2 Korinito 12:1-21
12 KO e moli nakai aoga ke hula au; ka ko e hoko atu ne fai haku a kupu ke he tau mena ne kitekite ki ai mo e tau fakakiteaga mai he Iki.
2 Kua iloa e au e tagata a Keriso, ne hamu a ia ke he lagi ne tolu, ne hogofulu ma fa e tau tau tali mai he vaha ia, (ka e nakai iloa e au, po ke ne ha ha he tino a ia, ti nakai iloa e au po ke nakai ha ha he tino a ia, kua fioia he Atua.)
3 Kua iloa e au e tagata na, (nakai iloa e au, po ke ne ha ha he tino a ia, po ke nakai ha ha he tino a ia, kua fioia he Atua.)
4 Ne hamu a ia ki Parataiso mo e fanogonogo ke he tau kupu nakai maeke ke talahaua, kua nakai lata foki ke vagahau ai ha tagata.
5 Ha ko e tagata ia ke hula ai au, ka e nakai hula au kia au, ka ko e tau mena hokoia kua lolelole ai au.
6 Ane mai ne manako au ke hula, po kua nakai goagoa ai au; ha ko e kupu moli ke tala atu e au; ka e tokai neke tolomaki atu he manatu he taha kia au ke he mena kua kitia ai e ia kia au, po ke mena kua fanogonogo ai a ia kia au.
7 Neke fakatokoluga au ke he tau mena homo ne fakakite mai, ne tuku mai ai kia au e mena mahukihuki ke he tino, ko e agelu a Satani ke tatuki mai kia au, neke fakatokoluga au.
8 Ne ole atu lagatolu au ke he Iki ha ko e mena ia, kia fano kehe ai a ia ia au.
9 Ti pehe mai ai a ia kia au, Ko e haku a fakaalofa noa kua lata ia mo koe; ha kua fakakatoatoa haku a malolo ke he lolelole. Haia, to olioli lahi ai au, mo e hula ke he tau mena kua lolelole ai au, kia tumau ai e malolo a Keriso ki luga haku.
10 Ko e mena ia kua fiafia ai au ke he tau mena kua lolelole ai, ko e fakakelea mai, ko e nofogati, ko e favale mai, ko e tau mena ke fakaatukehe ai ha ko Keriso; ha ko e mena ka lolelole au, ti malolo ai au.
11 Kua uta au mo goagoa ha ko e hula; ka ko mutolu ne nakai maeke ia au ke toka ai; ha ko e mena kane mai ne fakaheke mai a mutolu kia au po kua lata ai; ha ko e mena pete ni ko e mena fakateaga au, kua nakai muikau au ke he taha mena ke he tau aposetolo kua mumua.
12 Ne eke ni ki mua ha mutolu e tau fakamailoga he aposetolo ke he fakauka oti kana, ke he tau fakamailoga, mo e tau mena ke ofo ai, mo e tau mana.
13 Ko heinoa kia e mena kua mahala ai a mutolu ke he falu a ekalesia, kaeke nakai ko e mena nai, he nakai fakamamafa atu au kia mutolu? Kia fakamagalo mai kia au e mahani na kua nakai tonu.
14 Kitiala, lagatolu kua taute au ke fina atu kia mutolu; to nakai fakamamafa au kia mutolu; ha kua nakai kumi e au ha mutolu a tau mena, ka ko mutolu ni; ha ko e mena nakai lata ke tatanaki he tau fanau ma e tau matua, ka ko e tau matua ma e fanau.
15 Ka kua lahi haku a fiafia ke fakaoti au mo e fakaotioti au ha ko e tau agaga ha mutolu; pete ni he fakalahi haku a fakaalofa kia mutolu, ka e au atu ai e fakatote he ofania au.
16 Kia toka ai pihia; nakai fakamamafa au kia mutolu; ka ko e haku a lagatau ne moua ai e au a mutolu ke he fakavai.
17 Po ke ne fakavai kia e au a mutolu ke moua e au ha mena māku ke he taha ia lautolu ne fekau atu e au kia mutolu?
18 Ne ole atu au kia Tito, ti fekau atu e au a laua mo e matakainaga. Ne fakavai kia e Tito a mutolu ke moua ha mena māna? nakai kia o fano ai a mautolu ke he loto taha, mo e tau tuaga hui foki ne taha?
19 Hanai, piko kia a mutolu kua fakatonu atu e mautolu a mautolu kia mutolu? ki mua he Atua kua vagahau ai a mautolu ha ha ia Keriso; ko e tau fakahelehele na e, kua eke e tau mena oti kia fakamafanatia ai a mutolu.
20 Ha kua matakutaku au, neke fina atu au, ti moua ai e au a mutolu nakai tuga he loto au ki ai, ti moua foki e mutolu au kua kehe mo e mena kua loto a mutolu ki ai; neke ha ia mutolu e taufetoko, e tau mahekeheke e tau ita, e tau faitaua, e tau vagahau kelea, e tau fefanafanāki, e tau loto hemu, e tau fakafualoto;
21 Neke fakatokolalo au he haku a Atua ha ko mutolu, ka liu foki fina atu au kia mutolu; ti fakatutuku ai au ke he falu ne tokologa, ko lautolu kua hala tuai, mo e nakai tokihala ke he mahani kelea, mo e feuaki, mo e matahavala, ne eke e lautolu.