2 Korinito 9:1-15
9 KO e mena nakai aoga foki ke tohi atu au kia mutolu ke he tau mena fakaalofa kua taute mo e tau tagata tapu;
2 Ha kua iloa tuai e au ha mutolu a loto fakamakai, ne hula ai au kia mutolu ki mua he tau tagata Maketonia, kua taute tuai Akaia ke he tau kua mole; ko e fakamakutu foki ha mutolu kua tupu ai e loto fia fifitaki ke he tokologa.
3 Ka kua fakafano atu e au e tau matakainaga, neke eke teao ha mautolu a hula kia mutolu ke he mena nai; ka kia mau ha mutolu a taute tuga he tala atu ai au.
4 Neke fakama a mautolu, (ka e toka ai pihia a mutolu), ke he hula fakalahi ha mautolu ke he mena nai, kaeke ke o atu a mautolu mo e tau tagata Maketonia, ti moua ai ha mutolu a tauteaga kua nakai mau.
5 Ko e mena ia ne manatu ai au kua lata he ole atu e au ke he tau matakainaga, kia mumua atu a lautolu kia mutolu ke tauteute fakamua ai ha mutolu a tau mena fakaalofa kua talahaua mai tuai; kia mau he tauteute e tau mena ia ke lata mo e mena fakaalofa noa, ka e nakai ko e mena ne tupu he velevelemena.
6 Ka ko e kupu hanei, ko ia kua fakatote hana saito kua gana, to fakatote foki hana helehele mai; ka ko ia kua fakalahi hana saito kua gana, to fakalahi foki hana helehele mai.
7 Kia takitokotaha mo e foaki tuga e fifili ke he hana loto; aua neke foaki mo e momoko, po ke foaki he ole fakafi; ha kua fakaalofa e Atua kia ia kua foaki mo e fakamakai.
8 Kua maeke foki ke he Atua ke fakalahi kia mutolu e tau mena fakaalofa oti kana, kia ha ha i ai ia mutolu ke he tau aho oti e tau mena oti kana kua lata, kia tupu lahi ia mutolu e tau gahua mitaki oti,
9 Tuga he tohi, Kua fakatafola e ia hana tau mena; kua age e ia ke he tau nonofogati; kua tumau hana tututonu tukulagi.
10 Ko e hanai, ko ia kua foaki fakalahi e tau saito kia ia kua gana ai, mo e mena kai ke kai ai, kia foaki mai e ia mo e fakaloga mai ha mutolu a tau fua, kia fakatupu foki e ia e tau fua he tututonu ha mutolu;
11 Ha kua fakamuhu mena a mutolu ke he tau meua oti kia fakamokoi ai ke he tau mena oti, kia tupu ai e fakaaue ke he Atua ha ko mautolu.
12 Ha ko e tauteaga he gahua fakaalofa nai kua moua ai he tau tagata fakatapu e tau mena kua nonofogati ai a lautolu, ka e nakai kuenaia, ka kua fakalahi ai foki e fakahekeaga ke he Atua he loga e tau fakaaue;
13 Kua fakaheke atu a lautolu ke he Atua ha ko e fakamoli ha ha i ai ke he fakaalofa nai, ha kua talahaua mai ai ha mutolu a omaoma ke he vagahau mitaki a Keriso, mo e fakamokoi ha mutolu ke he tufatufaaga he tau mena fakaalofa kia lautolu katoa mo e tau tagata oti;
14 Ko e ha lautolu a liogi foki ma mutolu, kua foli ai kia mutolu, ha ko e fakaalofa noa he Atua kua fakalahi kia mutolu.
15 Fakaaue ke he Atua he hana mena kua foaki noa nakai maeke ke fakamatala.