1 Tau Patuiki 1:1-53
1 KUA motua tuai e patuiki ko Tavita, kua loga hana tau tau; ti fakakafu e lautolu a ia ke he tau ie ka e nakai mafana ai a ia.
2 Ti pehe age hana tau fekafekau kia ia, Kia kumi mai ai taha tamafine tote ma e ha mautolu a iki ko e patuiki, kia tu ai a ia ki mua he patuiki, mo e leveki e ia a ia; kia takoto foki a ia ke he fatafata hau, kia mafana ai ha mautolu a iki ko e patuiki.
3 Ti kumi ai e lautolu e tama fifini mitaki ke he tau fahi oti a Isaraela; ti moua e lautolu a Apisaka ko e fifine Sunema, ti ta mai ai e lautolu a ia ke he patuiki.
4 Ko e tama fifine mitaki lahi ni a ia, ti leveki ai e ia e patuiki, mo e fekafekau a ia kia ia, ka e nakai iloa he patuiki a ia.
5 Ti fakatokoluga ai a Atonia ko e tama tane a Hakita, kua pehe age a ia, To eke au mo patuiki. Ti eke ai e ia māna e tau kariota, mo e tau tagata heke solofanua, mo e tau tagata tokolimagofulu ke tafepoi ai ki mua hana.
6 Kua nakai fakamamahi he matua hana a ia tali he fanau mai a ia, ke pehe age, Ko e ha ne eke ai pihia e koe? Ko e tagata tino mitaki lahi foki a ia; ne fanau a ia he tua a Apisaloma.
7 Kua pulega foki a lautolu mo Ioapo ko e tama a Seruia mo Aviata ko e ekepoa; ti lagomatai ai e laua mo e mumui atu kia Atonia.
8 Ka ko Satoka ko e ekepoa, mo Penaia ko e tama a Iehoiata, mo Natano ko e perofeta, mo Semi, mo Rei, mo e tau toa ne ha i ai mo Tavita, nakai ha i ai a lautolu mo Atonia.
9 Ti tamate a Atonia e tau mamoe, mo e tau povi, mo e tau manu gako, tata age ke he maka ko Soeleti, ne tata age ki Enerokelu; ti ui ai e ia ke he hana tau matakainaga oti, ko e tau tama tane he patuiki, mo e tau tagata Iuta oti ni, ko e tau fekafekau he patuiki;
10 Ka ko Natano ko e perofeta, mo Panaia, mo e tau toa, katoa mo Solomona hana matakainaga, nakai ui ai e ia.
11 Ti vagahau age a Natano kia Patesepa ko e matua fifine a Solomona, kua pehe age, Kua logona nakai e koe, kua eke mo patuiki a Atonia ko e tama a Hakita, ka e nakai iloa ai he iki ha tautolu ko Tavita;
12 Hanai, kia hau a koe, kia fakatonu atu e au kia koe, ke fakamoui ai e koe a koe, mo e tama hau ko Solomona.
13 Kia fano ā koe, ti hu atu ā koe ke he patuiki ko Tavita, ti pehe age a koe kia ia, Ko e iki na e, ko e patuiki, nakai kia omonuo mai e koe kia au ko e hau a fekafekau fifine, kua pehe mai, Ko e moli, to eke haku a tama ko Solomona mo patuiki ka mole atu au, ti nofo ai a ia ke he haku a nofoaiki; ti kua eke he ha a Atonia mo patuiki?
14 Kitiala, ka vagahau ai a mua mo e patuiki, to fina atu foki au ke he tua hāu, ti fakamoli ai e au hau a tau kupu.
15 Ti fina atu ai a Patesepa ke he patuiki ke he hana poko, kua motua lahi ni e patuiki; kua fekafekau foki a Apisaka ko e fifine Sunema ke he patuiki.
16 Ti tukutuku hifo a Patesepa, mo e fakaveli fakafohifo ai ke he patuiki. Ti pehe mai ai e patuiki, Ko e heigoa kia hāu a manako?
17 Ti pehe atu a ia kia ia, Ko e iki na e, ne omonuo e koe kia Iehova hau a Atua ke he hāu a fekafekau fifine, ne pehe mai, Ko e moli, to eke hau a tama ko Solomona mo patuiki ka mole atu au, to nofo foki a ia ke he haku a nofoaiki.
