1 Tau Patuiki 19:1-21
19 KUA tala age e Ahapo kia Iesepela e tau mena oti ne eke e Elia, katoa oti mo e keli ai e ia e tau perofeta oti he pelu.
2 Ti fakafano atu ai e Iesepela e tau fekau kia Elia, kua pehe atu, Kia eke pihia he tau atua kia au mo e lafilafi ki ai, kaeke ke nakai fakatatai e au e moui hāu mo e moui ha lautolu, ke he magaaho pehenai a pogipogi.
3 Kua kitia ai e ia ti matike a ia mo e fano ke moui ai, kua hoko a ia ki Peresepa i Iuta, ti toka ai e ia hana fekafekau ke he mena ia.
4 Ka e fano a ia ke he tutakale ko e fenoga ke lata mo e aho taha, ti fano a ia mo e nofo ki lalo he akau ko e ratami; ti ole atu a ia ke mate a ia, kua pehe atu, Iehova na e, tokai; kia uta kehe e koe haku a moui, ha kua nakai mua haku a mahani mitaki ke he haku a tau matua.
5 Kua takoto a ia mo e mohe i lalo he ratami, ti, kitiala ko e agelu kua piki kia ia, mo e pehe mai kia ia, Kia matike a a koe, ti kai.
6 Ti kitekite atu a ia, kitiala, ha he tapa he ulu hana e areto pukupuku kua tunu ke he tau maka kakā, mo e lupo ne puke ke he maga vai. Ti kai ai e ia mo e inu; ti liu takoto ai a ia.
7 Ti liu mai ai e agelu a Iehova, ko e lagaua ia, mo e piki kia ia, mo e pehe mai, Kia matike a a koe, ti kai, ha kua mamao ni e puhala ke fano ai a koe.
8 Ti matike a ia, kua kai a ia mo e inu; ti fano ai a ia ke he malolo he tau mena ne kai ke he fagofulu e aho ti fagofulu e po kua hoko ni ki Horepa ko e mouga he Atua.
9 Kua hoko a ia ki ai ke he ana, ti nofo ai a ia; ti kitiala, kua hoko mai kia ia e kupu a Iehova, kua pehe mai kia ia, Elia na e, ko e eke ha a koe ke he mena na?
10 Ti pehe atu a ia, Kua fakamalolo ni au ha ko Iehova ko e Atua a Sapaota, ha kua tiaki he fanau a Isaraela hāu a maveheaga, kua ulu ki lalo e lautolu hau a tau fatapoa, kua kelipopo foki e lautolu hau a tau perofeta ke he pelu, kua toe ni au hoko au; kua kumi foki e lautolu au ke tamate.
11 Ti pehe mai a ia, Kia hu atu a a koe ki fafo, mo e tu a koe ke he mouga ki mua a Iehova. Kitiala, kua haele age ai a Iehova, ko e matagi lahi foki mo e malolo ne ulu ai e tau mouga, mo e lipilipi ai e tau kaumaka ki mua a Iehova; ka e nakai ha i ai a Iehova ke he matagi; kua mole atu e matagi, ko e mafuike; ka e nakai ha i ai a Iehova ke he mafuike;
12 Kua mole atu e mafuike, ko e afi, ka e nakai ha i ai a Iehova ke he afi; kua mole atu e afi ko e leo tote ne vagahau mai fakatekiteki.
13 Kua logona ai e Elia, ti ufiufi e ia hana mata ke he hana tapulu lahi, ti hu atu a ia ki fafo, mo e tu ai a ia ke he gutu ana; kitiala, kua hoko mai kia ia e leo kua pehe mai, Elia na e ko e eke ha a koe ke he mena na?
14 Ti pehe atu ai a ia, Kua fakamalolo ni au ha ko Iehova ko e Atua a Sapaota; ha kua tiaki he fanau a Isaraela hau a maveheaga, kua ulu ki lalo e lautolu hau a tau fatapoa, kua kelipopo foki e lautolu hau a tau perofeta ke he pelu, kua toe ni au hoko au, kua kumi foki e lautolu au ke tamate.
15 Ti pehe mai a Iehova kia ia, Kia fano a a koe, mo e liu atu a ke he hau a puhala ke he tutakale ki Tamaseko; ka hoko foki a koe ki ai, ti fakauku ai e koe a Hasaelu ke eke mo patuiki a Suria;
16 Mo Iehu ko e tama a Nimesi, to fakauku ai e koe ke eke mo patuiki a Isaraela; mo Elisaio ko e tama a Safata i Apela-mehola to fakauku ai e koe ke eke mo perofeta ke hukuiaki a koe.
17 Ko ia ke hao mai he pelu a Hasaeli, to keli ai e Iehu; ko ia ke hao mai he pelu a Iehu to keli ai e Elisaio.
18 Ka kua toka e au maku i Isaraela, toko fitu e afe, ko lautolu oti kua nakai fakatokotui kia Paala, ko lautolu oti foki kua nakai figita kia ia.
19 Ti fano ai a ia he mena ia; to moua e ia a Elisaio ko e tama a Safata, ha ne keli ai e ia e kelekele mo e hogofulu ma ua e povi ne takiua ki mua hana; ha i ai a ia i tua mo e na povi ua ne hogofulu ma ua aki; ti fina atu a Elia kia ia mo e liti atu ai hana tapulu lahi ki luga hana.
20 Ti tiaki e ia e tau povi ka e tutuli e ia a Elia, kua pehe mai a ia, Kia toka e koe au ke taufigita a mautolu mo e haku a matua tane mo e haku a matua fifine, ti mui atu ai au kia koe. Ti pehe atu a ia kia ia, Kia fano ā koe, ti liu atu a; ha ko e heigoa e mena kua eke e au kia koe?
21 Ti liu ai a ia he mui atu kia ia; ti uta e ia ua e povi mo e keli ai e ia; kua tunu ai foki e ia e kakano he tau povi ia ke he tau mena ne gahua aki, mo e ta age ai e ia ke he tau tagata, ti kai ai e lautolu. Ti matike a ia mo e mui mai a ia kia Elia, ti fekafekau a ia kia ia.