2 Nofoaga he Tau Patuiki 15:1-19
15 KUA hoko mai e Agaga he Atua kia Asaraia ko e tama a Oteta;
2 Ti fina atu ai a ia ke feleveia mo Asa, mo e pehe atu a ia kia ia, Asa na e, mo Iuta oti, katoa mo Peniamina, kia fanogonogo mai a mutolu kia au; ha ha ia mutolu a Iehova, ka ha ha ia ia a mutolu; kaeke foki ke kumi e mutolu a ia, to moua e mutolu a ia; ka ko e mena ka tiaki e mutolu a ia, to tiaki e ia a mutolu.
3 Ko e tau aho loga ni kua noa a Isaraela mo e Atua moli, kua noa foki a lautolu mo e ekepoa ke fakaako atu ai, kua noa foki mo e fakatufono.
4 Ka kua liliu mai a lautolu kia Iehova ko e Atua a Isaraela he matematekelea a lautolu, ne kumi foki e lautolu a ia ti moua e lautolu a ia.
5 Ko e vaha ia nakai fai mafola kia ia ne fina atu mo ia ne liu mai, ka e fakaatukehe lahi a lautolu oti ne nonofo ke he tau motu.
6 Ne tuki malipilipi foki he taha motu ke he taha motu, mo e taha maga ke he taha maga; ha kua fakalavelave he Atua a lautolu ke he tau matematekelea oti ni.
7 Kia fakamalolo a a mutolu, aua neke lolelole foki e tau lima ha mutolu; ha ko e mena to taui atu ha mutolu a tau gahua.
8 Kua fanogonogo a Asa ke he tau kupu na, mo e perofetaaga he perofeta ko Oteta, ti fakamalolo ai a ia, mo e uta kehe e ia e tau mena vihiatia he motu oti a Iuta mo Peniamina, katoa foki mo e tau maga ne fofo mai he mouga a Efaraimo, mo e liu taute ai e ia e fatapoa a Iehova ha ha i mua he fakamaluaga he fale e Iehova.
9 Ne fakapotopoto foki e ia a Iuta oti katoa mo Peniamina, mo e tau tagata kehe ha ha ia lautolu mai Efaraimo mo Manase katoa mo Simeona; he fehola mai a lautolu tokologa kia ia i Isaraela, he kitia e lautolu ha ha ia ia a Iehova hana Atua.
10 Ti fakapotopoto mai ai a lautolu i Ierusalema ke he tolu mahina ke he tau hogofulu ma lima he patuiki ai a Asa.
11 Ti eke poa ai e lautolu kia Iehova ke he aho ia, mai he tau mena ne moua he tau ne ta mai e lautolu, ko e fitu e teau povi mo e fitu e afe mamoe.
12 Ti eke foki e lautolu e maveheaga ke kumi kia Iehova ko e Atua he tau matua ha lautolu mo e ha lautolu a tau loto katoa mo e ha lautolu a tau agaga katoa;
13 Kaeke foki ke ha i ai taha kua nakai kumi kia Iehova ko e Atua a Isaraela kia kelipopo a ia, po ke tama a ia, po ke patu, po ke tane po ke fifine.
14 Ti omonuo a lautolu kia Iehova mo e leo lahi, mo e kalaga fiafia, mo e tau pu kua ulo, mo e tau sofaro.
15 Ne fiafia a Iuta oti ke he omonuo; he omonuo a lautolu mo e loto katoa, mo e kumi e lautolu a ia mo e ha lautolu a tau manako oti; ne moua foki e lautolu a ia. Ne foaki mai e Iehova ke okioki ai a lautolu ke he tau fahi oti.
16 Ko Maaka foki ko e matua fifine he patuiki ko Asa, ne uta kehe e ia a ia, kia nakai eke a ia mo patuiki fifine, he eke e ia e tupua Asaira; ti hio ki lalo e Asa hana tupua, mo e tuki malipilipi ai e ia, mo e huhunu ai e ia ke he kauvai he vailele ko Ketarono.
17 Ka e nakai uta kehe ai e tau mena tokoluga i Isaraela; ka e katoatoa e loto a Asa kia Iehova ke he tau aho oti hana.
18 Ne ta mai foki e ia ke he fale he Atua e tau mena ne fakatapu ai he matua hana, mo e tau mena foki ne fakatapu e ia, ko e ario, mo e auro, mo e tau kapiniu.
19 Nakai tau foki e motu ato hoko ke he tau tolugofulu ma lima ne patuiki ai a Asa.