mo e aho ke he tau aho oti ne ha i ai a mautolu mo lautolu ne leveki ai e mautolu e tau mamoe.
17 Hanai, kia iloa e koe, mo e manamanatu ā po ke heigoa e mena ke eke, ha kua oti he taute e kelea ke hoko mai ke he iki ha tautolu, katoa mo e hana magafaoa oti; ko ia foki ko e tagata mahani kelea, nakai maeke kia taha ke vagahau atu kia ia.
18 Ti fakaave a Apikaila, ti uta ai e ia e tau areto ne ua e teau, mo e tau lupo kili manu ne ua ne puke ai ke he uaina, mo e lima e mamoe kua oti he taute, mo e tau fafati fua saito tunu ne lima mo e tau fuhi vine tavaki taha e teau, mo e tau fakapotopotoaga fua mati ne ua e teau; ti fakaheke ai e ia ki luga he tau asini;
19 Kua pehe age a ia ke he hana tau fuata, Mumua atu a a mutolu ki mua haku; kitiala, to mui atu au kia mutolu; ka e nakai tala atu ai a ia ke he hana tane.
20 Kua heke e ia hana asini, ti hifo ai a ia ke he fahi galo he mouga; kitiala, kua hifo mai a Tavita mo e hana tau tagata ti fakafehagai a lautolu mo ia, ti feleveia ai a lautolu mo ia.
21 Ne pehe age a Tavita, Ko e moli kua leveki noa e au e tau mena oti he tagata na ke he tutakale, ti nakai galo ai ha mena taha hana; ka kua taui mai e ia e mitaki ke he kelea.
22 Kia eke pihia he Atua kia lautolu oti kua fai fi kia Tavita, mo e lafilafi atu e ia ki ai, kaeke ke fakahao e au ia lautolu oti ha ha ia ia e taha tama tane taha, ke hoko ke he maama he aho a pogipogi.
23 Kua kitia e Apikaila a Tavita, ti hifo mai fakaave a ia he asini hana, ti fakaveli fakafohifo a ia ki mua a Tavita, mo e tukutukuhifo ai a ia ke he kelekele.
24 Ti fakaveli mai a ia ke he hana tau hui, kua pehe mai, Ko e iki na e, kia ha ha ia au e mahani kelea nai; kia toka e koe hau a fekafekau fifine ke vagahau atu ke he hāu a na teliga, ti fanogonogo mai a koe ke he hāu a fekafekau fifine;
25 Aua neke tuku he iki haku ke he hana finagalo e mahani he tagata kolokolovao na, ko Napalu; ha ko e mena tuga ne higoa hana kua pihia foki a ia; ko Napalu hana higoa, ti ha ha ia ia e mahani goagoa; ka ko au ko e hau a fekafekau fifine, nakai kitia e au e tau fuata he haku iki ne fakafano age e koe.
26 Hanai, ko e iki na e, kua moui a Iehova, kua moui foki a koe, kua taofi ai e Iehova a koe, neke fina atu a koe ke fakamaligi toto, mo e taui atu ai kia Napalu ke he hau a lima; ko e hanai, kia tuga a Napalu a lautolu kua fai fi kia koe, katoa mo lautolu kua kumi ke ekefakakelea ke he haku a iki.
27 Hanai, ko e fakaalofa nai kua ta mai hau a fekafekau fifine nai ke he haku a iki; kia ta age ia ke he tau fuata ne mumui mai ke he haku a iki.
28 Kia fakamagalo e koe e hala he hau a fekafekau fifine; ha ko e mena to eke ni e Iehova ma e iki haku e magafaoa tumau; ha kua tau ai haku a iki ke he tau tau a Iehova, ti nakai moua ai ha kelea kia koe ke he hau a tau aho oti.
29 Ka kua tutu mai e tau tagata ke tutuli a koe, kua kumi foki e lautolu ke matulei ai a koe; ka to afi ai e moui he haku a iki ke he afi he tau tagata momoui mo Iehova hau a Atua; ka ko e tau moui ha lautolu kua fai fi kia koe, to liti atu e ia a lautolu po ke maka kua liti mai loto he filo ke liti aki e tau maka.
