1 Samuela 29:1-11
29 KUA fakapotopoto ai he tau tagata Filisitia ha lautolu a tau kau oti i Afeka; ka kua heapi ai e tau tagata Isaraela ke he vaipuna ha ha i Isereelu.
2 Ti o age ai e tau iki Filisitia ke he tau takiteau tagata mo e tau takiafe tagata, ko Tavita foki mo e hana tau tagata ne mumui age a lautolu fakalataha mo Akisa.
3 Ti pehe age ai e tau iki Filisitia, Kua eke ha he tau tagata Heperu nai? Ti pehe age a Akisa ke he tau iki Filisitia, Nakai kia ko Tavita hanai ko e fekafekau a Saulo ko e patuiki a Isaraela? ne ha ha ia au a ia ke he tau aho, po ke tau tau, ka e nakai iloa e au ha mena taha kia ia, tali mai he aho ne hola mai ai a ia kua hoko mai ni ke he aho nai.
4 Ka kua ita e tau iki Filisitia kia ia; ti pehe age e tau iki Filisitia kia ia, Kia fakafano atu e koe e tagata na kia liu a ia ke he hana mena ne kotofa e koe a ia ke nofo ai; ha ko e mena nakai o a tautolu mo ia ke tau, neke kau kehe a ia mo tautolu ka tau ai a tautolu; ko e heigoa e mena ke fakalotomafola aki he tagata na hana iki nakai kia ko e tau ulu he tau tagata nai?
5 Nakai kia ko Tavita hanā ne lologo fakafepa ai e tau fifine ke he tau lologo ha lautolu, kua pehe age, Kua keli e Saulo hana tau afe tagata, ka ko Tavita hana tau hogofulu afe tagata.
6 Ti ui age a Akisa kia Tavita kua pehe age kia ia, Kua moui a Iehova, kua tonu ni hau a mahani, mo e mitaki kia au hau a o fano mo au ke he heaga api; ha kua nakai iloa e au ha mahani kelea kia koe tali he hau a koe kia au ke hoko mai ke he aho nai; ka kua nakai mitaki a koe ke he manatu he tau iki.
7 Hanai, kia liu a koe, kia fano a a koe mo e monuina, neke eke ai e koe e mena kua kelea ke he manatu he tau iki Filisitia.
8 Ti pehe age a Tavita kia Akisa, Ko e heigoa kia e mena kua eke e au? ko e heigoa foki e mena kua fioia e koe ke he hau a fekafekau tali he ha i ai au ki mua hau, ke hoko mai ke he aho nai, ke nakai fano ai au ke tau mo e tau fi he haku a iki ko e patuiki.
9 Ti tali age a Akisa, kua pehe age kia Tavita, Kua iloa e au, kua mahani mitaki a koe kia au tuga ne agelu he Atua; ka ko e tau iki Filisitia, kua pehe mai a lautolu, Nakai hake a ia mo mautolu ke tau.
10 Hanai, kia uhu ala a mutolu ke he aho a pogipogi, ko koe mo e tau fekafekau he hau a iki ne o mai mo koe, kia uhu matike a mutolu a pogipogi ka maama e aho, ti o ai a mutolu.
11 Ti uhu matike a Tavita mo e hana tau tagata ke he aho a pogipogi ke o, ke liliu atu a lautolu ke he motu he tau tagata Filisitia; ka e o hake e tau tagata Filisitia ki Isareelu.