2 Korinito 1:1-24
1 KO au ko Paulo, ko e aposetolo a Iesu Keriso ke he finagalo he Atua, mo e matakainaga ko Timoteo, ko e tohi hanai ke he ekalesia he Atua ha ha i Korinito, katoa foki mo e tau tagata oti kana kua fakatapu ha ha i Akaia oti.
2 Kia ha ha i ai ia mutolu e fakaalofa noa mo e monuina mai he Atua, ko e Matua ha tautolu, katoa mo e Iki ko Iesu Keriso.
3 Kia fakaaue ke he Atua, ko e Matua he Iki ha tautolu ko Iesu Keriso, ko e Matua hana e fakaalofa hofihofi, ko e Atua foki hana e tau fakamafanaaga oti,
4 Ko ia kua fakamafana mai a mautolu ke he ha mautolu a tau matematekelea oti, kia maeke ia mautolu ke fakamafana age kia lautolu ha i ai ha matematekelea ke he fakamafanaaga kua fakamafanatia ai he Atua a mautolu.
5 Ha ko e mena, tuga he fakalahi mai kia mautolu e tau mamahi ha ko Keriso, ti pihia foki he fakalahi mai ha mautolu a fakamafanatia mai ia Keriso.
6 Kaeke kua matematekelea a mautolu, kua pihia ha ko e fakamafanaaga mo e fakamouiaga ha mutolu, ha ne gahua ni mo e fakauka ke he tau mena mamahi ia kua mamahi ai a mautolu; kaeke ke fakamafanatia a mautolu, ti pihia ha ko e fakamafanaaga mo e fakamouiaga ha mutolu.
7 Kua tumau foki ha mautolu a tua kia mutolu; ha kua iloa e mautolu, tuga he igatia a mutolu mo e mamahi, to igatia pihia foki mo e fakamafanatia.
8 Hanai, ko e tau matakainaga na e, kua loto a mautolu ke iloa e mutolu e matematekelea ne hoko mai kia mautolu i Asia, ne mua hana mamafa nakai maeke ni a mautolu ke he malolo ha i ai ia mautolu, ato manatu ai a mautolu ko e mamate ne fai.
9 Ka kua ha ha ia mautolu e manatu ke he mate, neke tua a mautolu kia mautolu ka e nakai ke he Atua, ko ia kua liu foki fakatu a lautolu kua mamate.
10 Ko ia ne laveaki a mautolu mai he mate kua lahi ni, ha ne laveaki agaia foki, kua tua foki a mautolu kia ia ke laveaki mau a mautolu.
11 Ko mutolu foki kua felagomataiaki mai ke he liogi ma mautolu, kia fakaaue atu e tokologa ha ko e fakaalofa noa kua hoko mai kia mautolu ha ko e liogi he tau tagata tokologa
12 Ko e hanai foki e mena kua fiafia ai a mautolu, ko e talahau he tau loto manamanatu ha mautolu, ko e fakamoli, mo e loto mitaki ke he Atua, nakai ko e iloilo he lalolagi, ka ko e fakaalofa noa he Atua, ne eke ai e mahani ha mautolu ke he lalolagi, ti au atu ni kia mutolu.
13 Ha kua nakai tohi atu e mautolu ha mena kehe kia mutolu, ka ko e tau mena kua totou ai e mutolu mo e talia ai e mutolu; kua tua foki au kia mutolu ke talia ai ato hohoko ke he fakahikuaga;
14 Tuga foki he talia e mutolu a mautolu ka e nakai katoatoa ki ai, ko mautolu foki kua hula ai a mutolu, tuga na mutolu kua hula ai a mautolu ke he aho he Iki, ko Iesu.
15 Ko e tuaaga foki hanai ne manatu ai au ke fina atu fakamua kia mutolu, kia moua lagaua e mutolu e mena fakaalofa;
16 To fina atu ke he puhala ha mutolu ki Maketonia, ti liu mai foki kia mutolu i Maketonia, ti fakafano ai e mutolu au ki Iutaia.
17 Hanai, ne hepehepe kia haku a manatu he fifili e au pihia? po ke fifili kia e tau mena kua fifili e au ke fakalata ke he tino, kia ha ia au e ē ē, mo e nakai, nakai?
18 Ka kua fakamoli e Atua, nakai ko e ē mo e nakai, ha mautolu a kupu kia mutolu.
19 Ha ko e tama he Atua, ko Iesu Keriso, ne fakamatala e mautolu kia mutolu, ko au mo Siluano mo Timoteo, nakai ko e ē mo e nakai a ia, ka ko e ē kia ia.
20 Ha ko e tau kupu oti ne talahau he Atua, kua ē ia kia ia, ko e amene foki kia ia, kia tupu ai e fakahekeaga ke he Atua ha ko mautolu.
21 Ko ia kua fakatumau a mautolu fakalataha mo mutolu kia Keriso, kua fakauku foki a tautolu, ko e Atua haia;
22 Ko ia foki kua fakamau fakamailoga a tautolu, mo e foaki mai e fakamoli he Agaga ke he tau loto ha tautolu.
23 Kua ui atu foki au ke he Atua ke fakahala ai e ia haku a agaga, ko e haku a fakahelehele kia mutolu nakai liu foki fina atu ai au ki Korinito.
24 Nakai ko e mena fia pule a mautolu ke he ha mutolu a tua, ka ko e tau lagomatai a mautolu ke he ha mutolu a fiafia; ha ko e tua kua tumau ai a mutolu.