1 Tau Patuiki 2:1-46
2 KUA tata e aho ke mate ai a Tavita; ti poaki atu a ia ke he hana tama ko Solomona, kua pehe atu,
2 Ko e fano ne fai au ke he puhala he lalolagi oti; ti fakamalolo a koe, mo e eke a koe mo tagata toa;
3 Kia omaoma a koe ke he fekau a Iehova hau a Atua, kia fano a koe ke he hana tau puhala, ke omaoma ai a koe ke he hana tau fekau, mo e hana tau poaki, mo e hana tau fakafiliaga, mo e hana tau fakatufono tuga ne tohi ai ke he tau fakatufono a Mose, kia monuina a koe ke he tau mena oti ka eke ai e koe, mo e tau mena oti ke hagao atu a koe ki ai;
4 Kia fakamau ai e Iehova hana finagalo kua vagahau mai ai e ia kia au, kua pehe mai. Kaeke ke leveki he fanau hāu ke he mahani ha lautolu, ke o fano ai a lautolu ki mua haku mo e fakamoli, mo e ha lautolu a tau loto katoa, mo e ha lautolu a tau manatu katoa, kua pehe mai a ia, ti nakai to kehe ai e fanau hāu mai he nofoaiki a Isaraela.
5 Kua iloa foki e koe e mena ne eke e Ioapo ko e tama a Seruia kia au, ko e mena ne eke ai e ia ke he na takitaki tokoua he kau a Isaraela ko Apineru ko e tama a Neru mo Amasa ko e tama a Ieteru, ne kelipopo e ia, ne fakamaligi e ia e toto he vaha mafola ke tuga e vaha tau ti tuku ai e ia e toto ha laua ke he pipi hana ha ha he tokupu hana, mo e hana tau afialoalohui ha ha he tau hui hana, ke tuga ne keli ai a laua ke he vaha tau.
6 Ti eke e koe kia ia ke lata mo e hau a pulotu, ka e aua neke hifo ai hana tau lauulu hina ke he tukuaga mo e monuina.
7 Ka e fakaalofa atu a koe ke he tau tama tane a Pasili ko e tagata Kiliata, kia ha i ai a lautolu fakalataha mo lautolu kua kai mena ke he hāu a laulau; ha kua pihia ha lautolu a o mai kia au he hola kehe au ia Apisaloma hau a matakainaga.
8 Ti kitiala, ha ha ia koe a Semi ko e tama a Kera, ko e tagata Peniamina mai Pahurima, ne kaialu mai e ia kia au mo e kaialu kelea ni ke he aho ne fina age ai au ki Mahanaima; ka e hifo a ia ke feleveia mo au i Ioritana, ti omonuo ai e au kia ia kia Iehova, kua pehe atu, Nakai keli e au a koe ke he pelu.
9 Hanai, ua toka noa e koe a ia; ha ko e tagata iloilo a koe ti iloa ni e koe e mena kua lata ke eke kia ia; ka kia ta hifo e koe hana tau lauulu hina ke he tukuaga mo e toto.
10 Ti takoto ai a Tavita fakalataha mo e hana tau matua; ti tanu e lautolu a ia ke he maga a Tavita.
11 Ko e tau aho foki ne eke ai a Tavita mo patuiki a Isaraela ko e fagofulu e tau tau; ko e fitu e tau ne eke a ia mo patuiki i Heperona, ti tolugofulu e tau ti tolu e tau ne eke a ia mo patuiki i Ierusalema.
12 Ti nofo ai a Solomona ke he nofoaiki he hana matua ko Tavita; ti fakamau ke mauokafua hana kautu.
13 Ti fina atu a Atonia ko e tama tane a Hakita kia Patesepa ko e matua fifine a Solomona; ti pehe mai a ia kia ia, Kua hau nakai a koe mo e mafola? Ti pehe atu a ia, Kua mafola.
14 Kua pehe atu foki a ia, Kua fai mena au ke vagahau atu kia koe. Ti pehe mai a ia, Kia vagahau mai ā.
15 Ti pehe atu a ia, Kua iloa e koe ko e mena ha ha ia au e kautu, ti hagao mai a Isaraela oti kia au ke eke au mo patuiki; ka kua liliu kehe e kautu, kua uta ma e matakainaga haku, ha kua eke ni māna mai ia Iehova.
