1 Tau Patuiki 18:1-46
18 KUA mole atu e tau aho loga ti hoko mai ai e kupu a Iehova kia Elia ke he tau tolu, kua pehe mai, Kia fano a koe mo e fakakite a koe kia Ahapo, to fakato foki e au e uha ke he kelekele.
2 Ti fano ai a Elia ke fakakite a ia kia Ahapo; ti lahi mahaki e hoge i Samaria.
3 Ti ui age e Ahapo kia Opetaia ko e tagata ne pule ke he hana magafaoa. (Ne matakutaku lahi a Opetaia kia Iehova;
4 Ha kua keli e Iesepela e tau perofeta a Iehova, ti uta ai e Opetaia e tau perofeta tokoteau, mo e fufu ai e ia a lautolu ke takilimagofulu ke he ana, ti fagai ai e ia a lautolu ke he tau areto mo e magavai).
5 Kua pehe age a Ahapo kia Opetaia, Kia fano a a koe ke he motu, ke he tau vaipuna oti, katoa foki mo e tau vailele oti; po ke moua nakai e tautolu e motie ke fakamoui ai e tau solofanua, mo e tau falata, ke aua neke moumou ai e tau manu oti.
6 Ti veveheua ai e laua e motu ke o fano ai a laua; ne fano a Ahapo tokotaha ke he taha puhala, ka e fano a Opetaia tokotaha ke he taha puhala.
7 Ha ha i ai a Opetaia ke he puhala, ti kitiala ne feleveia ai a laua mo Elia; kua iloa e ia a ia, ti fakaveli fakafohifo ai a ia, kua pehe mai, Ko koe kia ma iki na e ko Elia;
8 Ti pehe atu a ia, Ko au ni haia. Fano a a koe mo e pehe atu a koe ke he iki hau, Kitiala, ko Elia hanai.
9 Ti pehe mai a ia, Ko e heigoa kia e mena kua hala ai au, kia tuku atu e koe hau a fekafekau ke he lima a Ahapo, ke tamate e ia au?
10 Kua moui a Iehova hau a Atua, nakai fai motu ti nakai fai kautu kua nakai fakafano atu ki ai haku a iki ke kumi a koe; ka pehe mai a lautolu, Nakai ha i ai a ia, ti omonuo ai a ia ke he motu ia mo e kautu ia, kua nakai moua ai e lautolu a koe.
11 Ko e hanai, kua pehe mai a koe, Fano a a koe mo e tala age a koe ke he iki hāu, Kitiala, ko Elia hanai.
12 Ka ko e mena ka fano kehe au ia koe, ti uta ai a koe he Agaga a Iehova ke he mena nakai kitia e au; ka fina age au, mo e tala age kia Ahapo, ka nakai moua mai e ia a koe, ti kelipopo e ia au, ka kua matakutaku hau a fekafekau kia Iehova tali mai haku a vaha tote.
13 Nakai kia tala atu ke he haku iki e mena ne eke e au, he kelipopo ai a Iesepela e tau perofeta a Iehova; ne fufu e au e tau perofeta a Iehova, ko e tau tagata toko teau, ne taki tokolimagofulu ke he ana, ti fagai ai e au a lautolu ke he areto mo e maga vai?
14 Hanai foki, kua pehe mai a koe, Fano ā koe, mo e pehe age a koe ke he hau a iki, Kitiala, ko Elia hanai; ti kelipopo ai e ia au.
15 Ti pehe atu ai a Elia, Kua moui a Iehova Sapaota, ko ia kua tu ai au ki mua hana, to fakakite atu ni au kia ia ke he aho nai.
16 Ti fano ai a Opetaia ke feleveia mo Ahapo, mo e tala age kia ia; ti hau ai a Ahapo ke fefeveia mo Elia.
17 Kua kitia atu e Ahapo a Elia, ti pehe atu ai a Ahapo kia ia, Ko koe kia hanā, ko e tagata kua fakalavelave kia Isaraela?
