1 Tau Patuiki 20:1-43
20 TI fakapotopoto ai e Penihata ko e patuiki i Suria hana kau oti; ti ha ha ia ia e tau patuiki ne tokotolugofulu ma ua, mo e kau heke solofanua mo e tau kariota; ti hake a ia mo e pa takai ai e ia a Samaria, mo e tau ki ai.
2 Ti fakafano age e ia e tau fekau ke he maga kia Ahapo ko e patuiki a Isaraela,
3 Kua pehe age kia ia, Kua poaki mai pehe a Peniahata, Ko e hau a tau ario mo e hau a tau auro, ko e haku ia; ko e hau a tau hoana foki, mo e hau a fanau, ko lautolu ne mua he mitaki, ko e haku ia.
4 Ti tali age ai he patuiki a Isaraela, kua pehe age, Ko e iki na e, ko e patuiki, ko au nai, mo e haku a tau mena oti ko e hāu haia, tuga ne vagahau mai ai e koe.
5 Ti liliu age e tau fekau, mo e pehe age a lautolu, Kua vagahau mai pehe a Penihata kua pehe mai, Ne fakafano atu e au kia koe, kua pehe atu, Kia ta mai e koe māku hāu a tau ario, mo e hau a tau auro, mo e hau a tau hoana, mo e hau a fanau;
6 Ka ko e magaaho pehenai a pogipogi, to fakafano atu e au kia koe haku a tau fekafekau, ti kumi ai e lautolu ke he fale hāu, mo e tau fale he hāu a tau fekafekau; ko e tau mena oti foki kua fiafia a koe ki ai, to toto e lautolu ke he tau lima ha lautolu, mo e uta ai e lautolu.
7 Ti ui he patuiki a Isaraela ke he tau patu oti he motu, mo e pehe age a ia kia lautolu, Kikite la, mo e iloa e mutolu, kua kumi he tagata nai ke he kelea; ha kua fakafano mai e ia kia au ke uta haku tau hoana, mo e haku a fanau, mo e haku a tau ario, mo e haku a tau auro; ti nakai lamakai ai au kia ia.
8 Ti pehe age e tau patu oti, mo e motu oti kia ia, Aua neke fanogonogo a koe kia ia, ti ua talia e koe hana poaki.
9 Ti pehe age a ia ke he tau fekau a Penihata, Kia pehe atu a mutolu ke he haku a iki ko e patuiki, Ko e tau mena oti ne fakafano mai ai fakamua e koe ke he hau a fekafekau to eke e au; ka ko e mena nai nakai maeke kia au ke eke. Ti o ai e tau fekau mo e uta ai e lautolu e kupu ia kia ia.
10 Ti fakafano age ai e Penihata kia ia kua pehe age. Kia eke pihia he tau atua kia au mo e lafilafi ki ai, kaeke ke lata e efuefu a Samaria ke igatia ai mo e tau puke aloalolima he motu oti kua mumui mai kia au.
11 Ti tali age ai e patuiki a Isaraela kua pehe age, Kia tala age a mutolu kia ia, Aua neke hula a ia kua pipi ai e ia hana tau tapulu tau tuga a ia kua vevete ai ke toka.
12 Kua logona e Penihata e kupu na, ka kua inu uaina a ia, ko ia mo e tau patuiki ke he tau fale api; ti pehe age a ia ke he hana tau fekafekau, Kia tatanaki atu a mutolu ke tau, Ti tatanaki atu ai a lautolu ke tau ke he maga.
13 Kitiala, ne hau e taha perofeta kia Ahapo ko e patuiki a Isaraela, kua pehe age, Kua vagahau mai pehe a Iehova, Kua kitia nakai e koe e motu o tagata oti na ne tokologa? Kitiala, to tuku atu e tau a lautolu ke he hau a lima ke he aho nai; ti iloa ai e koe ko au ko Iehova.
14 Ti pehe age ai a Ahapo, Ko hai kia ke eke ai. Ti pehe mai a ia, Kua talahau mai pehe a Iehova, Ko e tau fuata, ko e tau iki ne pule ke he tau fahi. Ti pehe atu a ia, Ko hai kia ke kamata ai e tau? Ti pehe mai a ia, Ko koe ni.
