1 Timoteo 1:1-20
1 KO au ko Paulo, ko e aposetolo a Iesu Keriso, kua lata mo e poakiaga he Atua ha tautolu a Fakamoui, mo e Iki ko Iesu Keriso ha tautolu a amaamanakiaga;
2 Ko e haku a tohi hanai kia Timoteo ko e haku a tama moli ke he tua; kia ha ha ia koe e fakaalofa noa, mo e fakaalofa, mo e monuina mai he Atua ha tautolu a Matua, katoa mo Keriso Iesu ha tautolu a Iki.
3 Tuga ne ole atu au kia koe, ka kua fina age au ki Maketonia, ke nofo a koe i Efeso, kua ole atu pihia ainei, kia hataki atu ke he falu, ua fakaako e lautolu e tau kupu kehe;
4 Aua foki neke taofi ke he tau tala tuai, mo e tau matohiaga kua nakai fai fakahikuaga, ko e tau mena ia ke tutupu ai e tau taufetoko, ka e nakai ko e fakamafanaaga mai he Atua ha ha he tua.
5 Ka ko e fakahiku he poaki ko e fakaalofa ia mai he loto mea, mo e loto manamanatu hifo mitaki, mo e tua fakamoli;
6 Kua hehe tuai e falu mai he mena ia, kua mafoki age a lautolu ke he tau kupu nakai aoga;
7 Kua fia eke a lautolu mo tau akoako ke he fakatufono, ka e nakai iloa e lautolu e tau mena kua vagavagahau ki ai, po ke tau mena kua talahau fakalahi ai e lautolu.
8 Kua iloa e tautolu ko e mena mitaki e fakatufono, kaeke ke eke e taha e tau mena kua lata ki ai;
9 Kua iloa e tautolu e mena nai, nakai ko e tagata tututonu kua fakatu ai e fakatufono, ka ko lautolu ni kua holifono mo lautolu kua faliuliu, ko lautolu kua kolokolovao mo lautolu kua hala, ko lautolu kua mahani kelea mo lautolu kua matahavala, ko lautolu kua keli e tau matua tane mo lautolu kua keli e tau matua fifine, ko lautolu kua keli tagata,
10 Ko lautolu kua feuaki, ko lautolu kua eke e mahani sotoma, ko lautolu kua kaiha tagata, ko lautolu kua pikopiko, mo lautolu kua omonuo pikopiko; kaeke foki ha i ai ha mena kua toe kua totoko mai ke he kupu fakaako kua tonu.
11 Kua lata mo e vagahau mitaki he lilifu, he Atua monuina, kua tuku mai kia au.
12 Kua fakaaue atu foki au kia Keriso Iesu ha tautolu a Iki, ko ia kua fakamalolo kia au, he manatu a ia kua fakamoli au, ti kua kotofa e ia au ke he feua nai;
13 Ko au ne vagahau kelea fakamua, to favale, to fakakelea atu; ka kua ofania au, ha kua eke pihia e au ke he haku a nakai iloa, mo e nakai talia fakatonu.
14 Kua homo foki e lahi he fakaalofa noa he Iki ha tautolu, ne tupu mai ai haku a tua katoa mo e fakaalofa ha ha ia Keriso Iesu.
15 Ko e kupu moli hanai, kua lata ke talia fakaoti ni ne haele mai a Keriso Iesu ke he lalolagi ke fakamomoui e tau tagata hala; ko au nai kua hala kua mua kia lautolu.
16 Ka ko e hanai e mena ne ofania ai au, kia fakakite fakamua ia au e Iesu Keriso e fakauka lahi ni kia eke au mo fakafifitaki kia lautolu kua nakai la tua kia ia, ke moua ai e moui tukulagi.
17 Hanai, kia ha he Patuiki tukulagi, ko ia ke moui tukulagi, ko ia kua nakai kitia, ko e Atua iloilo ne tokotaha, kia ha ha ia ia e lilifu, katoa mo e fakahekeaga tukulagi tukumuitea. Amene.
18 Haku tama na e, ma Timoteo, kua tuku atu e au e poaki nai kia koe, kua fakalata ke he tau kupu ne talahaua tuai kia koe, kia tau ai a koe ke he tau mitaki;
19 Ha ha ia koe e tua, mo e loto manamanatu hifo mitaki, kua tiaki ai e falu, ti tukia moumou a lautolu ke he tua;
20 Ha i ai a Humenaio mo Alesana, kua tuku atu e au a laua kia Satani, kia kite a laua he akonaki, aua neke vagahau kelea.