2 Nofoaga he Tau Patuiki 14:1-15
14 KUA takoto a Avia fakalataha mo e hana tau matua, ti tanu e lautolu a ia ke he maga a Tavita. Ti eke e tama hana ko Asa mo patuiki ke hukui aki a ia. Ko e vaha ne patuiki ai a ia ne mafola e motu ke he tau tau ne hogofulu.
2 Ne mahani mitaki mo e tututonu a Asa ki mua a Iehova hana Atua.
3 Ne uta kehe e ia e tau fatapoa kua eke ke he tau atua kehe, mo e tau mena tokoluga, ne lipilipi foki e ia e tau tupua, mo e hio ki lalo e tau tupua Asaira.
4 Ne pehe atu a ia kia Iuta kia kumi e lautolu a Iehova ko e Atua he tau matua ha lautolu, mo e eke ai a lautolu e fakatufono mo e poaki.
5 Ne uta kehe foki e ia e tau mena tokoluga mo e tau tupua he la he tau maga oti a Iuta, Ti mafola ai e motu ke he vaha ne patuiki ai a ia.
6 Ne ati ai e ia e tau maga nonofo taue i Iuta; ha kua mafola e motu; nakai tupu mai ha tau kia ia ke he tau tau ia; ha kua foaki mai e Iehova ke okioki ai a ia.
7 Ne pehe atu foki a ia ki Iuta, Kia ati e tautolu e tau maga ia, mo e takai ai e tautolu ke he kaupa, mo e tau kolo, mo e tau gutuhala, mo e tau akau fakalava, kua toka agaia e kelekele ki mua ha tautolu; he kumi e tautolu a Iehova ha tautolu a Atua, kua kumi e tautolu a ia, ti foaki mai e ia kia tautolu ke okioki ai ke he tau fahi oti. Ti eke pihia e lautolu, mo e monuina ai a lautolu.
8 Ko e kau a Asa, mai ia Iuta ne tolu e teau afe tagata ne toto e tau akau pāpā, mo e tau tao; mai ia Peniamina foki ua e teau afe mo e valugofulu e afe tagata ne toto e tau akau punuti mo e fana ke he tau kaufana. Ko e tau toa malolo a lautolu oti.
9 Ti o mai a Saraha ko e tagata Aitiope mo e kau ne taha e afe afe tagata, mo e tolu e teau kariota ke tau mo lautolu; ti o mai a lautolu ki Maresa.
10 Ti fina atu a Asa ke tau mo ia, mo e tatanaki atu a lautolu ke tau ke he pahua a Tifata i Maresa.
11 Ti ui atu ai a Asa kia Iehova hana Atua, kua pehe atu, Iehova na e, ko koe ni hoko ko e ke lagomatai ke he tau tagata tokologa, po ko lautolu kua nakai fai malolo. Iehova na e, ha mautolu a Atua, kia lagomatai mai a kia mautolu; ha kua falanaki a mautolu kia koe, kua o atu ni a mautolu ke he hau a higoa ke tau mo e motu o tagata tokologa na. Iehova na e, ko koe ni ko e Atua ha mautolu; aua neke kautu mai e tau tagata kia koe.
12 Ti ta e Iehova e tau tagata Aitiope ki mua a Asa ki mua foki a Iuta; ti fehola ai e tau tagata Aitiope.
13 Ne tutuli e Asa mo e motu ha ha ia ia a lautolu kua hohoko ki Kira; ne keli e tau tagata Aitiope, nakai momoui a lautolu; he fakaotioti a lautolu ki mua a Iehova ki mua foki he kau hana; ne uta foki e lautolu e tau mena ne moua he tau kua loga mahaki ni.
14 Ne ta foki e lautolu e tau maga oti ne agaagai ki Kira; ha kua hoko kia lautolu e matakutaku kia Iehova; ti fofo mai e lautolu he tau maga oti ia e tau mena ne moua he tau; he loga lahi ni e tau mena ne moua he tau ha ha i ai.
15 Ne ulu foki e lautolu e tau fale manu, mo e tau mai ai e lautolu e tau mamoe loga lahi ni mo e tau kamela; ti liliu mai a lautolu ki Ierusalema.