1 Tau Patuiki 13:1-34
13 TI, kitiala, kua hau ai e tagata he Atua, i Iuta ki Peteli he finagalo a Iehova; kua tu ai foki a Ierepoamo ke he tapa he fatapoa ke huhunu ai e mena manogi.
2 Ti ui atu a ia ke he fatapoa, ke he finagalo a Iehova, kua pehe atu a ia, Ko e fatapoa na e, ko e fatapoa na e, kua vagahau mai pehe a Iehova, Kitiala, to fanau mai e tama he magafaoa a Tavita ko Iosia hana higoa, ti eke poa ai e ia ki luga hau ke he tau ekepoa he tau mena tokoluga, kua huhunu ai e tau mena manogi ki luga hau, to huhunu ai foki e ia e tau hui atua he tau tagata ki luga ia koe.
3 Ti ta age ai e ia e fakamailoga ke he aho ia, kua pehe age, Ko e fakamailoga hanai, kua vagahau mai ai e Iehova; kitiala to maihi ai e fatapoa, ti maligi ai e tau efuefu afi ha ha i luga hana.
4 Kua logona he patuiki e kupu he tagata he Atua, ne ui atu ai e ia ke he fatapoa i Peteli, ti fakaolo age e Ierepoamo hana lima mai he fatapoa kua pehe age, Kia tapaki a e mutolu a ia; ti mate ai hana lima ne fakaolo age e ia kia ia, kua nakai maeke ke liuaki mai kia ia.
5 Ti hehe ai e fatapoa, ti maligi ai e tau efuefu afi mai he fatapoa, ke lata mo e fakamailoga ne foaki atu ai he tagata he Atua ke lata mo e kupu a Iehova.
6 Ti tali age ai e patuiki, kua pehe age ke he tagata he Atua, Kia ole atu ā ki mua a Iehova hāu a Atua, mo e liogi atu e koe maku ke liu mitaki ai haku a lima. Ti ole atu ai e tagata he Atua ki mua a Iehova, ti liu mitaki ai e lima he patuiki, tuga ni fakamua.
7 Ti pehe age e patuiki ke he tagata he Atua, Hau ke o a taua mo au ke he fale haku, ke okioki ai, to ta atu foki e au e mena fakaalofa kia koe.
8 Ti pehe age e tagata he Atua ke he patuiki, Kaeke ke ta mai e koe e maga ne veveheua aki e tau mena ha ha he fale hāu, nakai ni o a taua mo koe, ti nakai kai mena ai au, ti nakai inu ai au e maga vai ke he mena nai;
9 Ha kua poaki mai ai pihia kia au ke he kupu a Iehova, kua pehe mai, Aua neke kai mena ai a koe, ti ua inu ai foki a koe ha maga vai, ti ua liu mai a koe ke he puhala ne fina atu ai a koe.
10 Ti fano ai a ia ke he taha puhala, nakai liu atu a ia ke he puhala ne hau ai a ia ki Peteli.
11 Ne nofo i Peteli taha perofeta ko e fuakau, ti o age hana tau tama tane mo e tala age kia ia e tau mena oti ne eke he tagata he Atua i Peteli ke he aho ia; ko e tau kupu foki ne vagahau ai e ia ke he patuiki, kua tala age ai e lautolu ke he matua ha lautolu.
12 Ti pehe age ha lautolu a matua kia lautolu, Ko e puhala fe ne fano ai a ia; Ko e mena kitia he tau tama tane hana e puhala ne fano ai e tagata he Atua ne hau i Iuta.
13 Ti pehe age a ia ke he hana tau tama tane, Kia fakanofoa e mutolu e asini māku; ti fakanofoa e lautolu e asini māna; ti heke ai e ia.
14 Ti mui age ai a ia ke he tagata he Atua, ti moua e ia a ia kua nofo ai a ia ki lalo he akau ko e tapeneto; ti pehe age a ia kia ia, Ko koe kia e tagata he Atua ne hau i Iuta? Ti pehe age a ia, ko au hanai.
15 Ti pehe age a ia kia ia, Hau ke o a taua mo au ke he fale haku, ke taumafa mena ai a koe.
16 Ti pehe age a ia, Nakai maeke kia au ke liu atu mo koe, mo e hu atu mo koe ke he fale hau, ti nakai kai mena ai au, ti nakai inu ai au ha maga vai fakalataha mo koe ke he mena nai;
17 Ha kua pehe mai e kupu a Iehova kia au, Aua neke kai mena ai a koe, ti ua inu ai a koe ha maga vai ke he mena ia; ti ua liu mai a koe ke he puhala ne fina atu ai a koe.
