2 Nofoaga he Tau Patuiki 3:1-17
3 TI kamata e Solomona ke eke ai e fale a Iehova i Ierusalema ke he mouga ko Moria, ke he mena ne fakakite mai ke he matua hana ko Tavita, ko e mena ne taute e Tavita, ke he mena taholi saito a Aruna ko e tagata Iepusi.
2 Ne kamata ai e ia ke ta e fale ke he aho ua he ua mahina, ke he tau fa he eke a ia mo patuiki.
3 Ko e tau fakaveaga hanai ne eke e Solomona ke ati ai e fale he Atua. Ko e loa ke he tau kupita ne fakalata ke he fafati fakamua ne onogofulu e kupita, mo e uafulu e kupita hana laulahi.
4 Ko e loa he fakamaluaga ki mua he fale kua lata ia mo e laulahi he fale, ne uafulu e kupita hana, mo e hana tokoluga ko e taha teau ti uafulu e kupita; ne fakakili aki e ia ki loto ke he auro mitaki.
5 Ka ko e fale lahi ne ufi aki e ia ke he tau akau ko e tau perosi, ne fakakili ai foki e ia ke he auro mitaki, mo e ta ki ai e ia e tau pama, mo e tau mena filifili.
6 Ne ufiufi ai e ia e fale ke he tau maka uho ke fulufuluola ai; ko e auro foki ko e auro mai Parovaima.
7 Ne ufi aki e ia e fale, ko e tau akau fakalava, mo e tau akau fakalava he tau gutuhala, mo e hana tau kaupa, mo e hana tau gutuhala; ne ta ai foki e ia e tau kerupi ke he tau kaupa he fale.
8 Ne eke foki e ia e fale tapu ue atu, ko e hana loa kua tatai mo e laulahi he fale, ko e uafulu e kupita, mo e hana laulahi ko e uafulu e kupita, ne ufi aki foki e ia ke he auro mitaki, ne ono e teau e taleni.
9 Ko e mamafa he tau fao ko e limagofulu e sikeli auro haia. Ne ufi aki foki e ia e tau poko i luga ke he auro.
10 Ne eke foki e ia ke he fale tapu ue atu ua e kerupi, ke he gahua he tagata ta mena, mo e kili aki e ia a laua ke he auro.
11 Ko e loa he tau tapakau he tau kerupi ko e uafulu e kupita; ne lima e kupita taha tapakau ne hoko ia ke he kaupa he fale; mo e lima e kupita he taha tapakau, ti tuuta ia mo e tapakau he taha kerupi.
12 Ne lima foki e kupita e loa he tapakau he taha kerupi, ne hoko ke he kaupa he fale; mo e lima e kupita taha tapakau, kua tuuta ia mo e tapakau he taha kerupi.
13 Ko e uafulu e kupita e loa he tau tapakau he na kerupi ia, he fofola atu, Ne tutu a laua ke he tau hui ha laua, ne fakahagao foki e tau mata ha laua ke he loto fale.
14 Ti eke e ia e ie puipui ke he ie uli, mo e kula uhi, mo e kula momoho, mo e ie lino, mo e eke e ia i ai e tau kerupi.
15 Ne eke foki e ia ua e pou ki mua he fale, ne tolugofulu ma lima e kupita e tokoluga, mo e tau kapetala i luga he tau pou ne taki lima e kupita.
16 Ti eke e ia e tau mena filifili, tuga he eke ke he mena ke vagahau mai ai, mo e tuku ai ki luga he tau pou; ne eke foki e ia taha teau e rimoni, mo e tuku ai ke he tau mena filifili.
17 Ti fakatu e ia e tau pou ki mua he faituga, ko e taha ke he fahi matau, mo e taha ke he fahi hema; ti ui e ia e higoa he pou ke he fahi matau ko Iakina, mo e higoa he pou ke he fahi hema ko Poasa.