2 Nofoaga he Tau Patuiki 31:1-21
31 KUA mole atu e tau mena oti ia ti o atu a Isaraela oti ne ha ha i ai ke he galue, ke he tau maga a Iuta, mo e tukimalipilipi e lautolu e tau tupua, mo e hio ki lalo e tau tupua a Asaira, mo e ulu moumou e lautolu e tau mena tokoluga, mo e tau fatapoa ha ha i Iuta oti, katoa mo Peniamina, mo Efaraimo, mo Manase, ato fakaoti ai e lautolu e tau mena oti ia. Ti liliu atu ai e fanau a Isaraela oti, takitaha ke he hana tufaaga ke he tau maga ha lautolu.
2 Ti kotofa ai e Hesekia e tau vahega he tau ekepoa, mo e tau tagata Levi, ke lata mo e tau vahega ha lautolu, takitaha e tagata ke lata mo e hana gahua, ko e tau ekepoa mo e tau tagata Levi, ke eke ai e tau poa huhunu mo e tau poa fakaaue, ke fekafekau, mo e fakaaue, mo e fakaheke atu ke he tau gutuhala he heaga api a Iehova.
3 Ne kotofa foki e ia e veveheaga he koloa he patuiki ma e tau poa huhunu, ko e tau poa huhunu ke he pogipogi mo e afiafi, mo e tau poa huhunu ke he tau sapati, mo e tau mahina pula fou, mo e tau galue, tuga ne tohi ai ke he fakatufono a Iehova.
4 Ne pehe age foki a ia ke he motu ko lautolu ne nonofo i Ierusalema ke ta mai e lautolu e veveheaga he tau mena ma e tau ekepoa ma e tau tagata Levi foki, kia fakamalolo a lautolu ke he fakatufono a Iehova.
5 Kua hoko atu e poaki, ti ta mai ai he fanau a Isaraela e tau mena loga hanai, ko e tau fua uluaki he tau saito, mo e uaina, mo e puke lolo, mo e meli, mo e tau fua oti he kelekele; ko e tau veveheaga foki ne hogofulu aki e tau mena oti ne ta mai fakaloga ai e lautolu.
6 Ko e fanau foki a Isaraela mo Iuta, ko lautolu ne nonofo ke he tau maga a Iuta, ne ta mai foki e lautolu e veveheaga ne hogofulu aki he tau povi, mo e tau mamoe, mo e veveheaga ne hogofulu aki e tau mena tapu kua fakatapu kia Iehova ha lautolu a Atua, mo e tuku ai e lautolu ke he tau tumutumu.
7 Ne kamata e lautolu ke eke e tau tumutumu ke he tolu mahina, ka e fakahiku ai he eke ke he fitu mahina.
8 Ti o mai a Hesekia, mo e tau iki, kua kitekite a lautolu ke he tau tumutumu, ti fakaaue atu ai a lautolu kia Iehova, mo e hana motu ko Isaraela.
9 Ti huhu atu ai a Hesekia ke he tau ekepoa mo e tau tagata Levi po ke heigoa e tau tumutumu ia.
10 Ti tali mai ai he ekepoa ne mua ko Asaraia ko e tagata he magafaoa a Satoka, kua pehe mai, Tali he kamata he tau tagata ke ta mai e tau poa ke he fale a Iehova, kua kai a mautolu mo e makona, ne loga foki e tau mena ne toe; ha kua fakamonuina e Iehova hana motu; ko e tau mena foki ne toe ko e tau mena loga na.
11 Ti pehe atu a Hesekia ke taute e tau poko ke he fale a Iehova; ti taute ai e lautolu.
12 Ti ta mai ai e lautolu e tau poa mo e fakamoli, mo e tau mena ne hogofulu aki e tau mena, mo e tau mena kua fakatapu; ne pule ai ke he tau mena ia a Konania ko e tagata Levi, mo e matakainaga hana ko Semi ne ua aki a ia.
13 Ko Ieielu foki, mo Asasia, mo Nakato, mo Asaelu, mo Ierimota, mo Iosapata, mo Elielu, mo Isemakia, mo Makata, mo Penaia, ko e tau takitaki ia ne pule ki ai a Konania mo e matakainaga hana ko Semi, ke lata mo e poaki he patuiki ko Hesekia, mo Asaraia ko e pule ke he fale he Atua.
14 Ko Kore ko e tama a Iemina ko e tagata Levi, ko e leoleo he gutuhala ke he fahi uta, ne pule a ia kehe tau poa ne makai ki ai e tau loto he tau tagata ke eke ke he Atua, ke tufatufa e tau poa a Iehova mo e tau mena tapu ue atu.
15 Ko lautolu ne mumui age kia ia ko Etena, mo Miniamina, mo Iesua, mo Semaia, mo Amaria, mo Sekania, ke he tau maga he tau ekepoa, ke ta age e tau mena mo e fakamoli ke he tau matakainaga ha lautolu, ke lata mo e tau vahega ha lautolu, ko lautolu ne fakamua katoa mo lautolu ne fakamui;
16 Ka e kehe a lautolu ko e tau tane ne tohi ai ke he tau hau ha lautolu, ne kamata ia lautolu ne tolu ha lautolu a tau tau katoa mo lautolu ne fakamua atu, ne ta age kia lautolu takitaha ne huhu atu ke he fale a Iehova, ko e aho mo e mena kua ta age ai ma e tau gahua ha lautolu ke he tau kotofaaga ha lautolu ke lata mo e ha lautolu a tau vahega;
17 Mo e tau ekepoa ne tohi ke he tau hau ha lautolu ke he tau magafaoa he tau matua tane ha lautolu, mo e tau tagata Levi ne kamata ia lautolu ne uafulu ha lautolu a tau tau katoa mo lautolu ne fakamua atu, ke he tau kotofaaga ha lautolu ke lata mo e tau vahega ha lautolu;
18 Mo lautolu ne tohi ke he tau hau ha lautolu, ko e tau tama ikiiki oti ha lautolu, ko e tau hoana ha lautolu, ko e ha lautolu a tau tama tane, mo e ha lautolu a tau tama fifine, ke he fakapotopotoaga oti; ha kua fakatapu e lautolu a lautolu ke tapu ni a lautolu ke he tau kotofaaga ha lautolu;
19 Ko e tau ekepoa foki ko e fanau a Arona ha ha he tau fonua he tau vao ne takai ai e tau maga ha lautolu, ke he tau maga oti takitaha, he tau tagata kua talahau ai ha lautolu a tau higoa, ke ta age ai e tau tufaaga ke he tau tane oti he vahega he tau ekepoa, mo e tau tagata Levi oti kua tohi ke he tau hau ha lautolu.
20 Ne eke pihia e Hesekia i Iuta oti, ne eke foki e ia e mahani mitaki, mo e hakohako, mo e fakamoli ki mua e Iehova hana Atua.
21 Ko e tau mena oti ne kamata ai e ia ke eke ke he gahua he fale he Atua, mo e fakatufono, mo e tau poakiaga, ke kumi ke he hana Atua, ne eke e ia mo e hana loto katoa, mo e monuina ai a ia.