2 Ioane 1:1-13
1 KO au ko e patu, ko e haku a tohi hanai ke he Iki fifine ne fifili mo e fanau hana, kua fakaalofa fakamoli au ki ai, ka e nakai ko au hokoia, ka ko lautolu oti kua iloa e kupu moli;
2 Ha ko e kupu moli kua toka mau ki loto ia tautolu, to ha ia tautolu foki tukulagi.
3 Kia toka ia mutolu e fakaalofa noa, mo e fakaalofa, mo e monuina mai he Atua e Matua, katoa mo e Iki ko Iesu Keriso, ko e Tama he Matua, ke he fakamoli mo e fakaalofa.
4 Kua lahi haku a fiafia he iloa e au e falu a fanau hāu kua eke e mahani he kupu moli, tuga ne poaki ne moua mai e tautolu mai he Matua.
5 Hanai, kua ole atu au kia koe, ko e iki fifine na e, (nakai tuga ne poaki fou e mena kua tohi atu ai e au kia koe, ka ko e poaki ia ne toka ai ia tautolu tali mai he kamataaga,) kia feofanaki a tautolu.
6 Ko e fakaalofa foki hanai, kia mahani a tautolu ke lata mo e tau poaki hana; ko e poaki hanai, tuga he fanogonogo ki ai a mutolu, tali mai he kamataaga, kia mahani a mutolu ke lata ki ai.
7 Ha ko e mena tokologa a lautolu kua fakahehe kua o atu ke he lalolagi, ko lautolu kua nakai talahau kua haele mai a Iesu Keriso ke he tino; ko e fakahehe a ia mo e anetikeriso.
8 A mutolu kia mutolu, neke moumou e tau gahua ne eke e mautolu, ka kia moua e mautolu e taui katoatoa.
9 Ko lautolu oti kua holifono, ka e nakai tumau ke he kupu kia Keriso, nakai ha ia lautolu e Atua; ka ko e tagata ne tumau ke he kupu kia Keriso, ha ia ia e Matua katoa mo e Tama.
10 Kaeke kua fina age kia mutolu taha, ka e nakai ta age e kupu nai, aua neke talia a ia ke he fale ha mutolu, aua foki neke tala age a mutolu kia monuina;
11 Ha ko ia kua tala age kia ia kia monuina kua kau fakalataha mo ia ke he hana tau gahua kelea.
12 Loga e tau mena ha ha ia au ke tohi atu ai kia mutolu, ka e nakai fia tohi atu e au ke he laupepa mo e vaitohi; ka e amaamanaki au ke fina atu au kia mutolu, kia fevagavagahauaki a tautolu, kia katoatoa ai ha tautolu a fiafia.
13 Kua fakaalofa atu kia koe e fanau he hau a matakainaga kua fifili. Amene.