1 Samuela 9:1-27
9 KO e taha tagata Peniamina ko e hana higoa ko Kiso ko e tama a Avielu, ko e tama a Tiroro, ko e tama a ia a Pekuro, ko e tama a ia a Afia, ko e tama he taha tagata Peniamina; ko e tagata muhu koloa loga a ia.
2 Ti ha ha ia ia e tama tane ko Saulo hana higoa, ko e fuata mitaki a ia, nakai fai tagata he magafaoa a Isaraela ke mua hana mitaki ke he mitaki hana; ne liu hifo he tau fu lima hana e tokoluga he tau tagata oti kana.
3 Kua galo e tau asini a Kiso ko e matua a Saulo, ti pehe age a Kiso ke he hana tama ko Saulo, Kia o a mua mo e taha fuata, matike ā, ti o ā mua ke kumi e tau asini.
4 Ti o age a laua ke he mouga ko Efaraimo, ti o age ai ke he motu ko Salisa ka e nakai moua ai; ti o age a laua ke he motu ko Saali, ka e nakai ha i ai; ti o age a laua ke he motu he tau tagata Peniamina ka e nakai moua ai e laua.
5 Kua hoko a laua ke he motu ko Sufi, ti pehe age a Saulo ke he hana fekafekau ne o a laua mo ia, Hau ā, kia liliu a taua, neke toka he matua haku hana manatu ke he tau asini, ka e fakaatukehe a ia ha ko taua.
6 Ka e pehe age a ia kia ia, Kitiala, ha ha he maga nai e tagata he Atua, ko e tagata pola mitaki, ti hoko ni e tau mena oti ne vagahau ai e ia; kia o ā taua kia ia, to ligaliga fakakite mai e ia ha taua a puhala kua o ai a taua.
7 Ti pehe age a Saulo ke he hana fekafekau, Kitiala, ka o a taua kia ia, ko e heigoa kia e mena ke uta ke he tagata? ha kua oti tuai e areto he tau kato ha taua, ti nakai fai mena fakaalofa a taua ke uta ke he tagata he Atua; ko e heigoa kia e mena ha ha ia taua?
8 Ti tali age e fekafekau kia Saulo, kua pehe age, Kitiala, ha ha he lima haku e mena ne fa aki e sikeli ario to age ai e au ke he tagata he Atua ke fakakite mai kia taua ha taua a puhala.
9 Ne pehe e kupu he tagata i Isaraela i tuai ka fano a ia ke kumi ke he Atua, O mai ā ke o a tautolu ke he tagata kitekite, ha ko e perofeta ke he vaha nai, ne ui a ia i tuai ko e tagata kitekite.
10 Ti pehe age a Saulo ke he hana fekafekau, Kua mitaki e kupu hau; hau ā ke o a taua. Ti o ai a laua ke he maga ha ha i ai e tagata he Atua.
11 Kua o hake a laua ke he mena ke o hake ai ke he maga, ti feleveia a laua mo e tau tama fifine, ha ne o atu a lautolu ke utu vai; ti pehe age a laua kia lautolu, Ha i ai nakai e tagata kitekite ke he mena nai?
12 Ti tali age a lautolu kia laua kua pehe age, Haia, kitiala, ha i mua hau a ia; Hanai, alumaki ā, ha kua hau a ia ke he maga ke he aho nai, ha ko e poa he motu ke eke ai ke he aho nai ke he mena tokoluga.
13 Ka hoko a mua ke he maga ti moua agataha e mua a ia, ka kua nakaila fano a ia ke he mena tokoluga ke kai mena ai; ha ko e mena nakai kai e tau tagata ato fina atu a ia, ha kua fakaaue ai e ia e poa, ka oti ia, ti kai ai e lautolu ne ui ai; o hake ā, ha ko e moua atu e mua a ia ke he aho nai.
