1 Tau Patuiki 17:1-24
17 KUA pehe age a Elia ko e Tisepi, ne ha i ai a ia mo lautolu ne nonofo i Kiliata, kia Ahapo, Kua moui a Iehova ko e Atua a Isaraela, ko ia kua tu ai au ki mua hana, to nakai fai hahau, to nakai fai uha ke he tau tau nai ka e lata ni mo e mena kua tala atu ai e au.
2 Kua hoko foki e kupu a Iehova kia ia, kua pehe mai,
3 Kia fano a a koe he mena nai, mo e liu atu a koe ke he fahi atu, ti fakamumuli ai a koe ke he tapa he vailele ko Kerita, ne fehagai mo Ioritana.
4 Ti inu ai a koe ke he vailele; kua pehe atu foki au ke he tau oreva ke fagai e lautolu a koe ke he mena ia.
5 Ti fano ai a ia, mo e eke e ia tuga ne kupu a Iehova; kua fano a ia mo e nofo ke he tapa he vailele ko Kerita, ne fehagai mo Ioritana.
6 Ti ta age he tau oreva kia ia e areto mo e maga kakano ke he magaaho pogipogi; ko e areto foki mo e maga kakano ke he magaaho afiafi; kua inu foki a ia ke he vailele.
7 Kua mole atu falu a aho ti mamiti ai e vailele he nakai ni fai uha ke he motu.
8 Ti hoko mai ai e kupu a Iehova kia ia, kua pehe mai,
9 Matike a, mo e fano a koe ki Sarefata ko e mago a Saitonu, mo e nofo ai a koe; kitiala, kua poaki atu e au ke he fifine takape ke he mena ia ke fagai ai a koe.
10 Ti matike a ia mo e fano ki Sarefata; kua hoko a ia ke he gutuhala he maga, kitiala, ha ha i ai e fifine takape, kua fai gaafi; ti ui atu a ia kia ia, kua pehe atu, Ta mai la e koe e maga vai tote ke he kapiniu, kou inu.
11 Kua fano a ia ke ta mai, ti ui atu foki a ia kia ia, kua pehe atu, Ta mai e koe ke he lima hāu e maga areto tote maku,
12 Ti pehe mai a ia, Kua moui a Iehova hāu a Atua, nakai fai areto pukupuku au; ka ko e puke aloalolima he falaoa ke he paelo, mo e maga puke lolo tote ke he lupo; kitiala, kua oko e au ua e gaafi, ke fano ai au, mo e tunu ai ma maua mo e haku a tama tane, ke kai ai e maua, ti mamate ni a maua.
13 Ti pehe atu a Elia kia ia, Ua matakutaku a koe; fano a, ti eke e koe e mena ne tala mai ai e koe; ka e taute ai fakamua e koe taha areto pukupuku tote maku, mo e ta mai ai e koe kia au; ka mole ia ti taute ai e koe ma mua mo e hau a tama tane.
14 Ha kua talahau mai pehe a Iehova ko e Atua a Isaraela, Nakai oti e paelo falaoa, to nakai fakatote ai e puke lolo ke he lupo, ato hoko ke he aho ke foaki mai ai e Iehova e uha ke he kelekele.
15 Ti fano ai a ia, mo e eke e ia ke lata mo e kupu a Elia; kua kai ai e lautolu, ko ia, mo Elia, mo e hana magafaoa, ke he tau aho loga.
16 Nakai oti e falaoa ke he paelo, ti nakai fakatote ai e puke lolo ke he lupo, ke lata mo e kupu a Iehova ne talahau mai ai e Elia.
17 Kua mole atu e tau mena ia ti gagao ai e tama tane he fifine, ko e patu fifine he kaina; kua lahi mahaki ni hana gagao, ti fakahiku ai hana fafagu.
18 Ti pehe mai a ia kia Elia, Ko e tagata he Atua na e, ko e heigoa kia hāu kia au? Kua haele mai kia a koe ke fakamanatu mai kia au haku a mahani kelea, mo e tamate ai haku tama?
19 Ti pehe atu a ia kia ia, Kia ta mai e koe e tama hau kia au; ti uta e ia a ia mai he fatafata hana, ti ta hake e ia a ia ke he poko ne nofo ai a ia, ti fakatakoto e ia a ia ke he hana moheaga.
20 Ti ui ai a ia kia Iehova, kua pehe atu, Iehova na e, haku Atua na e, kua fakahoko kia e koe e kelea ke he fifine takape kua api ai au, he tamate ai e koe hana tama;
21 Ti fakafohifo lagatolu a ia ki luga he tama, mo e ui atu ai e ia kia Iehova, kua pehe atu, Iehova na e, haku Atua na e, kia liu aki mai e koe e agaga he tama nai ki loto ia ia.
22 Ti fanogonogo mai a Iehova ke he leo a Elia; ti liu mai ai e agaga he tama ki loto ia ia, ti moui ai a ia.
23 Ti toto ai e Elia e tama, mo e ta hifo a ia mai he poko ke he fale ti ta atu e ia a ia ke he hana matua fifine; ti pehe atu a Elia kia ia, Kikite mai la, kua moui hau a tama.
24 Ti pehe mai ai e fifine kia Elia, Hanai, kua iloa e au e mena nai ko e tagata he Atua a koe; ko e kupu a Iehova foki kua to mai ai he fofoga hau ko e moli haia.