1 Tau Patuiki 11:1-43
11 KA kua manako e patuiki ko Solomona ke he tau fifine kehe tokologa, ke lafilafi ke he tamafifine a Farao, ko e tau fifine he tau tagata Moapi, mo e tau tagata Amoni, mo e tau tagata Etoma, mo e tau tagata Saitonu, mo e tau tagata Heti;
2 Ko e tau motu ne pehe mai ai a Iehova ke he fanau a Isaraela, Aua neke o atu a mutolu kia lautolu, ti aua neke o mai a lautolu kia mutolu; ko e moli to fakaliliu kehe e lautolu ha mutolu a tau loto ke mumui atu ke he tau atua ha lautolu. Kua manako lahi a Solomona kia lautolu.
3 Ha ha ia ia e tau hoana ko e tau tama fifine he tau patuiki toko fitu e teau, mo e tau hoana fakahoa tokotolu e teau; ti fakaliliu kehe ai he tau hoana hana hana loto.
4 Kua motua a Solomona ti fakaliu kehe he tau hoana hana hana loto ke mumui atu ke he tau atua kehe; ti nakai eke e ia e finagalo a Iehova hana Atua mo e loto katoa, tuga ne eke mo e loto e Tavita hana matua.
5 Ha kua mui atu a Solomona kia Asaira ko e atua fifine he tau tagata Saitonu, ti mui atu a ia kia Milikoma ko e mena fakalialia he tau tagata Amoni.
6 Ne mahani kelea a Solomona ki mua a Iehova, nakai ni mui atu a ia kia Iehova tuga e matua hana ko Tavita.
7 Ti ati ai e Solomona e mena tokoluga ma Kemosa ko e mena fakalialia a Moapi, ke he mouga ha i mua a Ierusalema; mo Moloka foki, ko e mena fakalialia he fanau a Amoni.
8 Ti eke pihia e ia ma e hana tau hoana oti ne o mai he tau motu kehe, ne huhunu ai e lautolu e tau mena manogi, mo e eke poa ai ke he tau atua ha lautolu.
9 Ti ita a Iehova kia Solomona, ha kua liu kehe ai hana loto ia Iehova ko e Atua a Isaraela ne fakakite mai lagaua kia ia,
10 Mo e poaki mai kia ia ke he mena na, ke aua neke mui atu a ia ke he tau atua kehe; ka e nakai omaoma a ia ke he mena ne poaki mai e Iehova.
11 Ti pehe mai a Iehova kia Solomona, Kua ha ha ia koe e mena nai, ti nakai omaoma a koe ke he haku a maveheaga mo e haku tau fakatufono ne poaki atu ai e au kia koe, ko e mena ia to hēhē kehe e au e kautu ia koe, mo e ta age ai e au ke he hau a fekafekau.
12 Ka e nakai eke e au ke he tau aho he hau a moui ha ko e matua hau ko Tavita; ka to hēhē kehe e au mai he lima he hau a tama.
13 Ka e nakai hēhē kehe e au e kautu oti; ka to ta atu e au taha e magafaoa ke he tama hau, ha ko e haku a fekafekau ko Tavita, ha ko Ierusalema foki kua fifili ai e au.
14 Ti fakatu mai e Iehova e taha ke fai fi kia Solomona, ko Hatata ko e tagata Etoma, ko e taha he fanau he patuiki i Etoma.
15 Ka ko e mena ha ha i Etoma a Tavita, kua hake foki a Ioapo ko e takitaki kau ke tanu a lautolu kua kelipopo, ha kua kelipopo ai e tau tane oti i Etoma;
16 He nonofo a Ioapo mo Isaraela oti ke he tau mahina ne ono, ato kelipopo ai e lautolu e tau tane oti i Etoma;
17 Ti fehola a Hatata, ko ia mo e tau tagata Etoma, ko e tau fekafekau he hana matua fakalataha mo ia, ke o atu ai ki Aikupito ko e tama tote foki a Hatata.
18 Ti mamatike mai Mitiana a lautolu, ti o atu a lautolu ki Parana; ti uta e lautolu e tau tagata ma lautolu i Parana, ti o atu a lautolu ki Aikupito kia Farao ko e patuiki a Aikupito; ti ta age e ia kia ia e fale, mo e pehe age a ia, ke ta age e tau mena kai kia ia, ti ta age foki e ia e fonua kia ia.
19 Ne ofania lahi a Hatata e Farao, ti age e ia kia ia e matakainaga he faoa fifine hana ke eke mo hoana hana, ko e matakainaga he patuiki fifine ko Tapenesa haia.
20 Ti fanau ai he matakainaga a Tapenesa kia ia hana a tama tane ko Kenupata; ti tapani e Tapenesa a ia ke he fale a Farao; ti ha i ai a Kenupata ke he fale a Farao, fakalataha mo e tau tama tane a Farao.
21 Kua logona e Hatata i Aikupito kua takoto a Tavita fakalataha mo e hana tau matua, kua mate foki a Ioapo ko e takitaki kau, ti pehe age a Hatata kia Farao, Kia toka e koe au ke fano ke he motu haku.
22 Ti tali age ai a Farao kia ia, Ko e heigoa kia e mena nakai moua ai e koe ia au, Kitiala, kua fia fano ai a koe ke he motu hau? Ti pehe age a ia, Nakai ni fai mena, ka kia toka e koe au ke fano.
