2 Nofoaga he Tau Patuiki 1:1-17
1 NE fakamalolo ai e tama a Tavita ko Solomona ke he hana kautu, ne fakalataha mo ia a Iehova hana Atua, ti fakalahi ni e ia hana lilifu ke lahi mahaki.
2 Ti pehe age a Solomona kia Isaraela oti, ko e tau iki he tau takiafe mo e tau iki he tau takiteau, mo e tau fakafili, mo e tau iki ne mua oti a Isaraela oti, ko e tau tui ne mua.
3 Ti o atu a Solomona mo e fakapotopotoaga oti fakalataha mo ia ke he mena tokoluga ha ha i Kipeona; ha ko e mena ha ha i ai ke he mena ia e fale uta fano he tutuutaaga he Atua ne eke he fekafekau a Iehova ko Mose ke he tutakale.
4 Ka ko e puha he Atua ne ta hake ai a Tavita i Kiriata-iarima ke he mena ne taute ai e Tavita ma e puha; ha ko e mena eke ai e ia e fale ie i Ierusalema.
5 Ka ko e fatapoa apakula ne eke a Pesaleli ko e tama a Auri, ko e tama a ia a Huro, ha ha i ai a ia ki mua he faituga a Iehova; kua kumi ki ai e Solomona mo e fakapotopotoaga.
6 Ti hake ai a Solomona he mena ia ke he fatapoa apakula ki mua a Iehova, ha ha he fale uta fano he tutuutaaga, mo e eke ai e ia e tau poa huhunu taha e afe ki luga hana.
7 Ne fakakite mai e Atua kia Solomona he po ia ni, mo e pehe mai kia ia, Kia tala mai la e koe po ke heigoa e mena ke ta atu ai e au kia koe?
8 Ti pehe atu a Solomona ke he Atua, Kua fakaalofa lahi mai tuai a koe ke he matua haku ko Tavita, mo e eke e koe au mo patuiki ke hukui aki a ia.
9 Hanai, Iehova na e, ko e Atua, kia fakamoli a e koe hau a kupu ke he matua haku ko Tavita; ha kua kotofa e koe au ke eke mo patuiki he motu kua tuga ne efuefu he kelekele he tokologa.
10 Hanai, kia foaki mai e koe kia au e iloilo mo e lotomatala, kia hu atu au ki fafo, mo e hu mai ki fale ki mua he motu nai, ha ko hai kia kua maeke, ke fakafili hau a motu nai kua lahi pihia?
11 Ti pehe mai e Atua kia Solomona, Ha kua ha ha he loto hau e mena na, kua nakai ole koloa e koe, po ke ole e tau mena loga māu, po ke ole lilifu, po ke ole ke mamate a lautolu kua fai fi kia koe, ti nakai ole foki ke moui leva a koe; ka kua ole e koe māu e iloilo mo e lotomatala, kia fakafili ai e koe haku motu, kua kotofa ai a koe mo patuiki;
12 Ko e mena ia kua foaki atu ai e au kia koe e iloilo mo e lotomatala; to foaki atu foki e au kia koe e koloa, mo e tau mena loga, mo e lilifu, nakai pihia e tau patuiki ne mumua atu kia koe, to nakai pihia foki e tau patuiki ke mumui atu kia koe.
13 Ti hau a Solomona he mena tokoluga i Kipeona ki Ierusalema, mai mua he fale uta fano he tutuutaaga; kua eke a ia mo patuiki a Isaraela.
14 Ne fakapotopoto ai e Solomona e tau kariota mo e kau heke solofanua; ha ha ia ia taha e afe ti fa e teau e kariota, mo e kau heke solofanua ne hogofulu ma ua e afe tagata, ti toka e ia a lautolu ke he tau maga ne toka ai e tau kariota, ne toka foki i Ierusalema ke fakalataha ai mo e patuiki.
15 Ne fakaloga ai he patuiki e tau ario mo e tau auro i Ierusalema ke tuga ne tau maka; ti fakaloga ai e ia e tau arasi ke tuga ne tau sukamora ke he tau fonua tokolalo.
16 Ko e tau solofanua a Solomona ne ta mai i Aikupito; ne moua ai he tau tagata fakafua koloa he patuiki ke he tau fuifui, ko e fuifui solofanua mo e hana mena ne fakafua aki.
17 Ne ta hake mo e ta mai ai e lautolu i Aikupito e kariota ke he ono e teau sikeli ario, ko e solofanua ke he taha teau mo e limagofulu e sikeli; ti ta mai ai pihia foki e lautolu ma e tau patuiki oti he tau tagata Heti, mo e tau patuiki Suria.