2 Korinito 2:1-17
2 KUA mau tuai haku a manatu nai, nakai liu foki fina atu au kia mutolu mo e momoko.
2 Ha ko e mena kaeke kua fakatupu e au e momoko kia mutolu, po ko hai kia a ia kua fakafiafia mai au kaeke nakai ko ia kua fakamomoko e au?
3 Ne tohi atu foki au e mena ia ni kia mutolu, neke fina atu au ti moua ai e au e momoko mai ia lautolu kua lata ke fiafia ai au; kua tua tuai au kia mutolu oti ko e haku a fiafia, ko e fiafia haia ha mutolu oti kana.
4 Ha ko e matematekelea lahi mo e fakaatukehe he loto ne tohi atu ai au kia mutolu mo e tau hihina mata loga; nakai pihia kia momoko ai a mutolu, ka kia iloa ai e mutolu haku a fakaalofa kua lahi ue atu kia mutolu.
5 Hanai, kaeke kua fakatupu he taha e momoko, nakai ko au kua fakamomoko e ia, ka ko mutolu ni, fakalatalata neke fakamamafa atu au.
6 Tokai, neke eke foki ha mena ke he tagata ia, ko e fakahala hokoia ne fakahala ai a ia he tokologa.
7 Ka ko e hanai, kia fakamagalo atu a mutolu mo e fakamafana atu ke he tagata na, neke mahala a ia ke he momoko kua lahi ue atu.
8 Ko e mena ia kua ole atu ai au kia mutolu ke fakamau ha mutolu a fakaalofa kia ia.
9 Ko e mena foki ia ne tohi atu ai au, kia iloa ai e au e fakamoli ha mutolu, po ke ne omaoma a mutolu ke he tau mena oti.
10 Ko ia kua fakamagalo atu e mutolu ha mena ki ai, kua pihia foki au; ha ko e mena kaeke kua fakamagalo atu e au ha mena, ko e mena kua fakamagalo atu kua fakamagalo ni ha ko mutolu ki mua a Keriso;
11 Neke fakavai a tautolu e Satani; nukua nakai pouli a tautolu ke he hana tau lagatau.
12 Ne fina atu au ki Tiroa ha ko e vagahau mitaki a Keriso, ne hafagi mai foki kia au e pa gutuhala ke he Iki,
13 Ti nakai okihia ai haku a loto, he nakai moua e au haku a matakainaga, ko Tito; ka kua mavehe au mo lautolu, ti fina atu au ki Maketonia.
14 Fakaaue ke he Atua, ko ia kua kautu kia mautolu ke he tau aho oti ha ko Keriso, ko ia foki, kua fakakite ai e mautolu ke he tau motu oti e manogi he maama ha ia ia.
15 Ha ko e manogi mitaki a Keriso a mautolu nai ke he Atua, kia lautolu kua fakamomoui katoa mo lautolu kua malaia;
16 Ke he falu ko e manogi he mate ke hoko ke he mate; ke he falu ko e manogi he moui ke hoko ke he moui. Po ko hai foki kua lata mo e tau mena nai?
17 Ha ko mautolu nai, nakai tuga falu ne tokologa, ko lautolu kua fiofio e kupu he Atua; ka kua vagavagahau atu e mautolu ha ia Keriso mo e loto mitaki mai he Atua, ki mua foki he Atua.