1 Samuela 4:1-22
4 NE o atu a Isaraela ke tau mo e tau tagata Filisitia; ti heapi ai a lautolu i Epenesa, ka e heapi e tau tagata Filisitia i Afeka.
2 Ti tatanaki atu ai e tau tagata Filisitia ke tau kia Isaraela; ti tau fano e kau, ti keli ai he tau tagata Filisitia a Isaraela; ne keli e lautolu ke he kau ne tau ai ke he male tau, tokai ko e fa e afe e tagata.
3 Kua liliu atu a lautolu ke he heagaapi ti pehe e tau patu a Isaraela, Ko e heigoa e mena ne ta ai e Iehova a tautolu ke he aho nai ki mua he tau tagata Filisitia? Kia ta mai e tautolu e puha he maveheaga a Iehova i Sailo kia tautolu, ka hoko mai a ia kia tautolu, ti fakamoui e ia a tautolu mai he lima ha lautolu kua fai fi mai kia tautolu.
4 Ti fakafano atu he motu ki Sailo kia ta mai e lautolu he mena ia e puha he maveheaga a Iehova Sapaota kua haele ke he vaha he tau kerupi; ti ha i ai mo e puha he maveheaga he Atua e na tama tane tokoua a Eli, ko Hofeni mo Fineaso.
5 Ne hoko atu e puha he maveheaga a Iehova ke he heagaapi, ti kalaga ai a Isaraela oti mo e kalaga lahi, ti tomumu ai e kelekele.
6 Ti logona he tau tagata Filisitia e go he faoa ne kalaga, ti pehe a lautolu, Ko e heigoa kia e kalaga lahi na kua go mai he heagaapi he tau tagata Heperu? Ti iloa ai e lautolu, ko e puha a Iehova kua ta mai ke he heagaapi.
7 Ti matakutaku e tau tagata Filisitia, ha kua pehe a lautolu, Kua hoko age e Atua ke he heagaapi; ti pehe a lautolu, Oi te fakaalofa kia tautolu, ha kua nakai pihia fakamua.
8 Oi fakaalofa kia tautolu, ko hai kia ke laveaki a tautolu mai he tau lima he tau Atua mana ia? Ko e tau Atua ia ne ta āki a Aikupito ke he tau ta oti ke he tutakale.
9 Ko e tau tagata Filisitia na e, kia fakamalolo a, kia eke a mutolu mo tau tagata toa, neke eke a tautolu mo tau fekafekau ke he tau tagata Heperu, tuga ne eke a lautolu mo tau fekafekau kia mutolu; kia eke a mutolu mo tau tagata toa, ti tau a mutolu mo lautolu.
10 Ti tau e tau tagata Filisitia mo lautolu; ti keli ai a Isaraela, kua takitaha mo e hola ke he hana fale ie, ti lahi ni e keliaga, ko e tau tagata Isaraela ne keli ko e tolugofulu e afe a lautolu, ko e kau ne o ke he tau hui ha lautolu.
11 Ne uta foki e puha he Atua, ti mamate ai e tau tama tane tokoua a Eli ko Hofeni mo Fineaso.
12 Ti poi age e tagata Peniamina mai he tau, ti hoko age a ia ki Sailo ke he aho ia ni; ne mahehe hana tau tapulu ti toka ai e kelekele ki luga he ulu hana.
13 Ne fina age a ia, kitiala, kua nofo ai a Eli ke he nofoa ke he kauhala, kua leo ai a ia, nukua vivivivi hana loto ha ko e puha he Atua; ne fano e tagata ti talahau ai ke he maga, ti tagi ai e maga oti.
14 Ne logona e Eli e leo he tagi, ti pehe age ai a ia, Ko e heigoa kia e go na? Ti fano fakaave e tagata, ti tala age ai e ia kia Eli.
15 Ka ko Eli ne hivagofulu ma valu hana tau tau, kua pouli tuai hana tau mata nakai kitia e ia ha mena.
16 Ti pehe atu e tagata kia Eli, Ko au hanai kua hau ai au he tau; kua hola mai au he tau ke he aho nai. Ti pehe mai a ia, Haku tama na e, ko e heigoa kia hau a kupu?
17 Ti tali atu a ia ne tamai e ogo, kua pehe atu, Kua fehola a Isaraela ki mua he tau tagata Filisitia, ti keli popo ai e tau tagata tokologa ni he motu; kua matulei foki e tau tama tokoua hau, ko Hofeni mo Fineaso; ti kua uta e puha he Atua.
18 Kua hoko ke he kupu ne talahau ai e ia e puha he Atua, ti to ai a ia hala tua mai he nofoa ke he tapa he gutuhala, ti mapaki ai hana ua, ti mate a ia, ha ko e tagata motua a ia, to mamafa a ia. Ne fakafili ai e ia a Isaraela ke he tau tau ne fagofulu.
19 Ko e hana figona fifine, ko e hoana a Fineaso, ne tata hana fanau aga; ne logona e ia e tala, kua uta e puha he Atua, kua mate foki hana matua fugavai, katoa mo e hana tane, ti fakatokotui ai a ia, ti fanau ai e ia, ha kua hoko mai kia ia hana mamahi.
20 Kua hoko ke he magaaho ke mate ai a ia, ti tala age e tau fifine ne tutu ai kia ia, ua matakutaku a koe ha kua fanau ai e koe e tama tane; ka e nakai tali a ia, ti nakai manamanatu ai e ia.
21 Ti ui e ia e tama ko Ikapoti, kua pehe a ia, Kua uta kehe e lilifu a Isaraela, ha kua uta ai e puha he Atua, ha ko e matua fugavai hana foki, mo e hana tane.
22 Ti pehe age a ia, Kua uta kehe e lilifu a Isaraela ha kua uta kehe ai e puha he Atua.