2 Korinito 10:1-18
10 KO au ni ko Paulo, kua fakatokolalo ka nofo ai au ia mutolu, ka e fakamalolo ka nakai nofo ni ai ia mutolu, kua ole atu au kia mutolu ke he mahani molu mo e totonu a Keriso;
2 Kua ole atu au neke fakamalolo atu au ka ha i ai au ia mutolu mo e fakamalolo ne manatu ai au ke fakamalolo atu ke he falu, ko lautolu kua manatu kia mautolu kua omaoma a mautolu ke he tino.
3 Ha ko e mena pete ni he omaoma a mautolu ke he tino, nakai tau a mautolu fakalata ke he tino;
4 Ha ko e tau kanavaakau he tau ha mautolu, nakai ko e tau mena he tino ia, ka ko e malolo ki mua he Atua ke ulu ai e tau kolo;
5 Kua ulu ki lalo e tau mahalohaloaga, mo e tau mena fakatokoluga oti kua hemu ke he maama ke he kupu he Atua, kia mahala e tau manatu oti ke omaoma kia Keriso.
6 Kua nonofo tauteute foki a mautolu ke taui atu kia lautolu oti kua liuliu ka katoatoa ai ha mutolu a omaoma.
7 Kua kitekite kia a mutolu ke he tau mena he tino? Kaeke kua taofi taha ko e tagata a Keriso a ia, kia liu foki manatu hifo a ia, tuga a ia ko e tagata a Keriso, kua pihia foki a mautolu ko e tau tagata a Keriso.
8 Ha ko e mena ane mai au atu haku a hula ha ko e pule ha mautolu, kua foaki mai ai he Iki kia mautolu ke ati hake, ka e nakai ke ulu a mutolu ki lalo, po kua nakai ma ai au;
9 Neke eke au tuga ne tagata fakamatakutaku atu kia mutolu ke he tau tohi.
10 Ha kua pehe mai falu, Kua mamafa hana tau tohi mo e malolo, ka ko e hana tino ka ha i ai kua lolelole ia, mo e hana kupu kua fakateaga ia.
11 Kia manatu he tagata ia e mena nai, tuga ne kupu ha mautolu ke he tau tohi ka nakai ha i ai ia mutolu, to pihia foki ke he tau mahani ka nonofo ai a mautolu.
12 Ha kua nakai maeke ia mautolu ke fakalataha po ke fakataitai a mautolu kia falu, ko lautolu kua fakaheke a lautolu kia lautolu; ha ko lautolu kua fafati e lautolu a lautolu, mo e fakataitai a lautolu kia lautolu, kua nakai iloilo a lautolu.
13 Ka e nakai hula a mautolu ke he tau mena nakai fafati mai, ka e fakalata ke he fafati he katofia kua kotofa mai he Atua kia mautolu, ko e fafati haia ke hoko atu kia mutolu.
14 Ha ko e mena nakai fafati a mautolu ke to atu, tuga he mena nakai hoko atu a mautolu kia mutolu, ha kua hohoko atu tuai a mautolu kia mutolu ke he vagahau mitaki a Keriso.
15 Nakai hula a mautolu ke he tau mena kua nakai fafati mai, ko e tau gahua ia he falu a tagata; ka kua amaamanaki a mautolu ke fakalalahi ai a mautolu ia mutolu ke fakalata ke he ha mautolu a katofia, ke au atu ai ka tupu ha mutolu a tua,
16 Ke fakamatala atu ai e vagahau mitaki ke he tau motu he fahi atu ha mutolu, ka e nakai hula a mautolu ke he gahua he katofia he taha tagata kua oti he taute.
17 Ka ko ia kua hula kia hula a ia ke he Iki.
18 Ha kua nakai talia a ia kua fakaheke kia ia ni, ka ko ia kua fakaheke he Iki.