14 Ti o hake a laua ke he maga; kua o atu a laua ki loto he maga, kitiala, ko Samuela ne fina atu, ti feleveia a ia mo laua, he hake a ia ke he mena tokoluga.
15 Ne tala mai e Iehova ke he tau teliga a Samuela ke he aho kua nakaila fina atu a Saulo a pogipogi, kua pehe mai,
16 Ko e magaaho nai a pogipogi ke fakafano atu ai e au kia koe e tagata mai he motu a Peniamina, ti fakauku e koe a ia ke eke mo iki he haku motu ko Isaraela; to fakamoui foki e ia haku motu mai he tau lima he tau tagata Filisitia; ha kua kitekite atu au ke he haku motu, ha kua hoko mai kia au ha lautolu a tagi.
17 Ne kitia e Samuela a Saulo, ti tala age a Iehova kia ia, Kitiala, ko e tagata hanā ne pehe atu ai au kia koe, to pule a ia ke he haku motu.
18 Ne hoko atu a Saulo kia Samuela ki loto he gutuhala, ti pehe atu a ia, Kia fakakite mai ā e koe kia au po ko fe e fale he tagata kitekite.
19 Ti tali mai a Samuela kia Saulo kua pehe mai, Ko au nai ko e tagata kitekite; mumua hake ā a mua ki mua haku ke he mena tokoluga, to kai mena a tautolu mo mua ke he aho nai; to fakafano atu e au a koe a pogipogi; to fakakite atu e au kia koe e tau mena oti ha ha he loto hāu.
20 Ka ko e tau asini hāu ne galo, ko e po tolu aenai, aua neke manatu ai e koe, ha kua moua tuai; ha ha ia hai kia e manako oti a Isaraela? nakai kia ha ha ia koe mo e magafaoa oti he hau a matua?
21 Ti tali atu a Saulo pehe, Nakai kia ko e tagata he magafaoa a Peniamina au, ko e magafaoa ne tote ue atu ia Isaraela, ko e haku a magafaoa foki ne muikau kiliiku he tau magafaoa oti a Peniamina? ko e heigoa e mena ne vagahau mai ai e koe e kupu na kia au?
22 Ti uta e Samuela a Saulo mo e hana fekafekau, ti o a lautolu mo ia ke he mena ke kai mena ai, ti tuku atu e ia kia laua e mena ne mua ke nofo ai ia lautolu ne ui ke he kaiaga mena, ko e katoatoa ha lautolu ko e tokotolugofulu e tagata.
23 Ti pehe age a Samuela ke he tagata faiumu, Ta mai ā e tufaaga ne ta atu e au kia koe, ti pehe atu ai au, kia toka ai e koe.
24 Ti ta hake ai he tagata faiumu e lima mo e mena ha i ai, ti fakatoka ai ki mua a Saulo, Ti pehe mai a Samuela, Kitiala e mena ne toe, kia tuku ā ki mua hau, mo e taumafa ai; ha kua toka ni māu ke hoko ke he magaaho ke lata ai, ha kua pehe atu au kua ui e au ke he tau tagata ke o mai. Ti taumafa ai a Saulo mo Samuela ke he aho ia.
25 Kua o hifo mai a lautolu he mena tokoluga ke he maga, ti vagahau ai a laua mo Saulo ki luga he fale.
26 Kua uhu matike a lautolu, ti hoko ke he matafatafaata he aho, ti ui mai e Samuela kia Saulo ki luga he fale, kua pehe mai, Matike ā, kia fakafano atu e au a koe. Kua matike a Saulo ti o ai a laua ki fafo, ko ia mo Samuela.
27 Kua o hifo a laua ke he kala he maga, ti pehe mai a Samuela kia Saulo, Kia pehe age a koe ke he fekafekau ke mua atu a ia ia taua, (ti fano ai a ia). Ka ko koe, kia tu ai a koe ke he magaaho nai ato fakakite atu e au kia koe e finagalo he Atua.