18 Ti pehe mai a ia, Nakai ko au kua fakalavelave kia Isaraela ka ko koe mo e magafaoa he hau a matua; ha kua tiaki e mutolu e tau poaki a Iehova, mo e mumui atu a mutolu kia Paala.
19 Hanai, kia fakafano atu e koe, mo e fakapotopoto mai ai kia au ke he mouga ko Karamelu a Isaraela oti, mo e tau perofeta a Paala ne fa e teau ti limagofulu, mo e tau perofeta a Asaira ne fa e teau, ko lautolu kua kai mena ke he laulau a Iesepela.
20 Ti fakafano atu ai e Ahapo ke he fanau oti a Isaraela, kua fakapotopoto foki e ia e tau perofeta ke he mouga ko Karamelu.
21 Ti fakatata atu a Elia ke he motu oti, ti pehe atu a ia, To fakauaua a mutolu mo e loto ua ato a fe? Kaeke ko e Atua a Iehova, kia mumui atu a a mutolu kia ia; ka ko e mena kaeke ko Paala, kia mumui atu a a mutolu kia ia. Ka e nakai tali mai ai he motu ha kupu kia ia.
22 Ti pehe atu a Elia ke he motu, Ko au hoko au ni kua toe ko e perofeta a Iehova; ka ko e tau perofeta a Paala ko e toko fa e teau ti limagofulu a lautolu.
23 Kia ta mai e lautolu kia mautolu ua e povi; ti fifili ai e lautolu taha povi ma lautolu, mo e helehele ai e lautolu, ti tuku ai e lautolu ki luga he tau gaafi, ka e ua tuku ai e lautolu e afi; to taute foki e au taha povi, mo e tuku ai ki luga he tau gaafi, ka e nakai tuku ai e au e afi.
24 Ti ui atu ai e mutolu ke he higoa he atua ha mutolu; to ui atu foki e au ke he higoa a Iehova. Ko e Atua ke tali mai ai ke he afi ko e Atua haia. Ti tali mai ai he motu oti, kua pehe mai, Kua mitaki e kupu hau.
25 Ti pehe age a Elia ke he tau perofeta a Paala, Kia fifili la e povi ma mutolu, ti taute mua ai e mutolu, ha kua tokologa a mutolu; kia ui atu foki e mutolu ke he higoa he atua ha mutolu ka e aua neke tuku ai e mutolu e afi.
26 Ti uta e lautolu e povi kua tuku atu kia lautolu, ti taute ai e lautolu, ti ui age e lautolu ke he higoa a Paala, ne kamata ke he magaaho pogipogi ti hoko atu ke he tupou la, kua pehe age, Paala na e, kia fanogonogo mai ā kia mautolu. Ka e nakai ni fai leo, ti nakai tali mai ai e taha. Ti hohopo ai a lautolu ke he fatapoa ne eke e lautolu.
27 Kua hoko ke he tupou la ti va a Elia kia lautolu, kua pehe age, Kia tauui age a mo e leo lahi; ha ko e atua a ia; na kua manamanatu a ia, po ke fano kehe a ia, po ke fano fenoga a ia, po ke mohe a ia ti lata ke fafagu a ia.
28 Ti tauui age a lautolu mo e leo lahi, mo e helehele e lautolu a lautolu ke he tau titipi mo e tau huki tuga ne mahani ha lautolu, ato liligi hifo ai e toto kia lautolu.
29 Kua mole e tupou la, ti perofeta ai e lautolu ke hoko ke he magaaho ne fa eke ai e poa afiafi, ka e nakai fai leo, ti nakai tali mai ai e taha, po ke hagao mai.
30 Ti pehe age a Elia ke he motu oti, Kia fakatata mai a a mutolu kia au. Ti fakatata age ai e motu oti kia ia, ti taute ai e ia e fatapoa a Iehova kua maona.
31 Ti uta e Elia hogofulu ma ua e maka ke lata mo e totouaga he tau magafaoa he tau tama a Iakopo, ne hoko kia ia e kupu a Iehova, kua pehe age, To ui ai hāu a higoa ko Isaraela.
