1 Samuela 3:1-21
3 NE fekafekau ai e tama ko Samuela kia Iehova ki mua a Eli; ti hogeia e tau kupu he Atua ke he vaha ia, nakai ni fakakite mau mai.
2 Ko e aho ia kua takoto a Eli ke he hana mohega; kua kamata tuai ke pouli hana tau mata, ti nakai maama a ia ke kitia e tau mena;
3 Kua nakaila tamate e lamepa he Atua, kua takoto a Samuela ke he faituga a Iehova ne toka ai e puha he Atua;
4 Ti ui e Iehova kia Samuela; ti tali atu ai a ia, Ko au hanai.
5 Ti poi atu a ia kia Eli, mo e pehe atu a ia, Ko au hanai, ha kua ui mai a koe kia au. Ka e pehe mai a ia, Nakai ui atu au; liu ā, ke takoto.
6 Ti liu ui foki e Iehova, Samuela na e! Ti matike a Samuela, mo e fano kia Eli, mo e pehe atu a ia, Ko au hanai, ha kua ui mai a koe kia au. Ti pehe mai a ia. Nakai ui atu au ma mea liu a ke takoto.
7 Ka ko Samuela nakaila iloa e ia a Iehova, ti nakaila fakakite atu kia ia e finagalo a Iehova.
8 Ti ui foki e Iehova kia Samuela, ko e lagatolu, ti matike ai a ia mo e fano kia Eli, mo e pehe atu a ia, Ko au hanai, ha ko e mena ui mai a koe kia au. Ti kitia ai e Eli kua ui e Iehova ke he tama.
9 Ti pehe mai a Eli kia Samuela, Fano ā, ti takoto ā koe; ka eke ke ui mai a ia kia koe, ti pehe age a koe, Kia vagahau mai ā koe Iehova na e, ha kua fanogonogo atu hau a fekafekau. Ti fano a Samuela, ti takoto ai a ia ke he hana mohega.
10 Ti haele mai a Iehova, ti tu ai a ia mo e ui tuga ne eke e ia fakamua, Samuela, Samuela na e? Ti pehe age a Samuela, Kia vagahau ā koe, ha kua fanogonogo atu hau a fekafekau.
11 Ti pehe mai a Iehova kia Samuela, kitiala, ko e eke ne fai e au e mena ke he motu a Isaraela, ke takitaha a lautolu oti kua logona mo e go ai hana na teliga ua.
12 Ko e aho ia to fakahoko atu ai e au kia Eli e tau mena oti ne vagahau atu ai e au ke he hana magafaoa; to kamata ai e au, mo e fakahiku ai e au ni.
13 Ne tala age e au kia ia, to fakahala e au hana magafaoa ke hoko ke he tukulagi, ha ko e hala kua iloa e ia; ha ko e hana tau tama tane kua mahani kelea ni a laua, ka e nakai taofi ai e ia a laua.
14 Ko e mena ia ne omonuo ai e au ke he magafaoa a Eli, nakai fakamagalo ai e mahani kelea he magafaoa a Eli ke he tau poa mo e tau poa mena kai tukulagi ni.
15 Ne takoto a Samuela ato hoko ke he aho a pogipogi ti hafagi ai e ia e tau gutuhala he fale a Iehova; ka e matakutaku a Samuela ke tala age kia Eli e mena ne fakakite mai.
16 Ti ui e Eli kia Samuela kua pehe mai, Haku tama na e, ma Samuela ti pehe atu a ia, Ko au hanai.
17 Ti pehe mai a ia, Ko e heigoa kia e kupu ne vagahau mai ai kia koe aua neke fufu ai e koe ia au; kia eke pihia he Atua kia koe, mo e lafilafi e ia ki ai, kaeke ke fufu e koe ia au ha kupu he tau kupu oti ne vagahau mai ai e ia kia koe.
18 Ti tala age e Samuela e tau kupu oti kia ia, nakai fufu e ia ha mena ia ia. Ti pehe age ai a ia, Ko ia ko Iehova, kia eke e ia e mena kua finagalo ai a ia.
19 Ne tupu a Samuela, ti fakalataha a Iehova mo ia, ti nakai toka e ia ha kupu taha he hana tau kupu oti ke to noa ke he kelekele.
20 Ti iloa ai e Isaraela oti, ke kamata mai i Tano ke hoko atu ki Peresepa, ne fakamoli a Samuela ke eke mo perofeta a Iehova.
21 Ti fakakite mai foki a Iehova i Sailo, ha kua fakakite mai ai a Iehova kia Samuela i Sailo ke he kupu a Iehova. Ti hoko e kupu a Samuela kia Isaraela oti.