2 Nofoaga he Tau Patuiki 33:1-25
33 NE hogofulu ma ua e tau tau a Manase he eke a ia mo patuiki; ti limagofulu ma lima e tau ne patuiki ai a ia i Ierusalema;
2 Ne mahani kelea a ia ki mua a Iehova, tuga ne tau mahani fakalialia he tau motu ne vega kehe ai e Iehova ki mua he fanau a Isaraela.
3 Ne ati foki e ia e tau mena tokoluga ne ulu moumou ai he tau matua hana ko Hesekia, mo e fakatu ai e ia e tau fatapoa ma Paala, mo e eke e ia e tau tupua a Asaira, mo e fakaveli fakafohifo ai a ia ke he tau kau oti he lagi, mo e fekafekau a ia kia lautolu.
4 Ne ati foki e ia e tau fatapoa ke he fale a Iehova, ko e mena ne pehe mai ai a Iehova, To ha ha i ai tukulagi haku higoa i Ierusalema.
5 Ti ati ai e ia e tau fatapoa ma e tau kau oti he lagi ke he tau lotopa ne ua he fale a Iehova.
6 Ne fakafano age foki e ia hana fanau ki loto he afi ke he pahua he tama tane a Hinoma; ne talahau mena foki he kitekite ke he tau aolagi; mo e eke e tau lagatau he tau taulaatua, mo e vagahau po ke taulaatua, ne kumi foki e ia kia lautolu ne ha i ai e tau agaga talahau tuai, mo e tau taulaatua; ne eke ai e ia e tau mahani kelea loga ki mua a Iehova, ke fakahogohogomanava kia ia.
7 Ko e tupua kua ta foki ne eke e ia, ne fakatu ai e ia ke he fale he Atua, ke he mena ne talahau mai ai he Atua kia Tavita mo e tama hana ko Solomona, Ko e fale nai katoa mo Ierusalema kua fifili e au mai he tau magafaoa oti a Isaraela, ke tuku ai e au haku higoa tukulagi;
8 To nakai uta kehe foki e au a Isaraela he kelekele ne kotofa ai e au ma e tau matua ha mutolu; ka e aua neke nakai omaoma a lautolu kia eke e lautolu e tau mena oti ne poaki atu e au kia lautolu ia Mose, ke lata mo e tau poaki oti, mo e tau fakatufono, mo e tau fakafiliaga.
9 Ne fakahehe foki e Manase a Iuta mo lautolu ne nonofo i Ierusalema ke eke e mahani ne mua he kelea ke he mahani he tau motu ne fakaotioti ai e Iehova ki mua he fanau a Isaraela.
10 Ti vagahau mai a Iehova kia Manase mo e hana motu; ka e nakai ni fanogonogo a lautolu.
11 Ti fakahoko mai ai e Iehova kia lautolu e tau iki ne pule ke he tau kau he patuiki a Asuria, kua moua e lautolu a Manase ke he tau matau, ti lili e lautolu a ia ke he tau liliaga apa kula, mo e uta e lautolu a ia ki Papelonia.
12 Kua matematekelea a ia, ti olelalo atu ai a ia kia Iehova hana Atua, mo e fakatokolalo lahi ni a ia ki mua he Atua he hana tau matua,
13 Ne liogi foki a ia kia ia; ti fanogonogo mai a ia kia ia, mo e talia e ia hana a ole, mo e liuaki mai e ia a ia ki Ierusalema ke he hana kautu. Ti iloa ai e Manase, ko Iehova ko e Atua a ia.
14 Kua mole atu e tau mena ia, ti ati hake ai e ia e kaupa ki tua he maga a Tavita, ke he fahi lalo a Kihona, ke he pahua ke hoko atu ke he gutuhala he tau ika, mo e takai ai ki Ofele, mo e ati hake ai ke tokoluga lahi ni, ne kotofa foki e ia e tau takitaki kau ke he tau maga nonofo taue oti a Iuta.
15 Ne uta kehe foki e ia e tau atua kehe, mo e tupua mai he fale a Iehova, mo e tau fatapoa oti ne ati ai e ia ke he mouga ne tu ai e fale a Iehova mo Ierusalema, mo e liti atu ai e ia ki tua he maga.
16 Ne ati foki e ia e fatapoa a Iehova, mo e eke ai e ia ki luga hana e tau poa fakaaue, mo e tau poa fakaheke, ne pehe age foki a ia kia Iuta kia fekafekau atu a lautolu kia Iehova ko e Atua a Isaraela.
17 Ka e pete ia ne eke poa agaia he motu ke he tau mena tokoluga, ka ko Iehova hokoia ko e Atua ha lautolu ne eke poa ki ai e lautolu.
18 Ko e tau mena ne toe ne eke e Manase, mo e hana liogi ke he hana Atua, mo e tau kupu he tau tagata kitekite ne vagahau age a lautolu kia ia ke he higoa a Iehova ko e Atua a Isaraela, kitiala, kua tohi ai ke he tau tala ke he tau patuiki a Isaraela.
19 Ko e hana liogi foki, mo e fanogonogo ki ai e Atua, mo e hana tau hala oti mo e hana holifono, mo e tau mena ne eke ai e ia e tau mena tokoluga, mo e fakatu ai e ia e tau tupua a Asaira, mo e tau tupua kua ta, ka e nakaila fakatokolalo ai a ia, kitiala, kua tohi ke he tau tala a Hosai.
20 Kua takoto foki a Manase fakalataha mo e hana tau matua tane, ti tanu e lautolu a ia ke he fale hana. Ti eke e tama hana ko Amone mo patuiki ke hukui aki a ia.
21 Ne uafulu ma ua e tau tau a Amone he eke a ia mo patuiki; ne ua foki e tau ne patuiki ai a ia i Ierusalema.
22 Ne eke foki e ia e tau mahani kelea ki mua a Iehova, tuga ne eke he matua hana ko Manase; ha ko e mena eke poa ai e Amone ke he tau tupua oti kua ta ne eke he matua hana ko Manase, mo e fekafekau ki ai a ia;
23 Ka e nakai fakatokolalo a ia ki mua a Iehova, tuga ne fakatokolalo ai e matua hana ko Manase, ka ko Amone ne fakalahi ai e ia hana tau hala.
24 Ti fakafualoto hana tau fekafekau kia ia, mo e kelipopo ai e lautolu a ia ke he fale hana.
25 Ka e kelipopo he tau tagata he motu a lautolu oti ne fakafualoto ke he patuiki ko Amone; ne kotofa foki he tau tagata he motu e tama hana ko Iosia ke eke mo patuiki ke hukui aki a ia.