2 Nofoaga he Tau Patuiki 28:1-27
28 NE uafulu e tau tau a Ahasa he eke a ia mo patuiki; ti hogofulu ma ono e tau ne patuiki ai a ia i Ierusalema; ka e nakai eke e ia e mahani tututonu ki mua a Iehova, tuga na Tavita hana matua;
2 Ka e fano ai a ia ke he tau puhala he tau patuiki a Isaraela, ne eke foki e ia e tau tupua lapatoa kia Paala.
3 Ne fakavela ai e ia e tau mena manogi ke he pahua he tama tane a Hinoma, mo e huhunu e ia hana fanau ke he afi, ke lata mo e mahani fakalialia he tau motu kehe ne vega e Iehova ki mua he fanau a Isaraela.
4 Ne eke poa foki e ia mo e fakavela ai e tau mena manogi ke he tau mena tokoluga, ki luga foki he tau mouga, katoa foki mo i lalo he tau akau lau uhiuhi oti.
5 Ti tuku atu e Iehova hana Atua a ia ke he lima he patuiki a Suria; ne keli e lautolu hana kau, mo e uta e lautolu ia ia e motu o tagata tokologa ne fofo he tau, mo e uta a lautolu ki Tamaseko. Ne tuku atu foki a ia ke he lima he patuiki a Isaraela, ne keli foki hana kau mo e keliaga lahi.
6 Ne kelipopo e Peka ko e tama a Remalia i Iuta, taha e teau afe ti uafulu e afe tagata ke he aho taha, ko e tau toa ni a lautolu oti; ha kua tiaki e lautolu a Iehova ko e Atua he tau matua ha lautolu.
7 Ko Sikeri ko e tagata malolo a Efaraimo, ne keli e ia a Maasaia ko e tama he patuiki, mo Aserikama ko e iki he magafaoa, mo Elekana ko e tagata ne uaaki e patuiki.
8 Ne uta he tau tagata Isaraela ua e teau afe tagata mo tau tagata ne fofo he tau mai he tau matakainaga ha lautolu, ko e tau fifine, ko e tau tama tane, mo e tau tama fifine, ne uta foki e lautolu e tau mena loga ne moua he tau, ti uta e lautolu e tau mena ne moua he tau ki Samaria.
9 Ha ha i ai foki ke he mena ia e perofeta a Iehova, ko Oteta hana higoa; ne fina atu a ia ki mua he kau ne o mai i Samaria, mo e pehe atu a ia kia lautolu, Kitiala, ne ita a Iehova ko e Atua he tau matua ha mutolu kia Iuta, ti tuku mai e ia a lautolu ke he tau lima ha mutolu, ti kua keli e mutolu a lautolu mo e ita ke hoko hake ke he lagi.
10 Hanai, kua manatu a mutolu ke fakatupa e fanau a Iuta mo Ierusalema ke eke a lautolu mo tau fekafekau tane, mo tau fekafekau fifine foki kia mutolu; nakai kia toka ai ia mutolu, ko mutolu ni, e tau hala kia Iehova ha mutolu a Atua?
11 Hanai, kia fanogonogo mai a mutolu kia au, mo e liuaki atu e mutolu e tau tagata ne fofo he tau ko e tau tagata ne fofo he tau kua ta mai e mutolu he tau matakainaga ha mutolu; ha ko e mena ha ha i luga ha mutolu e ita lahi a Iehova.
12 Ti mamatike ai falu he tau tui ne mua he fanau a Efaraimo, ko Asaraia ko e tama a Iohanana, ko Perekia ko e tama a Meselemita, mo Iesekia ko e tama a Saluma, mo Amasa ko e tama a Hatalai, ti totoko atu a lautolu kia lautolu ne o mai he tau,
13 Ne pehe atu a lautolu kia lautolu, Nakai ta mai e mutolu e tau tagata ne moua he tau ki hinei ha kua nonofo a tautolu mo e kelea ki mua a Iehova, kua manatu a mutolu ke lafilafi ke he tau hala ha tautolu, mo e nonofo a tautolu mo e kelea; ha ko e mena nonofo a tautolu mo e kelea lahi ni, ha ha i Isaraela foki e ita lahi.