16 Hanai, kua ole atu e au taha mena mai ia koe, aua neke haga kehe a koe hāu a fofoga ia au. Ti pehe mai a ia kia ia, Kia vagahau mai a a koe.
17 Ti pehe atu a ia, Kia pehe atu a koe ke he patuiki ko Solomona, (ha ko e mena nakai haga kehe e ia hana fofoga ia koe,) kia ta mai e ia kia au a Apisaka ko e fifine Sunema ke eke mo hoana haku.
18 Ti pehe mai ai a Patesepa, Kua mitaki, to vagahau atu e au ke he patuiki, ha ko koe.
19 Ti fina atu ai a Patesepa ke he patuiki ko Solomona, ke vagahau atu kia ia ha ko Atonia. Ti matike ai e patuiki ke feleveia mo ia, mo e tukutuku hifo a ia kia ia; ti nofo ai a ia ke he hana nofoaiki, kua pehe age foki a ia ke ta mai e lautolu e nofoa ma e matua fifine he patuiki; ti nofo ai a ia ke he hana fahi matau.
20 Ti pehe atu a ia kia ia, Ko e taha mena tote ia au ke ole atu ai kia koe; aua neke haga kehe e koe hau a fofoga ia au. Ti pehe mai a ia kia ia, Haku matua na e, kia ole mai ā, ha ko e mena nakai haga kehe au ia koe.
21 Ti pehe atu ai a ia, Kia ta age ai a Apisaka ko e fifine Sunema kia Atonia ko e matakainaga hāu ke eke mo hoana hana.
22 Ti tali mai ai a Solomona ke he matua fifine hana, kua pehe mai, Ko e ha kua ole mai ai e koe kia Apisaka ko e fifine Sunema ke eke mo hoana a Atonia? Kia ole mai foki e koe e kautu māna ha ko e haku a taokete ni a ia, kia ole ia mana, katoa mo Aviata ko e ekepoa, mo Ioapo ko e tama a Seruia.
23 Ti omonuo ai he patuiki ko Solomona kia Iehova, kua pehe mai, Kia eke ai pihia he Atua kia au, mo e lafilafi ki ai, kaeke kua nakai vagahau mai ai e Atonia e kupu na ke eke mo mena ke mate ai a ia.
24 Hanai, kua moui a Iehova kua fakamau ai au, mo e fakanofo ai au ke he nofoaiki he haku matua ko Tavita, kua eke foki e ia maku e magafaoa, tuga ne vagahau mai ni e ia, to kelipopo ai ni a Atonia ke he aho nai.
25 Ti fakafano atu ai he patuiki ko Solomona a Penaia ko e tama a Iehoiata, ti keli e ia a ia, ti mate ai a ia.
26 Kua pehe age foki e patuiki kia Aviata ko e ekepoa, Kia fano a koe ki Anatota ke he fonua hāu; ha kua lata ke mate a koe, ka e nakai keli ai e au a koe ke he aho nai, ha ko e mena uta ai e koe e puha he Iki ko Iehova ki mua a Tavita haku matua; ko e mena matematekelea foki a koe ke he tau mena oti ne matematekelea ai haku matua.
27 Ti vega ai e Solomona a Aviata ke aua neke eke a ia mo ekepoa a Iehova; kia fakamoli ai e ia e finagalo a Iehova ne vagahau mai e ia ke he magafaoa a Eli i Sailo.
28 Ti tuogo atu e tala ia kia Ioapo, ti hola ai a ia ke he fale uta fano a Iehova, mo e toto atu e ia ke he tau hoe he fatapoa; ha ko e mena nakai afe a Ioapo ke mui atu kia Apisaloma ka e afe ni a ia mo e mui atu a ia kia Atonia.
29 Ti talahau ai ke he patuiki ko Solomona, kua hola a Ioapo ke he fale uta fano a Iehova; ti kitiala, ha ha he tapa he fatapoa a ia. Ti fakafano atu ai e Solomona a Penaia ko e tama a Iehoiata, kua pehe atu, Kia fano ā koe, ti keli e koe a ia.
30 Ti fina age ai a Penaia ke he fale uta fano a Iehova, ti pehe age a ia kia ia, Kua pehe e kupu he patuiki, Kia hu mai a a koe ki fafo. Ti pehe age a ia, Nakai, to mate au i hinei. Ti liu atu a Penaia mo e kupu ia ke he patuiki, kua pehe atu, Kua vagahau mai pihia kia au, ti tali mai pihia a ia kia au.
