1 Tau Patuiki 14:1-31
14 KO e vaha ia ne gagao ai a Avia ko e tama tane a Ierepoamo.
2 Ti pehe age a Ierepoamo ke he hoana hana, Matike a, ti tapulu ai a koe ke he tau tapulu kehe, ke aua neke iloa e lautolu ko koe ko e hoana a Ierepoamo, ti fano a a koe ki Sailo; Kitiala, ne ha i ai e perofeta ko Akia, ko ia ne vagahau mai kia au ke eke au mo patuiki he motu nai.
3 Kia uta foki e koe ke he lima hau hogofulu e areto, mo e tau areto lapalapa, mo e lupo meli, ti fano a koe kia ia; to tala mai e ia kia koe, po ke heigoa e mena ke hoko ke he tama.
4 Ti eke ai pihia he hoana a Ierepoamo, ti matike a ia mo e fano ki Sailo, ti hoko a ia ke he fale a Akia. Ka e nakai maeke kia Akia ke kitia ha mena, ha kua pouli tuai hana tau mata he motua a ia.
5 Ti pehe mai a Iehova kia Akia, Kitiala, kua hau e hoana a Ierepoamo ke huhu atu kia koe e tau mena ke he tama tane hana, ha kua gagao a ia; kia vagahau atu a koe kia ia ke lata mo e mena nai mo e mena nai; ha ko e mena ka hoko mai a ia to fakatupua ai ko e fifine kehe a ia.
6 Kua logona atu e Akia e pohū mai he hana tau hui he hu mai a ia he gutuhala, ti pehe atu ai a ia, Kia haele mai a koe ko e tokoua a Ierepoamo na e; ko e ha ne fakatupua ai ko e fifine kehe a koe? Kua fakafano atu foki au kia koe mo e tau kupu mamafa.
7 Kia fano a koe, ti pehe age a koe kia Ierepoamo, Kua vagahau mai pehe a Iehova ko e Atua a Isaraela, Kua ta hake e au a koe mai he motu, mo e eke e au a koe mo takitaki he haku motu ko Isaraela.
8 Mo e hēhē kehe e au e kautu he magafaoa a Tavita, mo e ta atu ai e au kia koe; ka ko koe, nakai tuga haku a fekafekau ko Tavita, ne omaoma ai ke he haku a tau poaki, mo e mui mai a ia kia au, mo e hana loto katoa, ke eke e tau mena tonu hokoia ki mua haku;
9 Ka kua homo atu a koe he mahani kelea kia lautolu oti ne mumua atu kia koe; ha kua fano a koe mo e eke māu e tau atua kehe, mo e tau tupua lapatoa, ke fakahogohogomanava mai kia au, kua liti foki e koe au ki tua hau.
10 Ko e mena ia, kitiala, to fakahoko atu e au e kelea ke he magafaoa a Ierepoamo, ti fakaoti e au e tau tama tane oti a Ierepoamo, ko e tau tupa katoa mo e tau tagata tokanoa i Isaraela; to uta kehe e au a lautolu kua toe he magafaoa a Ierepoamo, tuga ne aau he tagata e otaota ato oti ni.
11 Ko e tagata he magafaoa a Ierepoamo ke mate ai ke he maga to kai he tau kuli a ia, ko ia ke mate ke he vao to kai ai he tau manu lele he pulagi; ha kua pihia mai ai a Iehova.
12 Ka ko koe, kia matike a koe mo e fano ke he fale hau; ka hoko atu hau a tau ve ke he maga ti mate ai e tama.
13 To tagi tatuki ai a Isaraela oti ha ko ia, mo e tanu e lautolu a ia; ha ko ia ni hokoia he magafaoa a Ierepoamo ke hoko atu ke he tukuaga; ha ko ia ni he magafaoa a Ierepoamo kua moua ai e mena mitaki kia Iehova ko e Atua a Isaraela.
14 To fakatu foki e Iehova e patuiki mana i Isaraela, to fakaoti ai e ia e magafaoa a Ierepoamo ke he aho ia. Ko e heigoa foki? ko e vaha nai ni.