18 Ti pehe age ai a ia, Ko e perofeta foki au tuga na koe; kua vagahau mai foki e agelu kia au ke he finagalo a Iehova, kua pehe mai, Kia liuaki mai e koe a ia fakalataha mo koe ke he fale hau, ke kai mena ai a ia, mo e inu ai a ia e maga vai. Ka e pikopiko a ia kia ia.
19 Ti liliu age ai a laua mo ia, kua kai mena ai foki a ia ke he hana fale, mo e inu ai a ia e maga vai.
20 Kua nonofo a laua ke he laulau ti hoko mai ai e kupu a Iehova ke he perofeta ne liuaki mai a ia.
21 Ti ui atu a ia ke he tagata he Atua ne hau i Iuta, kua pehe atu, Kua vagahau mai pehe a Iehova, Kua totoko atu a koe ke he poaki ne poaki mai ai e Iehova hau a Atua kia koe,
22 Ka kua liu mai a koe, mo e kai mena ai a koe, mo e inu ai a koe e maga vai ke he mena ne pehe mai ai a Iehova kia koe, aua neke kai mena ai a koe, ti ua inu ai a koe e maga vai, ko e mena ia nakai hoko ai hau a tino ke he tukuaga he hau a tau matua.
23 Kua oti he kai mena ai a ia kua oti foki he inu a ia, ti fakanofoa e ia e asini māna, ma e perofeta ne liuaki mai e ia.
24 Kua fano a ia, ti moua ai he leona a ia ke he puhala, ti tamate e ia a ia, ti liti hifo ai hana tino ke he puhala, ti tu tata age ki ai e asini, kua tu ai foki e leona ke he tapa he tino.
25 Kitiala, ko e tau tagata ne o age, ne kitia e lautolu e tino kua liti hifo ke he puhala, mo e leona kua tu ai ke he tapa he tino, ti o mai a lautolu mo e talahau ai ke he maga ne nofo ai e perofeta fuakau.
26 Kua logona ai he perofeta ne liu aki mai a ia he puhala, ti pehe age a ia, Ko e tagata he Atua haia, ne totoko a ia ke he finagalo a Iehova; ko e mena ia kua tuku atu ai e Iehova a ia ke he leona, kua hehe e ia a ia kua tamate e ia a ia, ke lata mo e kupu a Iehova ne vagahau mai e ia kia ia.
27 Ti vagahau a ia ke he hana tau tama tane, kua pehe age, Kia fakanofoa e mutolu e asini maku. Ti fakanofoa ai e lautolu.
28 Kua fano a ia, ti moua ai e ia hana tino kua liti hifo ke he puhala, ko e asini foki mo e leona kua tutu tata age ke he tino; nakai kai e leona e tino, ti nakai hehe e ia e asini.
29 Ti uta ai he perofeta e tino he tagata he Atua, mo e fakaheke ai i luga he asini, mo e liuaki mai ai e ia; ti hau ai e perofeta fuakau ke he maga ke tagi tatuki ai mo e tanu e ia a ia.
30 Ti tuku e ia hana tino ke he tukuaga ni hana; ti tagi tatuki ai a lautolu kia ia kua pehe age, Oi te fakaalofa haku matakainaga na e!
31 Kua oti he tanu e ia a ia, ti tala age a ia ke he hana tau tama tane, kua pehe age, Ka mate au, ti tanu e mutolu au ke he tukuaga kua tanu ai e tagata he Atua, kia tuku e mutolu haku tau hui atua ke he tapa he hana tau hui atua;
32 Ha ko e mena to hoko ni e kupu ne ui age ai a ia ke he finagalo a Iehova ke he fatapoa ha ha i Peteli, mo e tau fale oti he tau mena tokoluga ke he tau maga i Samaria.
33 Kua mole atu e tau mena na nakai liu kehe a Ierepoamo mo e hana mahani kelea, ka e eke foki e ia e tau tagata mai he motu oti mo tau ekepoa he tau mena tokoluga; ko e tagata ne manako a ia ki ai ne kotofa ai a ia, ke eke mo tau ekepoa he tau mena tokoluga.
34 Ti eke e mena na mo hala ke he magafaoa a Ierepoamo ke vevehe kehe ai a lautolu mo e fakaotioti a lautolu mai he fuga kelekele.