18 Hanai, kitiala, kua eke a Atonia mo patuiki, ka ko koe haku iki na e, ko e patuiki, nakai iloa e koe.
19 Kua keli foki e ia e tau povi, mo e tau manu gako, mo e tau mamoe loga ni, kua ui foki e ia ke he tau tama tane oti he patuiki, mo Aviata ko e ekepoa, mo Ioapo ko e takitaki kua; ka ko Solomona nakai ui e ia ki ai.
20 Ha ko koe haku iki na e, ko e patuiki, kua hagao atu a Isaraela oti kia koe, kia fakakite e koe kia lautolu, po ko hai ke nofo ke he nofoaiki he haku a iki ko e patuiki ka mole atu a ia.
21 Ka nakai fakakite ai e koe, ka takoto ai haku iki ko e patuiki fakalataha mo e hana tau matua, ti talahaua ai ko e tau tagata hala a maua mo e haku a tama ko Solomona.
22 Kitiala, kua vagahau ai a laua mo e patuiki, ti hau ai a Natano ko e perofeta.
23 Ti tala age a lautolu ke he patuiki kua pehe, Kitiala, ko Natano ko e perofeta. Kua hu atu a ia ki mua he patuiki, ti fakaveli fakafohifo ai a ia ki mua he patuiki.
24 Ti pehe atu a Natano, Ko e iki na e, ko e patuiki, kua pehe kia a koe, To eke a Atonia mo patuiki ka mole atu au, ti nofo ai a ia ke he haku a nofoaiki?
25 Ha kua hifo a ia ke he aho nai, mo e tamate ai e tau povi mo e tau manu gako, mo e tau mamoe loga ni; ti ui ai e ia ke he tau tama tane oti he patuiki, mo e tau takitaki kau, mo Aviata ko e ekepoa; ti kitiala, kua kai ai e lautolu mo e inu ki mua hana, mo e pehe age, Kia moui e patuiki ko Atonia.
26 Ka ko au, ko au nai ko e hāu a fekafekau, mo Satoka ko e ekepoa, ko Penaia foki ko e tama a Iehoiata, mo Solomona ko e hau a fekafekau nakai ui e ia ki ai.
27 Kua eke kia he iki haku ko e patuiki e mena nai ka e nakai fakakite mai e koe ke he hāu a tau fekafekau po ko hai ke nofo ke he nofoaiki he haku iki ko e patuiki ka mole atu a ia.
28 Ti tali mai ai he patuiki ko Tavita, kua pehe mai, Kia ui atu e mutolu kia Patesepa ke hau a ia kia au. Ti hau ai a ia ki mua he patuiki.
29 Ti omonuo ai e patuiki, kua pehe mai, Kua moui a Iehova, ko ia ne laveaki au mai he tau mena matematekelea oti kana,
30 Tuga ne omonuo ai au kia koe kia Iehova ko e Atua a Isaraela, kua pehe atu, Ko e moli to eke hau a tama ko Solomona mo patuiki ka mole atu au, ti nofo ai a ia ke he haku a nofoaiki ke hukuiaki au, to eke ai e au pihia ke he aho nai.
31 Ti tukutukuhifo ai a Patesepa ke he kelekele, kua hufeilo a ia ke he patuiki, kua pehe atu, Kia moui tukulagi haku a iki, ko e patuiki ko Tavita.
32 Ti pehe age e patuiki ko Tavita, Kia ui atu a kia Satoka ko e ekepoa, mo Natano ko e perofeta, mo Penaia ko e tama a Iehoiata. Ti o mai ai a lautolu ki mua he patuiki.
33 Ti pehe age e patuiki kia lautolu, Kia o ā mutolu katoa mo e tau fekafekau he iki ha motolu, ti fakaheke ai e mutolu a Solomona ki luga he falata ni haku, ti takitaki hifo e mutolu a ia ki Kihona.
34 Ti fakauku ai a ia ke he mena ia e Satoka ko e ekepoa, mo Natano ko e perofeta, ke eke a ia mo patuiki a Isaraela; ti ulo e mutolu e pu, mo e pehe atu, Kia moui, e patuiki ko Solomona.
35 Ti o hake ai a mutolu mo e mumui atu kia ia, ti hau ai a ia mo e nofo ke he haku a nofoaiki; ha kua eke a ia mo patuiki he hukuiaki au; kua kotofa foki a ia ke eke mo takitaki a Isaraela katoa mo Iuta.
36 Ti tali atu ai a Penaia ko e tama a Iehoiata ke he patuiki, kua pehe atu, Amene; kia vagahau mai pihia a Iehova ko e Atua he haku iki ko e patuiki.