14 Ti toka ai he tau tagata tau e tau tagata ne fofo he tau mo e tau mena ne moua he tau ki mua he tau iki, ki mua foki he fakapotopotoaga oti.
15 Ti mamatike e tau tagata ne talahaua ha lautolu a tau higoa, mo e uta e lautolu e tau tagata ne fofo he tau, mo e fakatapulu e lautolu a lautolu oti kua nakai fai felevehi ke he tau mena ne moua he tau, mo e fakatapulu ai a lautolu, mo e afi e tau aloalohui ha lautolu, mo e fagai a lautolu, mo e fakainu a lautolu, mo e fakatakai e lautolu a lautolu, mo e fakaheke e lautolu a lautolu oti ne lolelole ki luga he tau asini, mo e uta a lautolu ke he tau matakainaga ha lautolu i Ieriko, ko e maga he tau akau ko e tau pama; ti liliu atu a lautolu ki Samaria.
16 Ko e vaha ia ne fakafano atu he patuiki ko Ahasa ke he tau patuiki a Asuria ke lagomatai kia ia.
17 Ha kua o mai foki e tau tagata Etoma mo e keli e lautolu a Iuta, mo e uta e lautolu e tau tagata ne fofo he tau.
18 Ne feoho mai foki e tau tagata Filisitia ke he tau maga ke he faahi tokolalo, mo e faahi toga a Iuta, ne fofo foki e lautolu a Petesemesa, mo Ailona, mo Keterota, mo Suka mo e hana tau maga, mo Simena mo e hana tau maga, mo Kimeso mo e hana tau maga, mo e nonofo ai a lautolu.
19 He fakatokolalo ai e Iehova a Iuta ha ko e patuiki a Isaraela ko Ahasa; he mahani fakahanoa a ia i Iuta, mo e hala ni a ia kia Iehova.
20 Ne hau foki kia ia e patuiki a Asuria ko Tikelatapilesa, mo e fakamamahi e ia a ia, ka e nakai lagomatai kia ia.
21 Ha kua uta e Ahasa e tau mena mai he fale a Iehova, mo e fale he patuiki, mo e tau fale he tau iki, mo e ta age ai ke he patuiki a Asuria; ka e nakai lagomatai mai a ia kia ia.
22 Ko e tau aho foki he hana matematekelea ne au atu ai he hala a ia kia Iehova; ko e patuiki ko Ahasa haia.
23 Ne eke poa foki e ia ke he tau atua a Tamaseko ko lautolu ne keli a ia; ne pehe age a ia, Kua malolo e tau atua he tau tagata Suria ke lagomatai kia lautolu, ko e mena ia to ekepoa e au kia lautolu ke lagomatai mai a lautolu kia au. Ka e eke a lautolu mo mena ke malaia ai a ia, katoa mo Isaraela oti ni.
24 Ne fakapotopoto foki e Ahasa e tau kapiniu oti he fale he Atua, mo e helehele ai e ia e tau kapiniu he fale he Atua, mo e pa ai e ia e tau gutuhala he fale a Iehova, ne eke foki e ia e tau fatapoa ke he tau hika oti he kaupa i Ierusalema.
25 Ne eke foki e ia ke he tau maga oti takitaha a Iuta e tau mena tokoluga ke huhunu ai e tau mena manogi ke he tau atua kehe, mo e fakahogohogomanava ai e ia a Iehova ko e Atua he hana tau matua.
26 Ko e tau mena ne toe ne eke e ia mo e hana tau mahani oti, ko e tau mena fakamua mo e tau mena fakamui, kitiala, kua tohi ai ke he tohi ne tohi ai e tala ke he tau patuiki a Iuta mo Isaraela.
27 Ne takoto foki a Ahasa fakalataha mo e hana tau matua, ti tanu e lautolu a ia ke he maga ko Ierusalema; ka e nakai ta mai e lautolu a ia ke he tukuaga he tau patuiki a Isaraela; ti eke e tama hana ko Hesekia mo patuiki ke hukui aki a ia.