1 Tau Patuiki 22:1-53
22 TI nonofo a lautolu ke he tau tau tolu kua nakai tau a Suria mo Isaraela.
2 Kua hoko ke he tau ne tolu aki, ti hofo ai a Iehosafata ko e patuiki a Iuta, ke he patuiki a Isaraela.
3 Ti pehe age a patuiki a Isaraela ke he hana tau fekafekau, Kua iloa nakai e mutolu ko Ramota-Kiliata ko e maga ha tautolu haia, ka kua nonofo noa a tautolu mo e nakai fofo mai he lima he patuiki a Suria?
4 Kua pehe age foki a ia kia Iehosafata, To o nakai a taua mo au ke tau ki Ramota-Kiliata? Ti pehe age ai a Iehosafata ke he patuiki a Isaraela, Ko au nai kua tuga na koe, ko e haku a motu kua tuga ne motu hāu, ko e haku a tau solofanua kua tuga ne tau solofanua hāu.
5 Kua pehe age foki a Iehosafata ke he patuiki a Isaraela, Kia hūhū la ke he aho nai ke he finagalo a Iehova.
6 Ti fakapotopoto mai ai he patuiki a Isaraela e tau perofeta, tokai ko e tokofa e teau e tagata, ti pehe age a ia kia lautolu, Ke fano kia au ki Ramota-Kiliata ke tau, po ke toka ai? Ti pehe age a lautolu, Kia haele hake a; ha kua foaki mai ai he Iki ke he lima he patuiki.
7 Ti pehe age a Iehosafata, Nakai kia ha i hinai foki e perofeta a Iehova, kia huhu atu a tautolu kia ia?
8 Ti pehe age e patuiki a Isaraela kia Iehosafata, Ko e taha tagata foki ko Mikaio ko e tama a Imila, he hūhū atu ai a tautolu kia Iehova; ka e fakavihia e au a ia he nakai talahau mai e ia e tau mena mitaki kia au, ka ko e tau mena kelea. Ti pehe mai a Iehosafata, aua neke tala mai pihia e patuiki.
9 Ti ui age e patuiki a Isaraela ke he taha fekafekau ne mua, kua pehe age, Kia ta mai a fakaave a Mikaio ko e tama a Imila.
10 Kua takitaha mo e nofo ke he hana nofoaiki ko e patuiki a Isaraela, mo Iehosafata ko e patuiki a Iuta; ne tapulu foki a laua ke he tau tapulu iki ha laua, ke he mena tokanoa ne tata age ke he gutuhala a Samaria; ti talahau mena ai he tau perofeta oti ki mua ha laua.
11 Ti eke e Setekaia ko e tama a Kenaana e tau hoe lapatoa māna, mo e pehe age a ia, Kua vagahau mai pehe a Iehova, To tulei aki e koe a Suria ke he tau mena nai ato fakaotioti ai a lautolu.
12 Kua pihia foki e tau mena ne talahau ai he tau perofeta oti, Kua pehe age a lautolu, Kia haele hake a koe ki Ramota-Kiliata, mo e monuina; ha kua foaki mai ai e Iehova ke he lima lie patuiki.
13 Ko e fekafekau ne fano ke ui age kia Mikaio, ne vagahau a ia kia ia, ne pehe age, Kitiala, ko e tau kupu he tau perofeta ke he patuiki ko e taha ni, ko e tau kupu mitaki; kia pihia foki e tau kupu hau, ke tuga ne tau kupu ha lautolu, kia vagahau atu a koe e tau kupu mitaki.
14 Ti pehe age ai a Mikaio, Kua moui a Iehova, ko e mena ke tala mai e Iehova kia au ko e mena ia ke vagahau atu ai e au.
15 Ti hau ai a ia ke he patuiki. Ti pehe age e patuiki kia ia, Mikaio na e, to o atu kia a mautolu ki Ramota-Kiliata ke tau po ke tokai? Ti pehe age a ia kia ia, Kia haele hake a mo e monuina; ha kua foaki mai ai e Iehova ke he lima he patuiki.
16 Ti pehe age ai e patuiki kia ia, Ko e lagafiha ia kua tala atu e au mo e omonuo kia koe; ke aua neke vagahau mai a koe kia au ha mena taha, ka ko e tau kupu moli ni, ke he higoa a Iehova?
