1 Tau Patuiki 6:1-38
6 KO e fa e teau e tau ti valugofulu e tau tali he o mai ai e fanau a Isaraela he motu ko Aikupito, ko e tau fa haia he patuiki ai a Solomona i Isaraela, ke he mahina ko Tifi ko e mahina ua haia, ne kamata ai e ia ke eke e fale a Iehova.
2 Ko e fale foki ne eke he patuiki ko Solomona ma Iehova ko e onogofulu e kupita hana loa, ti uafulu e kupita hana laulahi, ti tolugofulu e kupita hana tokoluga.
3 Ko e fakamaluaga foki ki mua he fale ko e faituga ko e uafulu e kupita hana loa, kua tatai ni mo e laulahi he fale; ti hogofulu e kupita hana laulahi ki mua he fale.
4 Ti eke ai e ia ma e fale e tau fakamaama fakalava pa mau.
5 Ti eke e ia ki tua he pa ke piki atu ke he kaupa he fale e tau poko ke agaagai ai; ko e tau kaupa he fale ne agaagai ai ke he faituga mo e mena ke vagahau mai ai. Kua eke ai e ia e tau poko ke agaagai ai.
6 Ko e poko i lalo, ko e lima e kupita hana laulahi, ko e mena i loto ko e ono e kupita hana laulahi; ko e mena ne toluaki, ko e fitu e kupita hana laulahi; ha kua fakalautote ai e ia e kaupa he fale ki fafo ke takai ai, ke aua neke fakamau ai e tau akau fakalava ke he kaupa he fale.
7 Ko e fale foki kua ati kua ati ai ke he tau maka kua mau he taute ke he mena ne ta mai ai, ti nakai logona ai e hamala, po ke toki, po ke taha mena lapatoa ke he fale ka kua ta ai.
8 Ko e gutuhala he tau poko he lotoga, ha ha i ai ia ke he fahi matau he fale; ti o hake a lautolu ke he hala papahi ne takai ai ke he tau poko he lotoga; ti o hake ai a lautolu mai he tau poko he lotoga ke he tau poko ne tolu aki.
9 Ti ta e ia e fale, mo e fakaoti ai e ia; ti ato aki e ia e fale ke he tau akau fakalava mo e tau lapa arasi.
10 Kua eke foki e ia e tau poko ke he tau fahi oti he fale, ne taki lima e kupita e tokoluga he tau poko ia; ti fakapiki ai ke he fale ke he tau akau arasi.
11 Kua vagahau mai a Iehova kia Solomona, kua pehe mai,
12 Ko e haku tau kupu ke he fale nai kua ta e koe hanai; kaeke ke fano ai a koe ke he haku tau fakatufono, mo e eke e koe haku a tau fakafiliaga, mo e omaoma a koe ke he haku a tau poaki oti, mo e fano ai a koe; ti fakamau ai e au kia koe haku tau kupu oti ne vagahau atu ai e au ke he matua hau ko Tavita.
13 To nofo foki au fakalataha mo e fanau a Isaraela, ti nakai tiaki au haku motu ko Isaraela.
14 Kua eke e Solomona e fale, ti mau ai ni.
15 Ti eke ai e ia e tau kaupa he fale i loto ke he tau lapa arasi, ke kamata mai he kelekele he kaupa he fale ke hoko hake ki luga; kua ufi aki e ia ki loto ke he tau akau, ti laupapa ai e ia e fale ke he tau lapa perosi.
16 Kua eke foki e ia uafulu e kupita ke he fahi fale ki tua ke he tau lapa arasi, ke kamata mai i lalo he kaupa ke hoko hake ki luga hana; ti taute ai e ia ki loto ke eke mo mena ke vagahau mai ai, ke eke mo mena tapu ue atu.
17 Ko e fale foki, ko e faituga haia ki mua, ko e fagofulu e kupita hana loa.
18 Kua ta ai ke he tau arasi ke he loto fale e tau vine vao, katoa mo e tau fiti lakau kua matala, ko e tau arasi oti nakai kitia ai ha maka.
