1 Tau Patuiki 3:1-28
3 KUA fakafetui a Solomona mo Farao ko e patuiki a Aikupito, ti faihoana a ia ke he tama fifine a Farao, mo e ta mai e ia a ia ke he maga a Tavita, ato mau e fale hana he eke, mo e fale a Iehova, katoa mo e pa ke takai aki a Ierusalema.
2 Ne eke poa ai he motu ke he tau mena tokoluga, ha kua hoko ke he vaha ia, kua nakaila ta e fale ke he higoa a Iehova.
3 Kua fakaalofa a Solomona kia Iehova, kua fano foki a ia ke he tau poaki he hana matua ko Tavita; ka ko e mena nai hokoia ne eke poa ai e ia, mo e huhunu mena manogi ke he tau mena tokoluga.
4 Ti fano e patuiki ki Kipeona ke eke poa ai; ha ko e mena tokoluga ne mua haia; taha e afe e tau poa huhunu ne eke ai e Solomona ki luga he fatapoa ia.
5 Kua fakakite mai a Iehova kia Solomona ke he miti ke he po i Kipeona; kua pehe mai foki e Atua, Kia tala mai a, po ke heigoa e mena ke ta atu ai e au kia koe?
6 Ti pehe atu a Solomona, Ne fakaalofa lahi a koe ke he hau a fekafekau ko e haku a matua ko Tavita, ha kua fano a ia ki mua hau mo e fakamoli, mo e mahani tututonu, mo e loto hako ki mua hāu; kua taofi foki e koe māna e fakaalofa lahi nai kua foaki e koe kia ia e tama tane ke nofo ke he hana nofoaiki, tuga ne eke ai ke he aho nai.
7 Hanai, Iehova na e, haku Atua, kua eke e koe hau a fekafekau mo patuiki, ke hukui aki haku matua ko Tavita; ko au foki ko e tama tote, nakai iloa e au ke hu atu ki fafo mo e hu mai ki fale.
8 Ko e hāu a fekafekau foki, ha ha i ai a ia ki mua he motu hau ne fifili ai e koe, ko e motu lahi, nakai maeke ke fakalata hana tau tagata po ke tokofiha, ti nakai maeke ke totou, he tokologa.
9 Ko e mena ia kia foaki mai ai e koe e loto matala ke he hau a fekafekau ke fakafili ai e ia hau a motu, mo e fifili ai e ia e mitaki mo e kelea, ha ko hai kia kua maeke ke fakafili ai e motu nai hau, kua tokologa lahi ni?
10 Kua mitaki e tau kupu ia ke he Iki, ha kua ole e Solomona e tau mena na.
11 Ti pehe mai e Atūa kia ia, Ha kua ole mai ai e koe e mena na, ka e nakai ole e koe māu e moui loa, ti nakai ole e koe māu e tau koloa, ti nakai ole ai e koe ke mamate a lautolu kua fai fi kia koe; ka kua ole e koe māu e loto matala ke iloa ai e koe ke fakafili,
12 Kitiala, kua eke ai e au tuga ne tala mai e koe; kitiala, kua foaki atu ai e au kia koe e pulotu mo e loto matala; nakai ha i ai taha ne mua atu kia koe ke tatai mo koe, ti nakai tupu mai taha ke mui mai kia koe ke tatai mo koe.
13 Kua foaki atu foki e au kia koe e tau mena kua nakai ole mai ai e koe, ko e koloa katoa mo e lilifu; ke nakai fai patuiki ke tatai mo koe ke he tau aho oti.
14 Kaeke foki ke fano a koe ke he haku a tau puhala, mo e omaoma a koe ke he haku tau fakatufono, mo e haku a tau poaki, tuga ne fano ai hāu a matua ko Tavita, ti fakaloga ai e au hau a tau aho.
15 Ti ala ai a Solomona; kitiala, ko e miti. Kua fano a ia ki Ierusalema, ti tu ai a ia ki mua he puha he maveheaga a Iehova; ti eke ai e ia e tau poa huhunu mo e tau poa fakaaue, kua taute foki e ia e galue ma e hana tau fekafekau oti.
16 Ti o mai e tau fifine fakataka tokoua ke he patuiki, ti tutu ai a laua ki mua hana.
17 Ti pehe mai ai e taha fifine, Ko e iki na e, kua nonofo a maua mo e fifine nai ke he fale taha; ti fanau ai e au, he ha ha i ai a maua mo ia ke he fale.
18 Kua hoko foki ke he po tolu tali he fanau au, ti fanau ai he fifine nai, ne fakalataha a maua, nakai ha i ai ha tagata kehe mo maua ke he fale, ko maua hoko maua ni ha ha i ai ke he fale.
19 Ti mate e tama he fifine nai ke he po; ha kua pehia a ia ia ia.
20 Ti matike ai a ia ke he tuloto po, ti uta kehe e ia haku tama ia au ka kua mohe hau a fekafekau fifine, ti fakatakoto e ia a ia ke he hana fatafata, ka e fakatakoto mai e ia hana tama ne mate ke he fatafata haku.
21 Ne matike au ke he magaaho pogipogi ke fakahuhu haku tama, kitiala, kua mate a ia; kua kitekite fakamitaki au ki ai ke he magaaho pogipogi, kitiala, nakai ko e tama tane a ia ne fanau e au.
22 Ti pehe age e taha fifine, Nakai, ko e tama ne moui ko e haku a tama a ia, ka ko e tama ne mate ko e tama hau a ia; ka e pehe age e taha, Nakai; ko e tama ne mate ko e hau a ia, ka ko e tama ne moui ko e haku a ia; kua vagavagahau pihia a laua ki mua he patuiki.
23 Ti pehe age ai e patuiki, Kua pehe mai e taha, Ko e haku tama nai kua moui, ka ko e tama ne mate ko e tama hau a ia, ka e pehe mai e taha Nakai; ko e tama ne mate ko e hāu a ia, ka ko e tama ne moui ko e haku a ia.
24 Ti pehe age e patuiki, Kia ta mai e pelu. Ti ta mai ai e lautolu e pelu ki mua he patuiki.
25 Ti pehe age e patuiki, Kia ihi ua e tama moui, mo e ta age ai e taha fahi ke he taha, ka e taha fahi ke he taha.
26 Ti vagahau mai e fifine hana e tama kua moui ke he patuiki, kua pehe mai, (ha kua hofihofi noa hana fakaalofa ke he tama hana,) Ko e iki na e, kia age kia ia e tama kua moui, aua neke tamate e koe a ia. Ka e pehe age e taha, Ua ta mai a ia kia au, ti aua neke ta atu kia koe, ka e ihi ua a ia.
27 Ti tali age ai he patuiki, kua pehe age, Kia uta a e tama moui kia ia, aua neke keli a ia, ko e hana matua fifine hanā.
28 Kua logona he Isaraela oti e fakafiliaga ne eke he patuiki, ti matakutaku ai a lautolu ke he patuiki; ha kua kitia e lautolu ne ha ha ia ia e iloilo mai he Atua ke fakafili ai.