2 Korinito 13:1-14
13 KO e lagatolu hanai ko e fina atu ai ne fai au kia mutolu; to fakamoli e tau kupu oti ke he talahau he tokoua po ke tokotolu.
2 Ne tala atu au ke he vaha kua mole, ti tala atu tuai foki ainei, lagaua ia, tuga he ha i ai au ia mutolu, ka e nakai ha i ai ia mutolu, kua tohi atu nai e au, kia lautolu kua hala tuai, katoa mo lautolu oti kua toe, kaeke ke fina atu foki au kia mutolu, ti nakai fakamama au;
3 Ha kua kumi e mutolu e fakamailoga po ke vagahau mai nakai a Keriso ki loto ia au, ko ia kua nakai lolelole kia mutolu, ka kua malolo ki loto ia mutolu.
4 Ha ko e mena kaeke kua fakasatauro a ia ke he lolelole, ka kua moui a ia ke he malolo he Atua; ha ko mautolu foki, kua lolelole a mautolu ha ha ia ia, ka kua momoui fakalataha a mautolu mo ia ke he malolo he Atua kia mutolu.
5 Kia kamatamata e mutolu a mutolu, po kua ha ha i ai a mutolu ke he tua; kia kumikumi hifo a mutolu kia mutolu; nakai kia iloa e mutolu, ha ha i loto ia mutolu a Iesu Keriso, kaeke nakai ko e tau pikopiko a mutolu?
6 Ka kua amaamanaki au ke iloa e mutolu a mautolu, nakai ko e tau pikopiko a mautolu.
7 Hanai, kua ole atu au ke he Atua, kia nakai eke e mutolu ha mena kelea; ka e nakai pihia kia iloa ai a mautolu kua fakamoli, ka kia eke ai e mutolu e tau mena mitaki, pete ni he tuga e tau pikopiko a mautolu.
8 Ha ko e mena nakai maeke ia mautolu ha mena ke totoko atu ke he kupu moli, ka ko e tau mena kua lata mo e kupu moli.
9 Nukua olioli a mautolu, ka lolelole a mautolu, ka kua malolo a mutolu; ko e hanai foki e mena kua liogi ai a mautolu, kia fakakatoatoa ai a mutolu.
10 Ko e mena ia kua tohi atu ai au e tau mena ia, ka kua nakai ha i ai au, neke eke fakamalolo e au ka ha i ai au, kua lata foki mo e pule kua tuku mai he Iki kia au ke ati hake ai a mutolu, ka e nakai ke ulu ai ki lalo.
11 Ko e tau matakainaga na e, ko e kupu kua toe hanai, kia monuina a mutolu; kia fakakatoatoa a mutolu ke he mitaki; kia fakamafanatia a mutolu, kia loto fakalataha a mutolu, kia mafola a mutolu; ti ha ha i ai ia mutolu e Atua hana e fakaalofa mo e monuina.
12 Kia feofanaki a mutolu ke he figita tapu.
13 Kua fakaalofa atu kia mutolu e tau tagata fakatapu oti.
14 Kia ha ha ia mutolu oti kana e fakaalofa noa he Iki ko Iesu Keriso, mo e fakaalofa he Atua, kia fakafetui foki a mutolu mo e Agaga Tapu. Amene.