2 Nofoaga he Tau Patuiki 26:1-23
26 TI uta he motu oti a Iuta a Usia ke he tau hogofulu ma ono hana, mo e kotofa e lautolu a ia ke eke mo patuiki ke hukui aki hana matua ko Amasia.
2 Ne ati e ia a Elata mo e liuaki mai foki kia Iuta, ka kua takoto e patuiki fakalataha mo e hana tau matua.
3 Ko e hogofulu ma ono e tau tau a Usia he eke a ia mo patuiki, ne limagofulu ma ua e tau ne patuiki ai a ia i Ierusalema. Ko e higoa foki he matua fifine hana ko Iekalia, ko e tagata Ierusalema a ia.
4 Ne eke ai e ia e mahani tututonu ki mua a Iehova ke lata mo e tau mena oti ne eke he matua hana ko Amasia.
5 Ne kumi e ia e Atua ke he vaha ia Sakaria ko e tagata pulotu ke he fakakiteaga mai he Atua; ko e tau aho foki ia ne kumi e ia a Iehova, ne fakamonuina he Atua a ia.
6 Ne fina atu a ia mo e tau mo e tau tagata Filisitia, mo e ulu moumou ai e ia e kaupa a Kata, mo e kaupa a Iapene, mo e kaupa a Asetota, mo e ati e ia e tau maga he motu ko Asetoa, mo e motu he tau tagata Filisitia.
7 Ne lagomatai foki he Atua kia ia ke tau mo e tau tagata Filisitia, mo e tau tagata Arapi ne nonofo i Kuro-paala, mo e tau tagata Meunima.
8 Ne ta age foki he tau tagata Amoni e tau poa kia Usia; ne uta foki hana higoa ke hoko atu ke he puhala ne fina atu ai ki Aikupito; ha ko e mena fakamalolo lahi ni a ia.
9 Ne ati e Usia e tau kolo i Ierusalema i luga he gutuhala he malokuaga, i luga foki he gutuhala he pahua, mo i luga he malokuaga he kaupa, ne eke e ia mo e fakamalolo.
10 Ne ati foki e ia e tau kolo ke he tutakale, mo e keli ai e ia e tau vaikeli loga; he ha ha ia ia e tau fuifui manu loga ke he motu tokolalo, mo e kelekele tatai; ko e tau tagata gahua fonua foki, mo e tau tagata gahua vine ke he tau mouga mo Karamelu; he fiafia a ia ke he gahua fonua.
11 Ha ha ia Usia foki e tau kau, ko e tau tagata tau ne o atu ke he tau kau ke tau, ke lata mo e totou ha lautolu po ke tokofiha, he totou e Ieielu ko e tohikupu, mo Maaseia ko e pule, ke he pule foki a Hanania, ko e taha takitaki kau he patuiki a ia.
12 Ko e katoatoa e tau tui ne mua he totou, ko e tau toa malolo, ne ua e afe ti ono e teau.
13 Ne pule a lautolu ke he kau kua tauteute ke tau ne tolu e teau afe mo e fitu e afe mo e lima e teau, ko lautolu na ne tau mo e malolo lahi ke lagomatai ke he patuiki ke tau mo lautolu kua fai fi kia ia.
14 Ne taute foki e Usia ma lautolu; ko e kau oti ni e tau akau punuti, mo e tau tao, mo e tau potiki tau, mo e tau tapulu tau lapatoa, mo e tau kaufana, mo e tau maka kua liti aki he filo.
15 Ne eke foki e ia i Ierusalema e tau mena ke fana aki, ne fatuakiloto he tau tagata iloilo, mo e tuku ai e lautolu ki luga he tau kolo, ki luga foki he tau hika he kaupa, ke fana aki e tau fana, mo e tau maka lalahi. Ti hoko atu e ogo kia ia ke he tau motu mamao; ha ko e lagomatai ne moua e ia, ko e mena ke ofo ai haia, ato malolo a ia.
16 Kua malolo a ia, ti fakatokoluga ai hana loto, ke fakahiku ai ke he hana malaia; ne holifono a ia kia Iehova, hana Atua, ne hu atu a ia ke he faituga a Iehova ke huhunu ai e mena manogi ki luga he fatapoa kua huhunu ai e mena manogi.
17 Ti mumui atu kia ia e ekepoa ko Asaraia, katoa mo e tau ekepoa a Iehova tokovalugofulu ne fakalataha mo ia, ko e tau tagata malolo;
18 Ti totoko atu a lautolu ke he patuiki ko Usia, kua pehe age a lautolu kia ia, Usia na e, nakai lata kia koe ke huhunu e mena manogi ki mua a Iehova, ka ko e tau ekepoa ko e fanau a Arona, kua fakatapu a lautolu ke huhunu ai e mena manogi; ki haele kehe a koe he faituga; ha kua holifono a koe; ti nakai hoko kia koe e lilifu mai ia Iehova ko e Atua.
19 Ti ita a Usia, ha ha he lima hana foki e kapiniu ke huhunu ai e mena manogi; ha ne ita a ia ke he tau ekepoa, ti tupu agataha e lepela ke he hana mua le ki mua he tau ekepoa ke he fale a Iehova, ke he tapa he fata kua huhunu ai e mena manogi.
20 Ne kitekite atu kia ia e ekepoa ne mua ko Asaraia, katoa mo e tau ekepoa oti, ti kitiala, ha ha ia ia e lepela ke he hana mua le, ti vega atu e lautolu a ia he mena ia; ne alumaki foki a ia mo e fano ki fafo ha kua ta e Iehova a ia.
21 Ti lepela e patuiki ko Usia kua hoko ke he aho ne mate ai a ia, mo e nofo ai a ia he fale kehe he lepela a ia; ha kua vevehe kehe a ia mo e fale a Iehova. Ko e hana tama tane foki ko Iotamo kua pule a ia ke he magafaoa he patuiki, kua fakafili e ia e tau tagata he motu.
22 Ko e tau mena ne toe ne eke e Usia, ko e tau mena fakamua mo e tau mena fakamui, ne tohi he perofeta ko Isaia ko e tama a Amota.
23 Kua takoto a Usia fakalataha mo e hana tau matua tane ti tanu e lautolu a ia ke he fonua ne tanu ai e tau patuiki; he pehe a lautolu, ko e lepela a ia. Ti eke e tama hana ko Iotamo mo patuiki ke hukui aki a ia.