2 Korinito 3:1-18
3 KUA liu foki kamata kia e mautolu ke talahaua mitaki a mautolu? po ke aoga kia mautolu tuga ne falu e tau tohi ke talahaua mitaki ai ke ta atu kia mutolu? po ke tau tohi ke talahaua mitaki ai mai ia mutolu?
2 Ko mutolu ko e tohi ha mautolu kua tohi ke he tau loto ha mautolu, kua iloa mo e totou he tau tagata oti.
3 Kua kitia a mutolu ko e tohi a Keriso a mutolu ne fekafekau ai a mautolu, nakai tohi ke he vai tohi ka ko e Agaga he Atua moui, nakai tohi ke he tau lapatohi maka, ka ko e tau lapatohi kakano, ko e tau loto haia.
4 Ha ha ia mautolu e tuaaga nai ke he Atua ha ko Keriso;
5 Ha ko e mena nakai maeke ia mautolu hoko mautolu ke manamanatu ha mena tuga ne mai ia mautolu, ka ko e Atua kua maeke ai e mautolu;
6 Ko ia foki kua taute a mautolu kia lata a mautolu ke eke mo tau fekafekau ke he maveheaga fou, nakai ko e tohi, ka ko e Agaga; ha ko e tohi kua tamate ai, ka ko e Agaga kua fakamoui ai.
7 Kaeke foki kua pihia e lilifu he fekafekauaga he tohi ne hoko mai ai e mate, ne tohia ai ke he tau mata tohi ke he tau maka he nakai maeke ai ke he tau fanau a Isaraela ke mataono ke he fofoga a Mose ha ko e kikila he hana fofoga, ko e hikila haia kua popo vave;
8 Ti nakai kia mua e lilifu he fekafekauaga kua hoko mai ai e Agaga?
9 Ha ko e mena kaeke kua lilifu e fekafekauaga ne hoko mai ai e fakahala, ti au atu he lilifu he fekafekauaga kua hoko mai ai e tututonu.
10 Ha ko e mena foki ne lilifu, nakai lilifu ia ke he mena nai, ha ko e lilifu kua mua ue atu.
11 Ha ko e mena kaeke kua lilifu e mena ke mole vave, ti au atu ai he lilifu e mena kua tumau.
12 Hanai, ha kua ha ha ia mautolu e amaamanaki nai, kua vagahau fakatonu ni a mautolu;
13 Nakai tuga a Mose, ne tuku e ia e ufiufi ke he hana fofoga, kia nakai maeke ke he fanau a Isaraela ke mataono ke he fakahikuaga he mena kua mole vave.
14 Ka kua fakapouligia ha lautolu a tau manatu; ka e toka agaia ni e ufiufi ia ke he tau aho kua totou ai e maveheaga tuai ato hoko mai ke he aho nai, kua nakai fakakite kua fakaoti ia kia Keriso.
15 Ha kua hoko ke he aho nai, kua toka agaia e ufiufi ke he tau loto ha lautolu ka totou a Mose.
16 Ka hoko ke he vaha ke mafoki ai ke he Iki, ti uta kehe ai e ufiufi.
17 Ko e Iki foki, ko e Agaga haia; ko e mena ha i ai e Agaga he Iki ha ha i ai e tokanoaaga.
18 Ka ko tautolu oti, kua kitekite ke he fakaata mo e mata nakai ufia ke he lilifu he Iki, kua faliu a tautolu mo e fakatino na, ko e lilifu ke hoko ke he lilifu, tuga he mena mai he Iki ko e Agaga.