2 Korinito 6:1-18
6 HANAI foki, ko mautolu ko e tau ekegahua fakalataha mo ia, kua ole atu a mautolu kia mutolu aua neke talia teao e mutolu e fakaalofa noa he Atua.
2 (Ha kua pehe mai a ia, Ko e vaha ke talia ai ne fanogonogo ai au kia koe, ko e aho foki ke fakamomoui ai ne lagomatai ai au kia koe; kitiala, ko e ainei e vaha ke talia mitaki mai ai; kitiala, ko e aho nai ke fakamomoui ai.)
3 Kua nakai tuku atu e mautolu kia taha ha mena ke tupetupe ai, neke talahaua kelea e gahua.
4 Ka kua fakakite e mautolu a mautolu ke he tau mena oti ko e tau fekafekau he Atua, ke he fakauka lahi, ke he matematekelea, ke he malaia, ke he fakaatukehe.
5 Ke he tau fahiaga, ke he tuku ke he tau fale puipui, ke he tau fakaagitau, ke he tau gahua, ke he tau mataalaaga, ke he tau fakakanopogi,
6 Ke he mahani mea, ke he loto maama, ke he fakamanavalahi, ke he mahani totonu, ke he Agaga Tapu, ke he fakaalofa fakamoli,
7 Ke he kupu moli, ke he malolo he Atua, ke he tau kanavaakau he tututonu ke he fahi matau katoa mo e fahi hema,
8 Ke he lilifu mo e fakakelea, ke he talahaua mitaki, mo e talahaua kelea; tuga he tau tagata fakavai, ka e fakamoli ni;
9 Tuga he tau tagata nakai iloa, ka kua iloa auloa; tuga he mamate ha ne fai, ka e kitiala, kua momoui a mautolu; tuga he tau tagata kua akonaki, ka kua nakai kelipopo;
10 Tuga he fakatutuku, ka kua fiafia mau; tuga he nonofogati, ka e fakamuhukoloa ke he tau tagata tokologa; tuga he tau tagata kua noa maka ni, ka e ha ha ia mautolu e tau mena oti.
11 Ko mutolu ko e tau tagata Korinito na e, kua fakamaga atu ha mautolu a tau gutu kia mutolu, kua fakalahi ha mautolu a tau loto kia mutolu.
12 Nakai ko mautolu kua apitia ai a mutolu, ka ko e tau loto ha mutolu kua apitia ai a mutolu.
13 (Kua vagahau atu au kia mutolu tuga haku a fanau,) kia fakalahi mai ha mutolu a tau loto ke taui mai ai.
14 Aua neke hahamo a mutolu mo e nakai tatai fakalataha mo lautolu kua nakai tua; ha ko e mena fakalataha fefe e tututonu mo e mahani kelea? Ke fakafetui fefe e maama mo e pouli?
15 Ke loto fakalataha fefe a Keriso mo Pelialo? Po ke igatia fakalataha fefe a ia kua tua mo ia kua nakai tua?
16 Ke loto fakalataha fefe e faituga he Atua mo e tau tupua? ha ko mutolu ko e faituga he Atua moui a mutolu, tuga he talahau mai e Atua, To nofo au ki loto ia lautolu mo e fai fano ki loto ia lautolu; ke eke foki au mo Atua ha lautolu, ke eke foki a lautolu mo tau tagata haku.
17 Hanai, kia o mai a mutolu mai loto ia lautolu, mo e vevehe kehe a mutolu, kua pihia mai ai e Iki, aua foki neke piki atu a mutolu ke he mena kelea; ti talia ai e au a mutolu,
18 To eke foki au mo Matua ha mutolu, to eke foki a mutolu mo e haku a tau tama tane mo e haku a tau tama fifine, kua pihia mai ai e Iki hana e malolo oti kana.