2 Korinito 8:1-24
8 KO e tau matakainaga na e, kua fakailoa atu e mautolu kia mutolu e fakaalofa noa he Atua kua foaki ke he tau ekalesia i Maketonia:
2 Ha ko e kamatamata lahi ha lautolu ke he matematekelea kua tupu lahi ai ha lautolu a olioli, katoa mo e ha lautolu a nonofogati lahi, kua mua ai e fakamokoi lahi ha lautolu.
3 Nukua talahau e au, ne loto a lautolu ki ai ke lata ke he ha lalu tau mena, kua mua foki ke he tau mena ha lautolu;
4 Kua ole mai mo e fakamakamaka kia mautolu, kia talia ai e mautolu e mena fakaalofa, kia fakafetui foki mo lautolu he fekafekau ke he tau tagata tapu.
5 Nakai kuenaia foki ia, tuga he amaamanaki ai a mautolu, ka kua tuku atu fakamua e lautolu a lautolu ke he Iki, mo mautolu foki ke he finagalo he Atua.
6 Ti ole a mautolu kia Tito, kia tuga he kamata tuai e ia e mena fakaalofa ia, kia pihia foki he fakahiku ai e ia kia mutolu.
7 Hanai, tuga he tupu lahi ia mutolu e tau mena oti, ko e tua, mo e kupu, mo e maama, mo e fakamakutu oti kana, katoa mo e ha mutolu a fakaalofa mai kia mautolu, kia tupu lahi pihia foki ia mutolu e mena fakaalofa nai.
8 Nakai ko e kupu poaki kua tala atu nai e au, ka ko e fakamakutu he falu ke kamatamata foki po ke ne moli ha mutolu a fakaalofa.
9 Nukua iloa e mutolu e fakaalofa noa he Iki ha tautolu ko Iesu Keriso, ne muhu mena a ia, ka kua fakanofogati a ia ha ko mutolu, kia fakamuhu mena a mutolu ke he hana nofogati.
10 Kua tala atu e au haku a manatu ke he mena nai; ha kua aoga e mena nai kia mutolu, ko mutolu ne kamata fakamua ke eke, nakai kuenaia he eke ka kua fiafia foki ki ai tali mai he tau kua mole.
11 Hanai kia fakaoti e mutolu e mena kua eke, tuga ne fakamakai a mutolu he loto ki ai, kia pihia foki e fakaotiaga ke lata mo e tau mena ha ha ia mutolu.
12 Ha ko e mena ka ha i ai e loto fakamakai, ti talia fakamitaki e tagata, kua fakalata ke he tau mena ha ha ia ia, ka e nakai fakalata ke he tau mena nakai ha ha ia ia.
13 Ha kua nakai manatu au ke okioki falu, ka e tukumate e mutolu;
14 Ka e eke fakatatai, kia lagomatai he muhumena ha mutolu he vaha nai ke he ha lautolu a nonofogati; ti lagomatai foki ha lautolu a muhumena ke he ha mutolu a nonofogati a taha aho, kia fakatatai ai;
15 Tuga he tohi mai, Ko ia ne tanaki fakalahi, nakai fai mena a ia kua toe; ko ia ne tanaki fakatote, nakai hogeia mena a ia.
16 Fakaaue ke he Atua, ko ia ne tuku e fakamakutu ia ke he loto a Tito ha ko mutolu.
17 Ha kua talia e ia e ole, ka e mua hana fakamakutu ki ai, ti ko e hana loto ni ne fina atu ai a ia kia mutolu.
18 Kua fakafano atu e mautolu fakalataha mo ia e matakainaga kua nava ki ai ke he vagahau mitaki e tau ekalesia oti.
19 Nakai kuenaia foki, ka kua fifili he tau ekalesia a ia ke o a mautolu mo ia ke he fenoga ke uta e mena fakaalofa nai kua fekafekau ki ai a mautolu, ke fakakite ai e fakahekeaga he Iki ni, katoa mo e loto fakamakai ha mutolu.
20 Kua fakaeneene a mautolu ke he mena nai, neke talahaua kelea e taha a mautolu ke he tau mena loga nai kua fekafekau a mautolu ki ai;
21 Kua tauteute e mautolu e tau mena gali nakai ki mua he Iki hokoia, ka e katoa foki mo mua he tau tagata.
22 Kua fakafano atu foki e mautolu fakalataha mo laua e matakainaga ha mautolu, kua iloa lagaloga e mautolu hana a fakamakutu ke he tau mena loga, ka ko e vaha nai, kua mua ai hana fakamakutu ha ko e hana tau fakalahi kia mutolu.
23 Ka huhu taha kia Tito, kua fakalataha a maua mo au, kua gahua fakalataha foki a maua kia mutolu; ka huhu taha ke he tau matakainaga ha mautolu, ko e tau fekafekau he tau ekalesia a lautolu, kia fakaheke ai a Keriso.
24 Hanai, kia fakakite e mutolu kia lautolu ki mua he tau ekalesia e fakamailoga he fakaalofa ha mutolu, mo e ha mautolu a hula ha ko mutolu.