19 Kua taute foki e ia ke he fale ki loto e mena ke vagahau mai ai, ke tuku ai e puha he maveheaga a Iehova.
20 Ko e mena ke vagahau mai ai ne uafulu e kupita hana loa ia ki mua, ti uafulu e kupita hana laulahi ti uafulu e kupita hana tokoluga; ti fakakili ai e ia ke he auro mitaki; kua fakakili foki e ia e fatapoa arasi.
21 Ti fakakili ai e Solomona e fale ki loto ke he auro mitaki; ti puipui aki e ia ke he tau filifili auro ki mua he mena ke vagahau mai ai, kua fakakili aki foki ia ke he auro.
22 Kua fakakili aki foki e ia e fale oti ke he auro, kua katoatoa ai e fale oti; kua fakakili aki foki ke he auro e fatapoa ne tata age ke he mena ke vagahau mai ai.
23 Kua eke foki e ia ki loto he mena ke vagahau mai ai e tau kerupi ne ua, ke he akau ko e olive, ne hogofulu e kupita e tokoluga ha laua.
24 Ne lima foki e kupita e tapakau he taha kerupi ti lima foki e tapakau he taha kerupi; ke kamata mai he matahiku he taha tapakau ke hoko atu ke he matahiku he taha tapakau ne hogofulu e kupita.
25 Ne hogofulu foki e kupita he kerupi ne uaaki; ko e fafati taha ni ha laua, kua tino fakalataha foki e tau kerupi ne ua.
26 Ne hogofulu e kupita e tokoluga he taha kerupi; ti pihia foki e taha kerupi.
27 Ti tuku ai e ia e tau kerupi ke he lotofale he fale i loto; kua fofola e tau tapakau he tau kerupi; kua pipiki atu e tapakau he taha ke he taha kaupa he fale, mo e tapakau he taha kerupi ne pipiki atu ai ke he taha kaupa he fale, ti tuuta ai e tau tapakau ha laua ke he lotoga he fale.
28 Kua fakakili aki foki e ia e tau kerupi ke he auro.
29 Kua ta foki e ia ke he tau kaupa oti he fale ke takai ai e tau kerupi kua ta, mo e tau pāma, mo e tau fiti lakau kua matala, ki tua katoa foki mo mua.
30 Kua fakakili aki foki e ia ke he auro e tau laupapa he fale i loto katoa foki mo e tua.
31 Ti eke e ia ma e puipui he mena ke vagahau mai ai e tau gutuhala he akau ko e olive; ko e akau fakalavi i luga mo e na pou he gutuhala, ko e maga ne limaaki e kaupa he fale haia.
32 Ti eke ai e ia ua e gutuhala he akau ko e olive; ti ta ai e ia e tau kerupi kua ta, mo e tau pama, mo e tau fiti lakau kua matala, ti fakakili aki ai ke he auro; ti fofola ai e ia e auro ke he tau kerupi mo e tau pama.
33 Kua eke pihia foki e ia e na pou ma e gutuhala he faituga ke he akau ko e olive ke he maga ne fa aki e kaupa he fale;
34 Ko e tau gutuhala foki ne ua ko e akau perosi ia; ko e fahi ua e taha gutuhala kua fakalafiua, ti fahi ua e taha gutuhala kua fakalafiua.
35 Ti ta ai e tau kerupi, mo e tau pama, mo e tau fiti lakau kua matala; ti fakakili aki ai e ia ke he auro kua fakalata ai ke he tau mena kua ta.
36 Ti eke e ia e pa ki loto ke he tau maka tātā ne atu tolu, mo e atu akau fakalava ko e tau arasi kua tātā.
37 Ko e tau fa, ko e mahina Sifi ne tuku ai e tau fakaveaga he fale a Iehova;
38 Ko e tau hogofulu ma taha, ko e mahina ko Pula, ko e mahina valu haia, ne mau ai e fale he taute mo e tau mena oti ha ha i ai, ke tuga foki ne tau mena oti kua fakatai mai. Ko e fitu e tau ne ta ai e ia e fale.