31 Ti pehe mai e patuiki kia ia, Kia eke a e koe tuga ne vagahau mai a ia, ti keli ai e koe a ia, mo e tanu a ia; kia uta kehe ai ia au mo e magafaoa he haku matua e toto ne fakamaligi noa e Ioapo.
32 To taui atu ni e Iehova hana toto ke he hana ni a ulu, ha kua keli e ia e tau tagata tokoua ne mua he mahani tututonu mo e mahani mitaki a laua kia ia, ne keli e ia a laua ke he pelu, ka e nakai iloa ai he matua haku ko Tavita; ko Apineru ko e tama a Neru, ko e takitaki he kau a Isaraela, mo Amasa ko e tama a Ieteru ko e takitaki he kau a Iuta.
33 To taui ni e toto ha laua ke he ulu a Ioapo, mo e tau ulu he hana fanau tukulagi; ka ko Tavita, mo e hana fanau, mo e hana magafaoa, mo e hana nofoaiki to monuina tukulagi ia mai ia Iehova.
34 Ti hake ai a Penaia ko e tama a Iehoiata, ti keli e ia a ia, kua mate a ia; ti tanu ai a ia ke he hana fale ke he tutakale.
35 Ti kotofa ai he patuiki a Penaia ko e tama a Iehoiata ke pule ke he kau ke hukui aki a ia; kua kotofa foki he patuiki a Satoka ko e ekepoa ke hukuiaki a Aviata.
36 Kua fakafano age foki he patuiki, mo e ui age ai kia Semi ke hau; ti pehe age a ia kia ia, Kia ta e koe e fale māu i Ierusalema, mo e nofo ai a koe, ti ua fano kehe a koe mo e mena ia ke he taha mena;
37 Ha ko e aho ke fina atu ai a koe, mo e laka atu a koe e vailele ko Keterono, kia iloa mitaki e koe, to mate ai a koe; ti ha ha i luga he ulu hāu hāu a toto.
38 Ti pehe age a Semi ke he patuiki, Kua mitaki hau a kupu; tuga ne vagahau mai haku a iki ko e patuiki, to eke ni pihia hau a fekafekau. Ti nofo ai a Semi i Ierusalema ke he tau aho loga.
39 Ka kua katoa ai e tau tau ne tolu, ti fehola ai e tau fekafekau tokoua a Semi kia Akisa e tama a Maaka, ko e patuiki a Kata. Ti tala age e falu kia Semi, kua pehe age, Kitiala, ha ha i Kata hāu a tau fekafekau.
40 Ti matike ai a Semi, mo e fakanofoa e ia hana asini, ti fano a ia ki Kata kia Akisa ke kumi ai hana tau fekafekau; kua fina age a Semi mo e ta mai ai e ia hana tau fekafekau i Kata.
41 Ti talahau ai kia Solomona, ne fano a Semi i Ierusalema ki Kata, ti kua liu mai a ia.
42 Ti fakafano age ai he patuiki ke ui kia Semi ke hau, ti pehe age a ia kia ia, Nakai kia pehe atu au kia koe ke omonuo ai e koe kia Iehova, mo e tala atu fakalahi e au kia koe, kua pehe atu, Ko e aho ke fano kehe ai a koe, mo e fina age ke he taha mena, kia iloa mitaki e koe, to mate ai ni a koe? Ti pehe mai a koe kia au, Kua mitaki e kupu kua fanogonogo ai au.
43 Ko e heigoa kia e mena nakai taofi ai e koe e omonuo a Iehova, mo e poaki ne poaki atu ai e au kia koe?
44 Kua pehe age foki e patuiki kia Semi, Kua iloa e koe e kelea oti kua iloa ai ni ke he hau a loto, ne eke ai e koe ke he haku matua ko Tavita, Hanai, kia taui atu e Iehova hāu a kelea ke he hāu a ulu;
45 Ka e monuina e patuiki ko Solomona, ke fakamau ai foki e nofoaiki a Tavita ki mua a Iehova ke tukulagi ai.
46 Ti poaki atu ai he patuiki kia Penaia ko e tama a Iehoiata; ti hu atu ai a ia ki fafo, mo e keli e ia a ia, ti mate ai a ia. Ti fakamau ai ni e kautu kia Solomona.