1 Tau Patuiki 21:1-29
21 KUA mole atu e tau mena ia, ne ha ia Napota ko e tagata Isereelu, e ulu vine i Isereelu, ne fetataaki mo e fale a Ahapo ke e patuiki i Samaria.
2 Ti vagahau atu a Ahapo kia Napota, kua pehe atu, Kia ta mai e koe e ulu vine hau māku ke eke mo fonua ke to ai e tau lakau kai māku, ha kua tata age ia ke he fale haku, ka to ta atu e au kia koe māu e ulu vine ne mua he mitaki ke totogi aki; po ke ta atu e au kia koe, kaeke kua loto a koe ki ai, e tau tupe kua lata ke fakafuaaki e ulu vine.
3 Ti tali mai a Napota kia Ahapo, Kia fakamamao e Iehova ia au ke ta atu ai e au kia koe e tufaaga he haku a tau matua.
4 Ti fano a Ahapo ke he hana fale kua mamahi mo e ita, ha ko e kupu ne vagahau mai ai e Napota ko e tagata Isereelu kia ia, kua pehe mai, Nakai ta atu e au kia koe e tufaaga he haku a tau matua. Ti takoto ai a ia ke he hana mohega, mo e haga kehe hana mata, ti nakai kai ai e ia e tau mena kai.
5 Ti hau ai kia ia a Iesepela hana hoana mo e pehe mai kia ia. Ko e heigoa e mena ne mamahi ai hau a finagalo, mo e nakai taumafa ai e koe ha mena.
6 Ti pehe atu a ia kia ia, Ha kua vagahau age au kia Napota ko e tagata Isereelu, kua pehe age au kia ia, Kia ta mai e koe māku hau a uluvine ke he tau tupe; ka koe mena ka nakai loto a koe ki ai to ta atu e au māu taha uluvine ke totogi aki. Ti pehe mai a ia nakai ta atu e au haku a ulu vine kia koe.
7 Ti pehe mai ai a Iesepela hana hoana kia ia, Kua pule kia a koe ke he kautu a Isaraela? Kia matike ā, ti taumafa mena ai a koe, ti fiafia ai hau a finagalo; to ta atu ai e au kia koe e ulu vine a Napota ko e tagata Isereelu.
8 Ti tohi ai e ia e tau tohi ke he higoa a Ahapo, mo e fakamau ai ke he hana fakamau fakamailoga, ti fakafano age e ia e tau tohi ke he tau patu mo e tau iki he maga ne nofo ai a Napota.
9 Ne tohi foki e ia ke he tau tohi kua pehe age, Kia fakamatala e mutolu e fakakanopogi, ti tuku atu ai e mutolu a Napota ke he mena ne mua ke he fakapotopotoaga.
10 Ti tuku atu e mutolu ki mua hana tokoua e tagata kolokolovao ke hokotaki kia ia, kia pehe age, Ne kupu kelea a koe ke he Atua katoa mo e patuiki. Ti takitaki atu e mutolu a ia ki tua he maga, mo e pinimaka e mutolu a ia, ke mate ai a ia.
11 Ti eke he tau tagata he hana maga, ko e tau patu mo e tau iki kua nonofo ke he hana maga, tuga ne fakafano age ai e Iesepela kia lautolu, ke lata mo e tau kupu ne tohi ai e ia ke he tau tohi ne fakafano age e ia kia lautolu.
12 Ne fakamatala e lautolu e fakakanopogi ke eke, ti tuku e lautolu a Napota ke he mena ne mua ke he fakapotopotoaga.
13 Ti o mai ai e tau tagata kolokolovao tokoua, mo e nonofo ki mua hana; ti hokotaki he tau tagata kolokolovao ia kia ia, ko Napota ni, ki mua he motu, kua pehe age, Ne kupu kelea a Napota ke he Atua mo e patuiki. Ti takitaki atu e lautolu a ia ki tua he maga, mo e pini aki e lautolu a ia ke he tau maka, ti mate ai a ia.
