2 Nofoaga he Tau Patuiki 2:1-18
2 KUA manatu a Solomona ke ta e fale ma e higoa a Iehova, mo e fale ma e hana kautu.
2 Ne totou e Solomona fitugofulu e afe tagata ke uta e tau kavega, mo e valugofulu e afe tagata ke talai maka ke he mouga, ti tolu e afe ti ono e teau tagata foki ne pule kia lautolu.
3 Kua fakafano atu e Solomona ke he patuiki a Turo ko Hairamo, kua pehe atu, Tuga ne eke e koe ke he matua haku ko Tavita, ne fakafano mai e koe kia ia e tau arasi ke ta aki hana fale ke nofo ai a ia, kia eke a pihia a koe kia au.
4 Kitiala, ko e ta ne fai e au e fale ma e higoa a Iehova haku Atua, ke fakatapu ai māna, ke huhunu ai ki mua hana e tau mena manogi mitaki, ma e areto fakatokatoka atu ki mua nakai noa foki, ma e tau poa huhunu foki ke he tau pogipogi mo e tau afiafi, mo e tau sapati, mo e tau mahina pula fou, mo e tau galue kia Iehova ha mautolu a Atua. Ko e fakatufono tukulagi hanā kia Isaraela.
5 Ko e fale kua ta e au ko e fale lahi ni; ha kua mua ue atu e Atua ha mautolu he tau atua oti.
6 Ka kua maeke kia hai ke ta e fale māna, ha ko e lagi mo e lagi he tau lagi, nakai lata ia ke haele ai a ia? Ko hai foki au nai ke ta ai e au e fale māna, ka ko e fale ni ke huhunu ai e mena manogi ki mua hana.
7 Hanai kia fakafano mai e koe kia au e tagata iloilo ke gahua ke he auro, mo e ario, mo e apakula, mo e lapatoa, mo e ie kula uhi, mo e kula momoho, mo e uli, ko e tagata kua iloa foki ke ta mena ai ke he tau mena oti, kia fakalataha a ia mo e tau tufuga ha ha ia au i Iuta mo Ierusalema, ko e tau tufuga ne fifili he matua haku ko Tavita.
8 Kia fakafano mai foki e koe kia au, i Lepanona, ko e tau akau ko e tau arasi, mo e tau perosi, mo e tau ahi; ha kua iloa e au kua tufuga e tau fekafekau hau ke ta akau i Lepanona; ti kitiala to fakalataha e tau fekafekau haku mo e tau fekafekau hau,
9 Kia taute maaku e tau akau loga; ha ko e fale ko e taute ne fai e au ko e fale lahi ni, ko e fale ke ofo ai.
10 Kitiala, to ta atu e au ke he tau fekafekau hau, ko e tau tufuga ta akau, uafulu e afe kori saito kua holia, mo e uafulu a afe kori karite, mo e uafulu e afe paita uaina, mo e uafulu e afe paita puke lolo.
11 Ti pehe mai e patuiki a Turo ko Hairamo ke he tohi ne ta mai ai e ia kia Solomona, Kua fakaalofa mai a Iehova ke he hana motu, ko e mena ia kua eke e ia a koe mo patuiki ha lautolu.
12 Ne pehe mai foki a Hairamo, Kia fakamonuina atu kia Iehova ko e Atua a Isaraela, ko ia ne eke e lagi mo e lalolagi, kua foaki mai e ia ke he patuiki ko Tavita e tama tane iloilo, kua iloa e tau mena ko e tagata pulotu, mo e loto manamanatu, ke ta ai e ia e fale ma Iehova, mo e fale mo e hana kautu.
13 Hanai, kua fakafano atu e au e tagata iloilo, kua iloa e tau mena he loto manamanatu, ko Hairamo ni ko e haku matua.
14 Ko e tama a ia he fifine he fanau a Tano, ka ko e matua tane hana ko e tagata Turo, kua iloilo a ia ke gahua ke he auro, mo e ario, mo e apakula, mo e lapatoa, mo e tau maka, mo e tau akau, mo e ie kula uhi, mo e ie uli, mo e ie lino, mo e ie kula momoho; ke ta foki e ia e tau mena oti ke ta ai, mo e fatuakiloto e ia e tau gahua iloilo oti; kia tuku atu foki kia ia e mena ke nofo ai fakalataha mo e tau tagata iloilo hau, mo e tau tagata iloilo he haku a iki ko Tavita ko e hau a matua.
15 Hanai foki, ko e tau fua saito, mo e tau fua karite, mo e puke lolo mo e uaina, ne vagahau mai ai haku a iki, kia fakafano mai ia ke he hau a tau fekafekau.
16 To ta e mautolu e tau akau mai Lepanona ke lata mo e tau mena oti nakai moua ai e koe; ti ta atu ai e mautolu hala moana ke he tau vaka lakau ki Iopa; ti ta hake ai e koe ki Ierusalema.
17 Ti totou e Solomona e tau tagata kehe oti ha ha i ai ke he motu a Isaraela, ka e mole atu e totou ne totou ai he matua hana ko Tavita a lautolu; ti kitia a lautolu ko e taha teau limagofulu e afe ti tolu e afe mo e ono e teau tagata.
18 Ne kotofa e ia fitugofulu e afe ke uta e tau kavega, mo e valugofulu e afe ke talai maka ke he mouga, mo e tolu e afe ono e teau tagata ne pule ke he motu o tagata ia kia eke ai e lautolu e tau gahua.