2 Korinito 7:1-16
7 HANAI, ko e tau fakahelehele na e, ha kua ha ha ia tautolu e tau kupu ia kua talahaua mai, kia fakamea e tautolu a tautolu ke he tau mena oti ke kelea ai e tino katoa mo e agaga, kia fakakatoatoa ai e tau mahani mitaki mo e matakutaku ke he Atua.
2 Kia talia fakamitaki mai e mutolu a mautolu; nakai mahani kelea a mautolu kia taha, nakai fakakelea e mautolu taha, nakai fakavai e mautolu taha.
3 Nakai pihia atu au ke akonaki atu; ha kua oti he tala atu e au kia mutolu, ha ha i ai a mutolu ke he tau loto ha mautolu ke mamate fakalataha mo e momoui fakalataha.
4 Kua lahi haku a fakamalolo atu kia mutolu, kua lahi haku a hula ha ko mutolu; kua puke haku a loto ke he fakamafana, kua fakalahi kia au e fiafia ke he tau matematekelea oti ha mautolu.
5 Ha ko e mena ne o mai a mautolu ki Maketonia, nakai okihia ha mautolu a tau tino, ka kua matematekelea a mautolu ke he tau mena oti, ko e tau tau i fafo, ka ko loto ko e matakutaku.
6 Ka ko e Atua, ko ia kua fakamafana e tau loto holoilalo, ne fakamafana mai e ia a mautolu he hoko mai a Tito;
7 Ka e nakai kuenaia he hoko mai a ia, ka ko e fakamafanaaga foki ne fakamafanatia ai a ia ha ko mutolu, he talahau mai e ia kia mutolu ha mutolu a amaamanaki lahi, ha mutolu a tagi lahi, ha mutolu a fakamakutu mai kia au; ko e mena ia ne mua ai haku a fiafia.
8 Ha ko e mena kaeke kua fakamomoko e au a mutolu ke he tohi, nakai tokihala ai au, pete he tokihala tuai au; nukua kitia e au ne fakamomoko a mutolu he tohi na, ka ko e taha magaaho ni.
9 Ka ko e ainei kua fiafia ai au, nakai fiafia ha kua momoko a mutolu, ka ko e mena nai he fakahiku ha mutolu a momoko ke he tokihala; nukua momoko a mutolu kua lata mo e Atua, kia nakai kelea a mutolu ia mautolu ke he mena taha.
10 Ha ko e momoko kua lata mo e Atua kua tupu ai e tokihala ke hoko atu ke he moui, ti nakai liu foki tokihala ai; ka ko e momoko kua lata mo e lalolagi kua tupu mai ai e mate.
11 Kitiala, ko e mena agaia ni, ne fakamomoko a mutolu kua lata mo e Atua, kua lahi e fakamakutu ne tupu ai kia mutolu, nakai kuenaia ka ko e fakatonu atu, mo e loto hukia, mo e matakutaku, mo e amaamanaki lahi, mo e humaki taha, katoa mo e taui atu. Ke he tau mena oti ia kua fakailoa mai ai e mutolu kua mea a mutolu ke he mena ia.
12 Hanai, pete ni he tohi atu au kia mutolu nakai tohi au ha ko ia ne mahani kelea, po ko ia ne mahani kelea ki ai, ka kia fakakite atu kia mutolu ha mautolu a fakamakutu ha ko mutolu ki mua he Atua.
13 Ko e mena ia kua fakamafanatia ai a mautolu ke he fakamafanatia ha mutolu; kua au atu he fiafia ha mautolu ha ko e fiafia a Tito, nukua fakamafanatia hana loto kia mutolu oti kana.
14 Ha ko e mena kaeke kua hula au kia ia ke he taha mena ha ko mutolu, nakai ma ai au; ka e tuga he moli e tau kupu oti ne vagahau atu ai a mautolu kia mutolu, kua pihia foki ha mautolu a hula kia Tito, kua fakamoli tuai.
15 Kua au atu ai hana fakaalofa hofihofi kia mutolu he manatu e ia e omaoma ha mutolu oti, kua talia e mutolu a ia mo e matakutaku mo e vivivivi.
16 Haia, kua fiafia au, ha ko e mena kua fakamanavalahi au kia mutolu ke he tau mena oti.