17 Ti pehe age a ia, Ne kitia atu e au a Isaraela oti kua fakamavehevehe ke he tau mouga, tuga ne tau mamoe kua nakai fai leveki a lautolu. Ti pehe mai ai a Iehova, Kua nakai fai iki a lautolu, kia takitaha a lautolu mo e liu atu ai ke he hana fale mo e monuina.
18 Ti pehe age e patuiki a Isaraela kia Iehosafata. Nakai kia tala atu e au kia koe, nakai talahau mai e ia e tau mena mitaki kia au, ka ko e tau mena kelea?
19 Ti pehe age ai a Mikaio, Hanai, kia fanogonogo mai ā ke he kupu a Iehova; Ne kitia atu e au a Iehova kua nofo ke he hana nofoaiki; ti tutu ai e tau kau oti he lagi tata age kia ia, ke he hana fahi matau mo e hana fahi hema.
20 Ti pehe age a Iehova, Ko hai kia ke fakavai Ahapo, ke hake a ia, mo e mate ai a ia i Ramota-Kiliata? Ti pehe mai ai taha, ka e pehe mai e taha.
21 Ti fina age ai taha agāga mo e tu ai ki mua a Iehova, kua pehe age a ia, To fakavai e au a ia.
22 Ti pehe age a Iehova kia ia, Ko e heigoa kia e mena ke maeke ai? Ti pehe age a ia, To fano au, mo e eke au mo agāga pikopiko ke he tau gutu he hana tau perofeta oti. Ti pehe age ai a Iehova, To fakavai e koe a ia, to kautu foki a koe; kia fano ā, ti eke pihia a koe.
23 Hanai, kitiala, kua tuku ai e Iehova e agāga pikopiko ke he tau gutu he tau perofeta oti nai; ha kua vagahau mai a Iehova ke hoko ai e kelea kia koe.
24 Ti fakatata mai a Setekaia ko e tama a Kenaana mo e ta ai e ia a Mikaio ke he hana kauvehe, mo e pehe mai, Ko e hala fe ne fina age ai e agāga a Iehova ia au ke vagahau atu kia koe,
25 Ti pehe age ai a Mikaio, Kitiala, to kitia ni e koe ke he aho ke hu atu a koe ke he poko ki loto ke fakamumuli ai a koe.
26 Ti pehe age e patuiki a Isaraela, Kia uta a a Mikaio, mo e liu takitaki atu e mutolu a ia kia Amona koe iki he maga, mo Ioasa ko e tama he patuiki;
27 Mo e pehe age, Kua pehe e kupu he patuiki, Kia tuku la e tagata nai ke he fale puipui, mo e fagai e mutolu a ia ke he tau mena kai ke matematekelea ai, mo e magavai ke matematekelea ai, ato hau ai au mo e monuina.
28 Ti pehe age a Mikaio, Kaeke ni ke liu mai a koe mo e monuina kua nakai vagahau mai a Iehova ia au. Kua pehe age foki a ia, Kia fanogonogo mai a a mutolu ko e tau motu oti.
29 Ti o hake ai e patuiki a Isaraela, mo Iehosafata ko e patuiki a Iuta ki Ramota-Kiliata.
30 Ti pehe age e patuiki a Isaraela kia Iehosafata, To tapulu ai au ke he tau tapulu kehe mo e fano ke he tau; ka kia tapulu ai a koe ke he hau a tau tapulu. Ti tapulu ai e patuiki a Isaraela ke he tau tapulu kehe, mo e fano a ia ke he tau.
31 Kua poaki age e patuiki a Suria ke he tau iki tokotolugofulu ma ua ne pule ke he hana tau kariota, kua pehe age, Aua neke tau a mutolu mo e lalo tagata, po ke tau iki, ka ko e patuiki a Isaraela ni hokoia.
32 Kua kitia atu he tau iki ne pule ke he tau kariota a Iehosafata, ti pehe age ai a lautolu, Na ko e patuiki a Isaraela hanā, Ti afe age ai a lautolu ke tau a lautolu mo ia; ti kalaga ai a Iehosafata.
33 Kua kitia he tau iki ne pule ke he tau kariota nakai ko e patuiki a Isaraela a ia ti liliu ai a lautolu nakai tuai tutuli a ia.
34 Ti fana fakahanoa he taha tagata hana fana, ti tuina ai e patuiki ke he mena ne tutaki ai hana tapulu tau lapatoa. Ti pehe age a ia ke he takitaki he hana kariota, Kia liu age ā hau a lima, mo e uta kehe au he kau, ha kua kafokia tuai au.
