1 Tesalonia 4:1-18
4 HANAI, ko e tau matakainaga na e, ko e kupu hanai kua toe, kua ole atu a mautolu mo e tomatoma atu kia mutolu ha ko e Iki ko Iesu, tuga he talia mai e mutolu ia mautolu e tonu he puhala kua lata ke o fano ai a mutolu ke fakafiafia atu ai ke he Atua, kia au atu he fakamalolo a mutolu ki ai.
2 Ha kua iloa e mutolu e tau poaki ia ne tuku atu ai e mautolu kia mutolu mai he Iki ko Iesu.
3 Ko e finagalo foki he Atua hanai, kia fakatapu a mutolu, kia fakamamao a mutolu mo e feuaki;
4 Kia takitokotaha a mutolu mo e iloa ke moua e ia ni hana hoana mo e fakatapu mo e lilifu,
5 Ua moua mo e foli kelea he manako lahi, tuga he tau motu kehe kua nakai iloa e Atua;
6 Aua neke mahani hepehepe taha, po ke fakavai hana matakainaga ke he mena nai; ha ko e Iki a ia kua taui atu e tau mena oti nai, tuga he tala atu fakamua ai a mautolu, mo e talahau fakatonu atu kia mutolu.
7 Ha ko e mena nakai ui ai a tautolu he Atua kia mahani kelea ai, ka kia fakatapu ai.
8 Hanai, ko ia kua fakalialia, nakai fakalialia a ia ke he tagata ka ko e Atua ni, ko ia foki kua foaki mai hana Agaga Tapu kia tautolu.
9 Ka e nakai aoga ke tohi atu kia mutolu ha kupu ke he fakaalofa ke he tau matakainaga; ha kua ako tuai a mutolu he Atua he feofanaki.
10 Ha ko e mena foki kua eke pihia a mutolu ke he tau matakainaga oti kana ha ha i Maketonia oti. Ka e tomatoma atu a mautolu kia mutolu, ko e tau matakainaga na e, kia au atu e fakamalolo ki ai;
11 Mo e lalilali atu a mutolu ke nonofo fakatekiteki, kia eke ha mutolu ni a feua, mo e gahua ke he tau lima ha mutolu, tuga ne tala atu ai a mautolu kia mutolu;
12 Kia o fano a mutolu mo e mahani fulufuluola ki mua ha lautolu i tua, kia nakai nonofogati foki a mutolu ke he taha mena taha.
13 Kua loto au ke iloa e mutolu, ko e tau matakainaga na e, e tonu kia lautolu kua momohe, kia nakai momoko a mutolu, tuga ne falu kua nakai ha i ai e amaamanaki.
14 Ha ko e mena kaeke ke talia e tautolu kua matulei a Iesu mo e liu foki tu mai, ti pihia foki he ta mai he Atua fakalataha mo ia a lautolu kua momohe ha ko Iesu.
15 Kua tala atu foki e mautolu e mena nai kia mutolu ke he kupu he Iki, ko tautolu kua momoui mo e toe ka haele mai e Iki, nakai mumua a tautolu kia lautolu kua momohe.
16 Ha ko e mena haele hifo e Iki ni mai he lagi, mo e kalaga, mo e leo he agelu ne mua, mo e pu he Atua; to tutu fakamua mai a lautolu kua mamate ha ia Keriso;
17 Ti hamutia ai a tautolu kua momoui mo e toe, fakalataha mo lautolu ke he tau aolagi, ke fonofono e Iki ke he pulagi likoliko, ti fakalataha mau a tautolu mo e Iki.
18 Haia ni, kia fefakamafanaaki a mutolu ke he tau kupu na.