14 Ti fakafano age ai e lautolu kia Iesepela, kua pehe age, Kua pinimaka a Napota ti kua mate a ia.
15 Ne logona e Iesepela kua pinimaka a Napota ti kua mate a ia, ti pehe age ai a Iesepela kia Ahapo, Kia matike ā, mo e eke e koe māu e uluvine a Napota ko e tagata Isereelu, nakai mafai a ia ke ta atu ai kia koe ke he tau tupe; ha kua nakai moui a Nepota, ka kua mate ni.
16 Ne logona e Ahapo kua mate a Napota, ti matike ai a Ahapo ke hifo ke eke māna e uluvine a Napota ko e tagata Isereelu.
17 Ti hoko mai ai e kupu a Iehova kia Elia ko e Tisepi, kua pehe mai,
18 Kia matike a, ti hifo a koe ke feleveia a mua mo Ahapo ko e patuiki a Isaraela, kua nofo i Samaria; kitiala, ha ha i ai a ia ke he uluvine a Napota, kua hifo a ia ki ai ke eke māna.
19 Kia vagahau age a koe kia ia kua pehe age, Kua vagahau mai pehe a Iehova, Kua kelipopo kia e koe, ti eke māu foki kia e koe? Ti vagahau age a koe kia ia, kua pehe age, Kua vagahau mai pehe a Iehova, Ko e mena ne epoepo ai he tau kuli e toto a Napota, to epoepo ai toki he tau kuli e toto hāu, ko e hāu ni.
20 Ti pehe mai a Ahapo kia Elia, Kua moua kia e koe au, ko koe na kua fai fi mai kia au? Ti pehe atu ai a ia, Kua moua tuai e au; ha kua fakafua atu e koe a koe ke eke e tau mena kelea ki mua a Iehova.
21 Kitiala, kua pehe mai a Iehova, To fakahoko atu e au e kelea kia koe, to uta kehe e au hau a fanau, mo e fakaoti e au e tau tama tane oti kia Ahapo, ko e tau tupa katoa mo lautolu kua toka noa i Isaraela.
22 To eke foki e au e magafaoa hau ke tuga ne magafaoa a Ierepoamo ko e tama a Nepata ke tuga foki e magafaoa a Paasa ko e tama a Akia ha ko e tau mena fakahogohogomanava ne fakahogohogomanava mai ai a koe kia au, mo e fakatupu ai e koe e hala kia Isaraela.
23 Ko Iesepela foki, kua vagahau mai ai a Iehova, kua pehe mai, To kai he tau kuli a Iesepela ki lalo he kaupa i Isereelu.
24 Ko ia ke mate kia Ahapo ke he maga to kai ai he tau kuli a ia; ko ia ke mate ai ke he vao to kai he tau manu lele he pulagi a ia.
25 (Kua nakai ni ha i ai taha ne tatai mo Ahapo ne fakafua atu e ia a ia ke eke e tau mena kelea ki mua a Iehova; ne fakaohooho ai e Iesepela hana hoana a ia.
26 Ti eke ai e ia e tau mena kelea ue atu he mui atu a ia ke he tau tupua, tuga ne tau mena oti ne eke he tau tagata Amori, ne vega ai e Iehova ki mua he fanau a Isaraela.)
27 Kua logona e Ahapo e tau kupu ia, ti hēhē ai e ia hana tau tapulu, mo e fakatapulu ai e ia hana tino ke he ie talatala, ti fakakanopogi a ia, mo e takoto a ia ke he ie talatala, mo e faifano fakatekiteki a ia.
28 Ti hoko mai ai e kupu a Iehova kia Elia ko e Tisepi, kua pehe mai.
29 Kua kitia nakai e koe kua fakatokolalo ai a Ahapo ki mua haku? Kua fakatokolalo a ia ki mua haku, ko e mena ia nakai fakahoko ai e au e kelea ke he tau aho kua patuiki ai a ia; ka ko e tau aho ke patuiki ai hana tama to fakahoko ai e au e kelea ke he hana magafaoa.