2 Nofoaga he Tau Patuiki 16:1-14
16 KO e tau tolugofulu ma ono ne patuiki ai a Asa, ne hake ai e patuiki a Isaraela ko Paasa ki Iuta, ne ati foki e ia a Rama, ke aua neke hau ai taha, po ke fina atu ai taha ke he patuiki a Iuta ko Asa.
2 Ti ta mai ai e Asa e tau ario mo e tau auro he tau tanakiaga koloa he fale a Iehova, mo e fale he patuiki, ti fakafano age ai e ia ke he patuiki a Suria ko Penihata ne nofo i Tamaseko, kua pehe age,
3 Kua fai maveheaga a taua mo koe, ko e hau a matua foki mo e haku a matua; kitiala, kua ta atu e au kia koe e tau ario mo e tau auro; kia haele mai a, mo e fakahui e maveheaga ha mua mo e patuiki a Isaraela ko Paasa, kia fano kehe a ia ia au.
4 Ti fanogonogo ai a Penihata ke he patuiki ko Asa, ti fakafano atu ai e ia e tau takitaki kau ha ha ia ia ke he tau maga a Isaraela, ti keli e lautolu a Iono, mo Tano, mo Apelamaima, mo e tau maga oti a Nafatali ne tatanaki ai e tau koloa.
5 Ne logona ai e Paasa ti toka ai e ia a Rama nakai ati, mo e nakai liu eke e ia hana gahua.
6 Ti uta he patuiki ko Asa a Iuta oti; ti uta kehe ai e lautolu e tau maka a Rama mo e tau akau ne ta fale ai e Paasa; ti eke ai e ia a Kipena mo Misepa.
7 Ko e vaha ia ne fina atu ai a Hanani ko e tagata kitekite ke he patuiki a Iuta ko Asa, mo e pehe atu kia ia, Kua falanaki a koe ke he patuiki a Suria, ka e nakai falanaki a koe kia Iehova hau a Atua, ko e mena ia kua hao ai e kau he patuiki a Suria he lima hau.
8 Nakai kia ko e kau lahi e tau tagata Aitiope mo e tau tagata Lipua, ha ha i ai e tau kariota, mo e kau heke solofanua ko e loga lahi ni? Ka e tuku mai a lautolu ke he tau lima hau, he falanaki a koe kia Iehova.
9 Ha ko e tau fofoga a Iehova kua o tafeliuaki ai ke he lalolagi oti, ke lagomatai kia lautolu kua katoatoa ha lautolu a tau loto kia ia. Kua goagoa a koe ke he mena na; hanai, ke kamata ai ke he vaha nai ke hohoko ai e tau tau kia koe.
10 Ti ita a Asa ke he tagata kitekite mo e tuku e ia a ia ke he fale puipui; he ita a ia kia ia ha ko e tau kupu ia. Ne favale atu foki a Asa ke he falu a tagata he motu ke he vaha ia.
11 Kitiala, ko e tau mena ne eke e Asa, ko e tau mena fakamua mo e tau mena fakamui; kitiala, kua tohi ke he tohi he tau patuiki a Iuta mo Isaraela.
12 Ko e tau tolugofulu ma hiva ne patuiki ai a Asa, ne gagao ai a ia ke he hana tau hui, ti lahi mahaki ni hana gagao; ka e nakai kumi ai e ia kia Iehova ke he hana gagao, ka e kumi e ia ke he tau ekekafo.
13 Ti takoto a Asa fakalataha mo e hana tau matua, ne mate a ia ke he tau fagofulu ma taha hana he eke a ia mo patuiki.
14 Ne tanu foki e lautolu a ia ke he tukuaga hana, ne keli ai e ia māna, ke he maga a Tavita, ti fakatakoto e lautolu a ia ki luga he moheaga kua puke ke he tau mena manogi, mo e tau mena kehekehe kua taute ke he tau lagatau he tau tagata eke mena manogi; ne tafu ai foki e lautolu e afi lahi mahaki ni māna.