35 Ne tau fakalahi a lautolu ke he aho ia, ti tokotū ai e patuiki ke he hana kariota ke fakafehagai mo Suria; kua hoko ke he afiafi ti mate ai a ia; kua hihina hifo e toto he mena ne tuina ai a ia ke he liu kariota.
36 Ti fina age ai e hea ke he kau ke he magaaho ne to ai e la kua pehe age, Kia takitaha e tagata mo e fano ke he hana maga mo e hana motu.
37 Kua mate e patuiki, ti ta mai e lautolu a ia ki Samaria; ti tanu ai e lautolu e patuiki i Samaria.
38 Kua fuifui he taha e kariota ke he vai namo i Samaria, kua fuifui ai foki e lautolu hana tau kanavaakau; ti epoepo ai he tau kuli hana toto, ke lata mo e kupu a Iehova ne vagahau mai a ia.
39 Ko e tau mena ne toe ne eke e Ahapo, mo e tau mena oti ne eke e ia, mo e fale nifo elefane ne ta e ia, mo e tau maga oti ne ati e ia, nakai kia tohi e tau mena ia ke he tohi ne tohi ai e tau tala ke he nofoaga he tau patuiki a Isaraela?
40 Kua takoto a Ahapo fakalataha mo e hana tau matua, ti eke e tama hana ko Ahasaia mo patuiki ke hukuiaki a ia.
41 Ko e tau fa ne patuiki ai a Ahapo i Isaraela ti eke ai a Iehosafata ko e tama a Asa mo patuiki i Iuta.
42 Ne tolugofulu ma lima e tau tau a Iehosafata he eke a ia mo patuiki; ti uafulu ma lima e tau ne patuiki ai a ia i Ierusalema; ko e higoa he hana matua fifine ko Asopa, ko e tama fifine a Sileki.
43 Ne fano a ia ke he tau puhala oti a Asa hana matua nakai fano kehe ai a ia, ne eke ai e ia e tau mena tonu ki mua a Iehova, ka kua nakai uta kehe ai e tau mena tokoluga; kua eke poa ai agaia he motu mo e huhunu ai e tau mena manogi ke he tau mena tokoluga.
44 Ti fakafeilo a Iehosafata mo e patuiki a Isaraela.
45 Ko e tau mena ne toe ne eke e Iehosafata, mo e tau tau ne tau ai a ia, nakai kia tohi ia ke he tohi ne tohi ai e tau tala ke he nofoaga he tau patuiki a Iuta?
46 Ko e tau tagata mahani Sotoma ne toe, ko lautolu ne toe ke he vaha ia Asa hana matua, ne uta kehe ai e ia mai he motu.
47 Ti nakai fai patuiki i Etoma; ne eke mo patuiki e tagata ne kotofa ke pule.
48 Ne ta e Iehosafata e tau foulua Tasisa ke o ki Ofaira ke moua ai e auro; ka e nakai o, ha kua pe e tau vaka i Etiokape.
49 Ti pehe age a Ahasaia ko e tama a Ahapo kia Iehosafata, Kia o fakalataha e tau fekafekau haku, mo e tau fekafekau hau ke he tau foulua; ka e nakai mafai a Iehosafata.
50 Kua takoto a Iehosafata fakalataha mo e hana tau matua, ti tanu ai a ia fakalataha mo e hana tau matua ke he maga he matua hana ko Tavita; ti eke e tama hana ko Iehoramo mo patuiki ke hukui aki a ia.
51 Ko e tau hogofulu ma fitu ne patuiki ai a Iehosafata i Iuta, ti eke a Ahasaia ko e tama a Ahapo mo patuiki a Isaraela i Samaria; ti ua e tau ne eke ai a ia mo patuiki a Isaraela.
52 Kua mahani kelea foki a ia ki mua a Iehova, ne fano ai a ia ke he puhala he hana matua tane, mo e puhala he hana matua fifine, mo e puhala a Ierepoamo ko e tama a Nepata, ne fakatupu ai e hala kia Isaraela.
53 He fekafekau ai a ia kia Paala, mo e takaveli fakafohifo a ia kia ia, mo e fakahogohogomanava atu kia Iehova ko e Atua a Isaraela, ke tatai mo e tau mena oti ne eke he matua hana.