37 Tuga ne fakalataha a Iehova mo e haku a iki ko e patuiki kia fakalataha pihia a ia mo Solomona, mo e eke e ia ke mua e lilifu he hana nofoaiki ke he nofoaiki he haku iki ko e patuiki ko Tavita.
38 Ti o hifo ai a Satoka ko e ekepoa, mo Natano ko e perofeta, mo Penaia ko e tama a Iehoiata, mo e kau he tau Kereti, mo e kau he tau Peleti, ti fakaheke ai e lautolu a Solomona ke he falata he patuiki ko Tavita, ti takitaki e lautolu a ia ki Kihona.
39 Ti uta e Satoka e lupo hoe manu kua puke ke he maga lolo mai he fale uta fano, ti fakauku ai e ia a Solomona. Ti ulo e lautolu e pu; ti pehe atu e motu oti, Kia moui e patuiki ko Solomona.
40 Ti o hake ai e motu oti, kua mumui atu a lautolu kia ia, kua fakatagi kofe e lautolu, ti fiafia ai a lautolu mo e fiafia lahi, kua ihi ai e kelekele ke he leo ha lautolu.
41 Kua logona ai e Atonia mo lautolu oti ne ui ai e ia, ka kua oti ha lautolu a taumafa, Kua logona foki e Ioapo e leo he pu, ti pehe ai i ia, Ko e heigoa kia e miha na he maga kua go?
42 Kitiala, ha ne vagahau a ia ti hau ai a Ionatana ko e tama a Aviata ko e ekepoa; ti pehe atu ai a Atonia kia ia, Hau ā, ha ko e tagata mahani mitaki a koe, mo e ta mai ai e koe e tala mitaki.
43 Ti tali mai ai e Ionatana kia Atonia kua pehe mai, Ko e moli, ko e iki ha tautolu ko e patuiki ko Tavita, kua eke ni e ia a Solomona mo patuiki.
44 Kua fakafano foki he patuiki fakalataha mo ia a Satoka ko e ekepoa, mo Natano ko e perofeta, mo Penaia ko e tama a Iehoiata, mo e kau he tau Kereti, mo e kau he tau Peleti, kua fakaheke foki e lautolu a Solomona ki luga he falata he patuiki.
45 Kua fakauku foki a ia i Kihona, e Satoka ko e ekepoa, mo Natano e perofeta ke eke a ia mo patuiki; ti o hake ai a lautolu he mena ia mo e fiafia, ti tomumu ai e kelekele he maga, ko e go ia ne logona ai e mutolu.
46 Kua nofo ai foki a Solomona ke he nofoaiki he kautu.
47 Ne o age foki e tau fekafekau he patuiki ke fakamonuina atu ke he iki ha tautolu ko e patuiki ko Tavita, kua pehe atu, Kia eke he Atua ke mua e higoa a Solomona ke he higoa hāu, ke mua foki e lilifu he nofoaiki hana ke he nofoaiki hāu. Ti tukutukuhifo ai e patuiki ke he hana moheaga.
48 Kua vagahau mai foki e patuiki, kua pehe mai, Kia fakaaueina a Iehova ko e Atua a Isaraela, kua foaki mai ai ke he aho nai e taha ke nofo ke he haku a nofoaiki, ti kitia ai ni he tau mata haku.
49 Ti matakutaku ai a lautolu oti ne uiina ko lautolu ne ha i ai mo Atonia, ti tutu ai a lautolu, ti takitaha mo e fano ke he hana ni a puhala.
50 Kua matakutaku foki a Atonia ha ko Solomona, ti matike a ia mo e fano mo e toto atu ai ke he tau hoe he fatapoa.
51 Ti tala age ai kia Solomona, kua pehe age, Kitiala, kua matakutaku a Atonia ke he patuiki ko Solomona; ti kitiala, kua toto atu ai e ia ke he tau hoe he fatapoa, kua pehe age a ia, Kia omonuo mai he patuiki ko Solomona kia au ke he aho nai ke nakai keli ai e ia ke he pelu hana fekafekau.
52 Ti pehe age a Solomona, Kaeke ke mahani mitaki a ia nakai to ai ha lauulu hana ke he kelekele; ka ko e mena ka moua ai e mahani kelea kia ia, ti mate ni a ia.
53 Ti fakafano atu ai he patuiki ko Solomona, ti takitaki hifo e lautolu a ia mai he fatapoa. Ti hau a ia mo e fakaveli fakafohifo ai a ia ke he patuiki ko Solomona; ti pehe atu a Solomona kia ia, Kia fano a a koe ke he fale hāu.