23 Kua fakatu mai foki he Atua taha ke fai fi atu kia ia, ko Resona ko e tama a Eliata ne hola a ia he hana iki ko Hatatatesa ko e patuiki a Sopa.
24 Ti fakapotopoto mai e ia e tau tagata kia ia, ti eke ai a ia mo takitaki kau, he kelipopo e Tavita e tau tagata Sopa; ti o atu a lautolu ki Tamaseko mo e nonofo ai a lautolu, ti pule a lautolu i Tamaseko.
25 Ne fai fi foki a ia kia Isaraela ke he tau aho oti a Solomona, ti lafi ia ke he kelea ne eke e Hatata; ne vihiatia e ia a Isaraela, ne eke foki a ia mo patuiki i Suria.
26 Ko Ierepoamo foki ko e tama a Nepata, ko e tagata Efaraimo mai Seleta, ko e fekafekau a ia a Solomona, ko Sirua foki e higoa he hana matua fifine, ko e fifine takape haia, ti fakafualoto a ia ke he patuiki.
27 Ko e mena foki hanai ne fakafualoto ai a ia ke he patuiki; ne ati e Solomona a Milo, ti taute e ia e mena ne malŏlo he maga a Tavita hana matua.
28 Ko Ierepoamo foki, ko e toa malolo a ia, ti fioia ni e Solomona ko e fuata malolo a ia, ti kotofa e ia a ia ke pule ke he tau gahua oti kua eke he magafaoa a Iosefa.
29 Ko e vaha ia ne fano ai a Ierepoamo i Ierusalema ti moua ai he perofeta ko Akia ko e tagata Sailo a ia ke he puhala; ne tapulu ai foki a Akia ke he tapulu fou, ne ha i ai a laua hoko laua ke he vao.
30 Ti toto ai e Akia e tapulu fou ne tapulu ai a ia, mo e hehe ai e ia ke he tau maga ne hogofulu ma ua.
31 Ti pehe age a ia kia Ierepoamo, Kia uta a e koe māu e tau maga ne hogofulu, ha kua pehe mai a Iehova ko e Atua a Isaraela, Kitiala to hēhē e au e kautu mai he pule a Solomona mo e ta atu e au kia koe e tau magafaoa ne hogofulu;
32 Ka e ha ha ia ia taha magafaoa ha ko e haku a fekafekau ko Tavita, ha ko Ierusalema foki ko e maga ne fifili e au mai he tau magafaoa oti a Isaraela.
33 Ka kua tiaki e lautolu au, mo e hufeilo a lautolu kia Asaira ko e atua fifine he tau tagata Saitonu, mo Kemosa ko e atua a Moapi, mo Milikoma ko e atua he fanau a Amoni; ti nakai o a lautolu ke he haku a tau puhala ke eke ai e tau mena tonu ki mua haku, mo e omaoma ai ke he haku tau fakatufono, mo e haku tau fakafiliaga, tuga ne matua hana ko Tavita.
34 Ka e nakai uta kehe e au e kautu oti ia ia; ko e mena eke e au a ia mo iki ke he tau aho oti he hana moui, ha ko e haku a fekafekau ko Tavita ne fifili e au, ne omaoma a ia ke he haku tau poaki mo e haku tau fakatufono.
35 Ka to uta kehe e au e kautu mai he tama tane hana, mo e ta atu ai e au kia koe hogofulu e magafaoa.
36 To ta age foki e au ke he hana tama tane taha e magafaoa, ke ha ha i ai mau ke he haku a fekafekau ko Tavita e lamepa ki mua haku i Ierusalema ko e maga ne fifili e au ke tuku ai haku a higoa.
37 To uta foki e au a koe ti pule a koe ke he tau mena oti ne manako ki ai hau a loto, ti eke ai a koe mo patuiki kia Isaraela.
38 Kaeke foki ke fanogonogo a koe ke he tau mena oti ke poaki atu e au kia koe, mo e fano a koe ke he haku tau puhala, mo e eke e koe e tau mena tonu ki mua haku, ke omaoma ke he haku tau fakatufono mo e haku a tau poaki, tuga ne eke he fekafekau haku ko Tavita; ti ha ha i ai au mo koe ti eke e au māu e magafaoa tumau, tuga ne eke ai e au ma Tavita, to foaki atu foki e au a Isaraela kia koe.
39 To fakamamahi foki e au e fanau a Tavita ha ko e mena nai ka e nakai hoko ke he tukulagi.
40 Ti kolo ai e Solomona ke tamate a Ierepoamo, Ti matike a Ierepoamo mo e hola atu ai ki Aikupito kia Sisaka ko e patuiki a Aikupito; ti ha i ai a ia i Aikupito ato mate a Solomona.
41 Ko e tau mena ne toe ne eke e Solomona, mo e tau mena oti ne taute e ia, mo e hana iloilo, nakai kia tohi ia ke he tohi ne tohi ai e tau mena oti ne eke e Solomona?
42 Ko e tau tau ne eke ai a Solomona mo patuiki kia Isaraela oti i Ierusalema ne fagofulu ia e tau.
43 Ti takoto ai a Solomona fakalataha mo e hana tau matua ti tanu e lautolu a ia ke he maga a Tavita hana matua; ti eke e tama tane hana ko Rehopoamo mo patuiki ke hukui aki a ia.