30 Ka oti he eke e Iehova ke he haku a iki e tau mena mitaki oti ne vagahau mai e ia kia koe, ti kotofa ai a koe ke eke mo iki ke pule kia Isaraela,
31 Ti nakai eke e mena nai mo mena ke tupetupe ai a koe, mo mena foki ke mamahi ai e finagalo he haku a iki, ha kua nakai fakamaligi toto teao e koe, ti nakai taui atu he iki haku e kelea. Ka fakamonuina e Iehova ke he haku a iki, ti manatu mai e koe ke he hau a fekafekau fifine.
32 Ti pehe age a Tavita kia Apikaila, Kia fakaaue atu kia Iehova ko e Atua a Isaraela, ne fakafano mai ai a koe ke he aho nai ke fonofono au;
33 Kia fakaaue atu foki ke he hau a pulotu, mo e fakaaue atu kia koe ha kua taofi e koe au he aho nai, neke fina atu au ke fakamaligi e toto, mo e taui ai e kelea ke he haku lima.
34 Ko e moli kua moui a Iehova ko e Atua a Isaraela, ko ia ne taofi au neke eke ai e au ha mena kelea kia koe; ha ko e mena aua e hau fakaave a koe ke feleveia mo au, po kua nakai ni toe ha tama tane taha kia Napalu ka hoko ke he maama he aho a pogipogi.
35 Ti talia ai e Tavita mai he tau lima hana e tau mena ne ta mai e ia kia ia; ti pehe age a ia kia ia, Hake a a koe mo e monuina ke he fale hau; kitiala, kua fanogonogo atu e au ke he hau a tau kupu, mo e fakaalofa atu au kia koe.
36 Ti fina atu ai a Apikaila kia Napalu; kitiala kua eke ai e ia e galue ke he hana fale, tuga ne galue he patuiki; kua fiafia foki e loto a Napalu ki loto ia ia ha kua inu a ia ti konahia lahi a ia. Ti nakai tala atu e ia kia ia ha kupu tote, po ke kupu lahi ato aho a pogipogi.
37 Kua hoko ke he aho a pogipogi, kua mole atu ia Napalu e konahia ke he uaina, ti tala age ai e hoana hana e tau mena oti na kia ia; ti mate ai hana loto ki loto ia ia; ti eke a ia ke tuga ne maka.
38 Kua katoa ai e tau aho tokai ko e hogofulu, ti ta ai e Iehova a Napalu; ti mate ai a ia.
39 Kua logona e Tavita kua mate a Napalu, ti pehe age a ia, Kia fakaaue atu ā kia Iehova, kua taui atu e ia ke he ekefakakelea mai a Napalu, mo e taofi e ia hana fekafekau mai he kelea; ka e liuaki atu e Iehova e kelea a Napalu ke he hana ni a ulu. Ti fakafano atu e Tavita e tau fekafekau ke vagahau ai mo Apikaila ke eke a ia mo hoana hana.
40 Kua hoko atu e tau fekafekau a Tavita kia Apikaila i Karamelu, ti vagahau atu ai a lautolu kia ia, kua pehe atu, Kua fakafano mai e Tavita a mautolu kia koe kia eke a koe mo hoana hana.
41 Ti matike ai a ia, ti fakaveli fakafohifo a ia ke he kelekele; Kitiala hau a fekafekau fifine, kia eke a ia mo fekafekau ke holoholo ai e tau hui he tau fekafekau he haku a iki.
42 Ti matike fakaave a Apikaila, kua heke a ia he asini, ti mumui atu kia ia hana tau tama fifine tokolima; ti mui atu a ia ke he tau fekafekau a Tavita, ti eke a ia mo hoana hana.
43 Ne uta foki e Tavita a Ahinoama ko e fifine Isereelu mo hoana, ti eke ai a laua tokoua mo tau hoana hana.
44 Ka kua age e Saulo hana tama fifine ko Mekala ko e hoana a Tavita kia Paleti, ko e tama a Laisa, ko e tagata Kalima.