15 Ti totou ai e ia e tau fuata ko e tau iki ne pule ke he tau fahi; ne toko ua e teau ti tolugofulu ti ua e tagata; ti totou ai e ia e motu oti ne mumui age kia lautolu, ko e fanau oti a Isaraela ne toko fitu e afe.
16 Ti o atu ai a lautolu ke he tupou la. Ka ko Penihata mo e tau patuiki tokotolugofulu ma ua ne lagomatai kia ia, kua inu e lautolu ke konahia ke he tau fale api.
17 Ti o atu fakamua e tau fuata ko e tau iki ne pule ke he tau fahi. Ti fakafano atu ai e Penihata e falu, ti tala age a lautolu kia ia, kua pehe age, Kua o mai e tau tagata i Samaria.
18 Ti pehe age ai a ia, Po ke o mai mo e mafola a lautolu kia tapaki moui e mutolu a lautolu; po ke o mai a lautolu ke tau, kia tapaki moui e mutolu a lautolu.
19 Ti o atu e tau fuata na ko e tau iki ne pule ke he tau fahi, mo e kau ne mumui atu kia lautolu.
20 Kua takitaha ha lautolu mo e keli hana tagata; ti fehola ai e tau tagata Suria, ti tutuli e Isaraela a lautolu; ti heke solofanua a Penihata ko e patuiki a Suria mo e hola ai a ia, fakalataha mo e tau tagata ne heke solofanua.
21 Ti fina atu e patuiki a Isaraela, mo e keli ai e ia e tau solofanua mo e tau kariota; ti keli ai e ia e tau tagata Suria mo e keliaga lahi.
22 Ti fakatata age e perofeta ke he patuiki a Isaraela, kua pehe age kia ia, Kia haele atu a koe mo e fakamalolo, mo e manamanatu a, mo e kitekite a koe ke he tau mena kua eke e koe; ha ko e mena ka hoko foki ke he tau, ti hau ai e patuiki a Suria ke tau mo koe.
23 Ti pehe age e tau fekafekau he patuiki a Suria kia ia, Ko e atua he tau mouga ha lautolu a atua, ko e mena ia ne kautu ai a lautolu kia tautolu; ka kia tau a tautolu mo lautolu ke he kelekele tatai ti kautu ai a tautolu kia lautolu.
24 Kia eke e koe e mena nai, kia tiaki e koe e tau patuiki takitaha mai he mena ne kotofa a lautolu ki ai, ti kotofa e koe e tau takitaki kau ke hukui aki a lautolu.
25 Kia totou foki e koe māu e kau ke tatai mo e kau ha ha ia koe ne fakaotioti; kia totogi aki e solofanua ke he solofanua mo e kariota ke he kariota; ti tau ai a tautolu mo lautolu ke he kelekele tatai ti kautu ai a tautolu kia lautolu. Ti fanogonogo a ia ke he tau kupu ha lautolu mo e eke pihia e ia.
26 Kua hoko foki ke he tau, ti totou ai e Penihata e tau tagata Suria, ti hake ai a ia ki Afeka ke tau mo Isaraela.
27 Kua totou foki e fanau a Isaraela, mo e tauteute ai a lautolu; ti o atu ai a lautolu ke feleveia mo lautolu. Ti heapi ai e fanau a Isaraela kua fakafehagai mo lautolu tuga ua e fuifui koti gahoa; ka kua puke ai e motu ke he tau tagata Suria.
28 Ti fakatata age e tagata he Atua mo e vagahau ai ke he patuiki a Isaraela kua pehe age, Kua vagahau mai pehe a Iehova, Kua pehe mai e tau tagata Suria, Ko e Atua he tau mouga a Iehova, ka e nakai ko e Atua a ia he kelekele tatai; ko e mena ia to tuku atu e au e motu o tagata tokologa nai ke he lima hau; ti iloa ai e mutolu ko au ni ko Iehova.
29 Ko e fitu e po ne heapi fakafehagai aki a lautolu. Kua hoko ke he aho fitu ti tau ai a lautolu; ti keli ai he fanau a Isaraela e tau tagata Suria ko e taha teau e afe e tagata he kau ne o ai ke he tau hui ha lautolu ke he aho taha.
