2 Korinito 11:1-33
11 KO e haku a manako kia fakauka fakatote mai a mutolu kia au ke he haku a goagoa, ka kua fakauka tuai a mutolu kia au.
2 Ha ko e mena fakamakutu au kia mutolu mo e fakaeneene kua lata mo e Atua; ha kua fakatutane tuai e au a mutolu ke he tane ne tokotaha, kia tuku atu e au a mutolu, ko e tamafine tote fakamoli kia Keriso.
3 Ka kua matakutaku au, neke tuga he fakavai he gata a Eva ke he hana lagatau, ti pihia foki he fakakelea e ia ha mutolu a tau manatu kia nakai fakamoli kia Keriso.
4 Ha ko e mena kaeke kua fakamatala e ia kua fina atu taha lesu kua kehe mo ia ne fakamatala atu ai e mautolu, po ke talia e mutolu a agaga kua kehe mo e agaga ne talia tuai e mutolu, po ke vagahau mitaki kua kehe mo ia kua talia tuai e mutolu, kua mitaki he fakauka a mutolu ki ai.
5 Ha ko e haku a manatu nai, nakai muikau au ke he taha mena ke he tau aposetolo kua mumua.
6 Kaeke foki kua goagoa au ke he tau kupu, nakai pihia ke he maama; ka kua oti tuai he fakakite atu a mautolu kia mutolu ke he tau mena oti.
7 Kua hala kia au he fakatokolalo e au a au kia fakamatalahi a mutolu, ha kua fakamatala atu e au kia mutolu e vagahau mitaki he Atua mo e nakai totogi mai?
8 Ne fofo e au e tau mena he falu a ekalesia, he talia e au e totogi kia fekafekau atu ai au kia mutolu.
9 Ko e vaha ne nofo ai au ia mutolu mo e nofogati, nakai fakamamafa e au kia taha; ha ko e tau mena ne nofogati ai au, ne ta mai ai he tau matakainaga ne o mai i Maketonia; ne fakaeneene au neke fakamamafa kia mutolu ke he taha mena taha, to fakaeneene foki au ki ai.
10 Ha ha ia au e kupu moli a Keriso, to nakai fakamate he taha au ke he hula nai ke he tau motu ko Akaia.
11 Ko e ha kia? nakai kia fai fakaalofa au kia mutolu? Kua fioia he Atua.
12 Ka ko e mena kua eke e au, to eke mau e au e mena ia, kia motuhia e au e lagatau ha lautolu, kua fia moua e lagatau, kia iloa ai a lautolu tuga na mautolu ke he mena kua hula ai a lautolu.
13 Ha ko lautolu, ko e tau aposetolo pikopiko a lautolu, ko e tau ekegahua fakavai, kua faliu e lautolu a lautolu mo tau aposetolo a Keriso.
14 Nakai ko e mena foki ia ke ofo ai, ha ko Satani ni kua faliu e ia a ia mo agelu he maama.
15 Haia ni, nakai ko e mena lahi kaeke ke faliu hana tau fekafekau ke tuga e tau fekafekau he tututonu; ko e ha lautolu a fakahikuaga, tuga e tau gahua ha lautolu haia.
16 Kua tala atu foki e au, aua neke manatu mai taha kia au, ko e goagoa au; kaeke kua manatu pihia, kia talia mai e mutolu au po ke goagoa, kia hula fakatote ni au.
17 Ko e haku a tala atu nai, nakai tala atu e au mai he Iki, ka e tuga mo e goagoa ke he fakamalolo nai ke he hula.
18 Ha kua hula e tokologa ke he tau mena ha he tino, to hula ai foki au.
19 Ha kua fakauka a mutolu mo e fiafia ke he tau tagata goagoa, ka kua iloilo a mutolu.
20 Nukua fakauka a mutolu, kaeke kua fakatupa he taha a mutolu, po ke kai he taha a mutolu, po ke tauhele he taha a mutolu, kaeke ke fakatokoluga taha, po ke pokipoki he taha ha mutolu a tau mata.
21 Kua talahau atu au ke he fakakelea tuga mo e mena kua lolelole ai a mautolu; kaeke kua fakamalolo e taha ke he taha mena, (kua tala atu au mo e goagoa,) ko au foki, to fakamalolo au ki ai.
22 Ko e tau tagata Heperu kia a lautolu? ko au foki haia. Ko e tau tagata Isaraela kia a lautolu? ko au foki ia. Ko e fanau a Aperahamo kia a lautolu? ko au foki ia.
23 Ko e tau fekafekau a Keriso kia a lautolu? (kua vagahau atu au poke goagoa,) kua homo atu au. Kua homo ke he tau gahua, kua au atu he loga e tau fahiaga, kua loga ue atu e tau fale puipui kua tuku ai au, kua lagaloga ne mate au,
24 Lagalima ne fahi he tau tagata Iutaia au, ne takitolugofulu ma hiva e tau ta,
25 Lagatolu ne fahi au ke he tau lakau, lagataha ne taulitimaka au, ne tolu e tau foulua ne pe ha i ai au, kua katoa e po mo e aho ne ha i ai au ke he moana;
26 Ne loga haku a tau fenoga, ne hao fetamaki au ke he tau vailele, ne hao fetamaki au ke he tau fofo mena, ne hao fetamaki au he tau tagata he haku a motu, ne hao fetamaki au ke he tau tagata kehe, ne hao fetamaki ke he māga, ne hao fetamaki au ke he tutakale, ne hao fetamaki au ke he tahi, ne hao fetamaki au ke he he tau matakainaga pikopiko?
27 Ne ha i ai au ke he tau gahua mamafa mo e mamahi, mo e tau mataalaga mau, mo e fia kai mo e fia inu, mo e tau fakakanopogi mau, mo e makalili, mo e nakai fai tapulu.
28 Tokai e tau mena kua toe, ka ko e mena kua fakamamafa kia au ke he tau aho oti, ko e kapaletu ha ko e tau ekalesia oti.
29 Po ko hai kia kua lolelole, ti nakai lolelole ai au? Po ko hai kua tupetupe, ti nakai mamahi ai au?
30 Kaeke kua lata ke hula au, ti hula au ke he tau mena kua lolelole ai au.
31 Ko e Atua, ko e Matua he Iki ha tautolu ko Iesu Keriso, ko ia ha i ai e fakahekeaga tukulagi, kua fioia e ia kua nakai pikopiko au.
32 Ha i Tamaseko, ko e iki ne pule ki ai mai Areta e patuiki, ne leoleo e ia e māga ko Tamaseko, ne fia tapaki au;
33 Ne tuku hifo au ke he kato ke he fakamaama he pa, mo e hao ai au ke he hana tau lima.