1 Tesalonia 5:1-28
5 KA ko e tau vaha mo e tau tau, nakai aoga kia mutolu, ko e tau matakainaga na e, ke tohi atu ai e au kia mutolu.
2 Ha kua iloa maliali e mutolu, ko e aho he Iki, to hoko mai ia ke tuga e kaiha ke he po;
3 Ha ko e mena ka pehe a lautolu, Kua mafola, kua nakai haofia, ti hokotia fakalutukia ai a lautolu he mahaikava, tuga ne mamahi fanau ke he fifine kua fatu, ti nakai fakai ke hao a lautolu.
4 Ka ko mutolu, ko e tau matakainaga na e, nakai nofo a mutolu ke he pouli, kia moua ai a mutolu e aho ia tuga e kaiha.
5 Ko e tau tagata he maama a mutolu oti kana, mo e tau tagata he aho; nakai ha he po a tautolu po ke pouli.
6 Ko e hanai, aua neke momohe a tautolu tuga ne falu, ka kia mataala a tautolu mo e nonofo fakalatalata.
7 Ha ko lautolu kua momohe, kua momohe a lautolu ke he po; ko lautolu foki kua inu ke konahia, kua konahia a lautolu ke he po;
8 Ka ko tautolu, ko e tau tagata he aho, kia nonofo fakalatalata a tautolu, kia tapulu ai a tautolu ke he ufikahokaho, ko e tua mo e fakaalofa haia, mo e potiki tau, ko e amaamanaki haia ke he fakamouiaga.
9 Ha kua nakai kotofa he Atua a tautolu ke he ita, ka kia moua a moui ha ko e Iki ha tautolu ko Iesu Keriso,
10 Ko ia ne matulei ke hukui aki a tautolu, kia momoui ai a tautolu fakalataha mo ia, po ke mataala a tautolu, po ke momohe a tautolu.
11 Ko e mena ia kia fetomaaki a mutolu, mo e fefakamafanaki a mutolu, tuga foki he eke e mutolu.
12 Kua ole atu a mautolu kia mutolu, ko e tau matakainaga na e, ke iloa e mutolu a lautolu kua gahua kia mutolu, mo e pule kia mutolu ke he tau mena he Iki, mo e tomatoma atu kia mutolu;
13 Kia fakahelehele fakalahi a lautolu mo e fakaalofa, ha ko e gahua ha lautolu. Kia nonofo a mutolu mo e mafola.
14 Kua ole atu a mautolu kia mutolu, ko e tau matakainaga na e, kia tomatoma age a mutolu kia lautolu kua mahani hemu, kia fakamafana a lautolu kua manava tote, kia lagomatai kia lautolu kua lolelole, kia fakauka ke he tau tagata oti kana.
15 A mutolu neke taui atu e taha e kelea ke he kelea ke he taha tagata, ka kia fakamalolo a mutolu nakai noa ke he mena mitaki, ko e taha kia taha, katoa mo e tau tagata oti kana.
16 Kia hagaaki fiafia mau a mutolu.
17 Kia liogi nakai noa.
18 Kia fakaaue a mutolu he tau mena oti kana, ha ko e finagalo he Atua ia kia mutolu kia Keriso Iesu.
19 Ua tamate e mutolu e Agaga.
20 Aua neke fakateaga ke he tau perofetaaga.
21 Kia kamatamata e tau mena oti, kia taofi e tau mena mitaki ke mau.
22 Kia fakamamao a mutolu mo e tau mena kehekehe oti kua kelea.
23 Kia fakatapu fakaoti a mutolu he Atua ni hana e monuina; kia leveki ke katoatoa ha mutolu a agaga, mo e loto, katoa mo e tino, kia nakai fai mena ke talahaua kelea ai, ato haele mai ha tautolu a Iki ko Iesu Keriso.
24 Kua fakamoli ni a ia kua ui kia mutolu, ko ia foki ke eke ai ni.
25 Ko e tau matakainaga na e, kia liogi a mutolu ma mautolu.
26 Kia fakaalofa age ke he tau matakainaga oti kana ke he figita tapu.
27 Kua tala atu fakalahi au kia mutolu ke he higoa he Iki ke totou e tohi nei ke he tau matakainaga tapu oti kana.
28 Kia ha ha ia mutolu e fakaalofa noa he Iki ha tautolu ko Iesu Keriso. Amene.