30 Ko lautolu ne toe ne fehola a lautolu ki Afeka, ke he maga; ti to hifo ai e kaupa ki luga he tau tagata ne uafulu e afe ti fitu e afe e tagata ko lautolu ia ne toe. Ti hola a Penihata, kua hoko ke he maga, ke he poko ki loto.
31 Ti pehe age hana tau fekafekau kia ia, Kitiala kua logona e mautolu, ko e tau patuiki he magafaoa a Isaraela, ko e tau patuiki fakaalofa a lautolu; kia toka e koe a mautolu ke felevehi ai a mautolu ke he ie talatala ke he tau tokupu ha mautolu, mo e tuku ai e tau toua ke he tau ulu ha mautolu, mo e o atu a mautolu ke he patuiki a Isaraela, po ke fakamoui ai nakai e ia a koe.
32 Ti pipi ai e lautolu e ie talatala, ke he tau tokupu ha lautolu, mo e tau toua ke he tau ulu ha lautolu, ti o age a lautolu ke he patuiki a Isaraela, mo e pehe age a lautolu, Kua pehe mai hau a fekafekau ko Penihata, Kia fakamoui mai e koe au. Ti pehe age a ia. Kua moui agaia kia a ia; Ko e matakainaga haku a ia
33 Kua manako e tau tagata ke he kupu mai ia ia, ti fakaave a lautolu ke taofi ki ai; ti pehe age ai a lautolu; Ko e matakainaga hau ko Penihata. Ti pehe age a ia, Kia o a, mo e ta mai e mutolu a ia. Ti hau ai a Penihata, ti talia e ia a ia ke he hana kariota.
34 Ti pehe age a Penihata kia ia, Ko e tau maga ne fofo mai he matua haku he matua hau to liuaki atu e au kia koe; ti eke ai e koe e tau puhala māu i Tamaseko, tuga ne eke ai he matua hāku i Samaria. Ti pehe age ai a Ahapo. To fakafano atu e au a koe mo e maveheaga na. Ti eke ai e laua mo ia e maveheaga; ti fakafano atu e ia a ia.
35 Ko e taha tagata he vahega he tau perofeta ne pehe age a ia ke he finagalo a Iehova ke he taha tagata, Kia ta e koe au. Ka e nakai mafai e tagata, ke ta ai a ia.
36 Ti pehe age a ia kia ia, Kua nakai fanogo nogo a koe ke he kupu a Iehova, kitiala, ko e mena ia ka fano kehe a koe ia au, ti keli ai a koe he leona. Ne fano a ia he mena ia, ti moua ai he leona a ia mo e kelipopo a ia.
37 Ti moua e ia taha tagata, ti pehe age a ia kia ia, Kia ta la e koe au. Ti ta ai he tagata ia a ia, ti kafokia ai a ia he ta e ia.
38 Ti fano e perofeta, ti tu ai a ia ke he puhala ke leo ke he patuiki; kua fakavai e ia ko e tagata kehe a ia ke he pipi ke he hana tau mata.
39 Kua fina age e patuiki, ti ui age ai a ia ke he patuiki, kua pehe age, Ne fina age hau a fekafekau nai ke he tau, kitiala, kua afe mai taha tagata, mo e ta mai ai e ia e tagata kia au, kua pehe mai a ia, Kia leoleo e koe e tagata nai; kaeke ni ke galo a ia ti totogi aki e moui hana ke he moui hāu po ke ta mai ai e koe e taleni ario.
40 Ti eke mena hau a fekafekau ke he taha mena mo e taha mena, ti nakai ha i ai a ia. Ti pehe age e patuiki a Isaraela kia ia to pihia ni hau a fakahala, kua fakatonu ai e koe.
41 Ti fakaave a ia mo e uta kehe ai e pipi he tau mata hana; ti iloa agataha he patuiki a Isaraela, ko e taha he vahega he tau perofeta a ia.
42 Ti pehe age a ia kia ia, Kua talahau mai pehe a Iehova, Kua fakafano atu e koe mai he lima hau, e tagata ne kotofa e au ke mate, ko e mena ia to totogi aki hana moui ke he moui hāu, mo e hana motu ke he motu hau.
43 Ti fina age ai e patuiki a Isaraela ke he hana fale kua mamahi a ia mo e ita kua hoko a ia ki Samaria.