15 Ha ko e mena to ta e Iehova a Isaraela, tuga ne lulululu ai e kaho ke he vai; to taaki foki e ia a Isaraela mai he motu mitaki nai ne foaki mai e ia ke he tau matua ha lautolu; ti fakamavehevehe e ia a lautolu ke he fahi atu he vailele, ha kua eke e lautolu ha lautolu a tau tupua Asaira, kua fakahogohogomanava ai a lautolu kia Iehova.
16 To tiaki foki e ia a Isaraela ha ko e tau hala a Ierepoamo, ko ia ne hala, ko ia foki ne hala ai a Isaraela.
17 Ti matike ai e hoana a Ierepoamo mo e fano; kua hoko foki a ia ki Tiresa; ha ne hu atu a ia ke he gutuhala he fale ti mate ai e tama.
18 Kua tanu e lautolu a ia ti tagi tatuki a Isaraela oti kia ia, ke lata mo e kupu a Iehova ne vagahau mai ai e ia ke he hana fekafekau ko Akia ko e perofeta.
19 Ko e tau mena ne toe ne eke e Ierepoamo, ko e tau tau ne tau ai a ia, mo e tau mena ne eke e ia he patuiki ai a ia, kitiala kua tohi, ke he tohi ne tohi ai e tau tala ke he nofoaga he tau patuiki a Isaraela.
20 Ko e tau aho foki ne patuiki ai a Ierepoamo ko e uafulu ma ua e tau; ti takoto ai a ia fakalataha mo e hana tau matua; ti eke a Natapu hana tama mo patuiki ke hukuiaki a ia.
21 Kua eke a Rehopoamo ko e tama a Solomona mo patuiki i Iuta; ne fagofulu ma taha e tau tau a Rehopoamo he eke ai a ia mo patuiki; ti hogofulu ma fitu e tau ne nofo a ia mo patuiki i Ierusalema, ko e maga ia ne fifili ai e Iehova mai he tau magafaoa oti a Isaraela ke tuku ai hana higoa. Ko e higoa foki he hana matua fifine ko Naama haia ko e fifine Amoni.
22 Kua eke e Iuta e tau mahani kelea ki mua a Iehova, kua fakatupu ai e lautolu hana a ita tafua ke he tau hala ha lautolu kua mua ue atu ni e tau hala ha lautolu ke he tau mena oti ne eke he tau matua ha lautolu.
23 Ha kua eke e lautolu ma lautolu e tau mena tokoluga, mo e tau tupua, mo e tau tupua Asaira; ki luga he tau mouga tokoluga oti, mo i lalo he tau akau lau uhiuhi oti.
24 Ti ha i ai foki ke he motu e tau tagata mahani Sotoma; kua eke e lautolu ke lata mo e tau mahani fakalialia oti he tau motu kehe ne vega e Iehova ki mua he fanau a Isaraela.
25 Ko e tau lima tali he eke a Rehopoamo mo patuiki, ti hake ai a Sisaka ko e patuiki a Aikupito ki Ierusalema ke tau.
26 Ti uta ai e ia e tau koloa ha ha he fale a Iehova, mo e tau koloa ke he fale he patuiki; kua uta e ia e tau mena oti ni; kua uta foki e ia e tau akau punuti auro oti ne eke e Solomona.
27 Ti eke ai he patuiki ko Rehopoamo e tau akau punuti apa kula ke totogi aki; ti tuku atu ai e ia ke he tau takitaki he kau leoleo, ko lautolu ne leoleo e gutuhala he fale he patuiki.
28 Ka fano foki e patuiki ke he fale a Iehova ti uta ai he kau leoleo e tau akau punuti, ti liuaki mai ai e lautolu ke he poko he kau leoleo.
29 Ko e tau mena ne toe ne eke e Rehopoamo, mo e tau mena oti ne eke e ia, nakai kia tohi ai ke he tohi he tau tala ke he nofoaga he tau patuiki a Iuta?
30 Ne tau a Rehopoamo mo Ierepoamo ke he tau aho oti.
31 Kua takoto a Rehopoamo fakalataha mo e hana tau matua ti tanu ai a ia fakalataha mo e hana tau matua ke he maga a Tavita. Ko e higoa foki he hana matua fifine ko Naama ko e fifine Amoni. Ti eke e tama hana ko Aviama mo patuiki ke hukui aki a ia.