32 Ti ati ai e ia ke he tau maka ia e fatapoa ke he higoa a Iehova; ne eke foki e ia e luo ke takai aki e fatapoa; ko e hana lahi kua lata ia mo ua e sea ka fafati.
33 Ti fakaafu ai e ia e tau gaafi, ti helehele ai e ia e povi, mo e tuku ai ki luga he tau gaafi. Ti pehe age a ia, Kia fakapuke mai ā e tau paelo ne fa ke he maga vai, mo e liligi ai ki luga he poa huhunu, ki luga foki he tau gaafi.
34 Ti pehe age a ia, Kia eke foki la ke lagaua. Ti eke ai e lautolu, ko e lagaua ia. Ti pehe age a ia, Kia eke foki la ke lagatolu. Ti eke ai e lautolu, ko e lagatolu haia.
35 Ti tafe takai ai e vai ke he fatapoa; ne puke foki e luo ke he vai.
36 Kua hoko ke he magaaho ne fa eke ai e poa afiafi, ti fakatata ai a E ia ko e perofeta, kua pehe age, Iehova na e, ko e Atua a Aperahamo, mo Isaako, mo Isaraela, kia fakailoa mai e koe ke he aho nai, ko koe ko e Atua a Isaraela, ko au foki ko e hau a fekafekau, kua eke foki e au e tau mena oti ke lata mo e hau a kupu.
37 Kia fanogonogo mai a koe kia au, Iehova na e, kia fanogonogo mai ā kia au, kia iloa ai e motu nai ko koe ko Iehova ko e Atua, ti kua liuaki mai ai e koe ha lautolu a tau loto.
38 Ti to hifo ai e afi a Iehova, mo e fakaoti ai e poa huhunu, mo e tau gaafi, mo e tau maka, mo e kelekele kua mamiti ai foki e vai ke he luo.
39 Kua kitia he motu oti, ti fakaveveli fakafohifo ai a lautolu, kua pehe age, ko Iehova ko e Atua a ia; ko Iehova, ko e Atua a ia!
40 Ti pehe age ai a Elia kia lautolu, Kia tapaki a e mutolu e tau perofeta a Paala; aua neke hola taha ha lautolu. Ti tapatapaki ai e lautolu a lautolu; ti ta hifo e Elia a lautolu ke he vailele ko Kisona, mo e kelipopo ai e ia a lautolu ke he mena ia.
41 Ti pehe age a Elia kia Ahapo, Kia haele hake a a koe, kia taumafa ā koe mo e inu; ha ko e hoko mai ne fai e go he uha lahi.
42 Ti hake ai a Ahapo ke kai mo e inu; kua hake foki a Elia ke he tapunu a Karamelu, ti hifo ai a ia ke he kelekele, mo e tuku ai a ia hana mata ke he vaha he hana tau tulihui.
43 Ti pehe age a ia ke he hana fekafekau, Kia hake ā koe mo e kitekite, ti pehe age a ia, Nakai ha i ai ha mena. Ti pehe age a ia, Liu atu ā lagafitu.
44 Kua hoko ke he lagafitu, ti pehe age a ia, Kitiala, kua hake mai he tahi e aolu tote tuga ne aloalolima he tagata. Ti pehe age ai a ia, Kia hake a, mo e pehe age a koe kia Ahapo, Kia taute ā hau a nofoa fakataveli mo e haele hifo a koe, neke lekua a koe he uha.
45 Ha ne eke e tau mena ia ti malumalu hifo e lagi ke he tau aolu mo e havili; ti uha lahi ni. Ti heke ai a Ahapo e nofoa fakataveli mo e fano a ia ki Isereelu.
46 Ti ha ia Elia e lima a Iehova; ti pipi ai e ia hana tokupu, mo e poi a ia ki mua a Ahapo, kua hoko ke he mena ne fina atu ai ki Isereelu.