2 Nofoaga he Tau Patuiki 34:1-33
34 KO e valu e tau tau a Iosia he eke a ia mo patuiki; ti tolugofulu ma taha e tau ne patuiki ai a ia i Ierusalema.
2 Ne eke e ia e mahani hakohako ki mua a Iehova, mo e fano ai a ia ke he tau puhala a Tavita hana matua, nakai afe atu a ia ke he fahi matau, po ke fahi hema.
3 Ko e tau valu foki he hana eke mo patuiki, ka ko e fuata agaia a ia, ne kamata ai a ia ke kumi ke he Atua a Tavita hana matua; ko e tau hogofulu ma ua foki ne kamata ai a ia ke fakamea a Iuta mo Ierusalema mai he tau mena tokoluga, mo e tau tupua a Asaira, mo e tau tupua kua ta, mo e tau tupua lapatoa.
4 Ne ulu moumou foki e lautolu e tau fatapoa a Paala ki mua hana; ti hio ki lalo e ia e tau tupua he lā ne tokoluga ai ki luga ha lautolu, he tuki malipilipi foki e ia e tau tupua a Asaira, mo e tau tupua kua ta, mo e tau tupua kua lapatoa, mo e eke ai mo efuefu, mo e tolo ai ki luga he tau tukuaga ha lautolu ne ekepoa ki ai.
5 Ne huhunu e ia e tau hi atua he tau ekepoa ki luga he tau fatapoa ha lautolu, mo e fakamea ai e ia a Iuta mo Ierusalema.
6 Ne eke pihia foki e ia ke he tau maga a Manase, mo Efaraimo, mo Simeona, ne hoko atu ki Nafatali ke he tau mena ha lautolu kua eke mo vao ke he tau fahi oti.
7 Ne ulu moumou e ia e tau fatapoa, mo e tau tupua a Asaira, mo e tukimalipilipi ai e tau tupua kua ta, kua eke mo efuefu, mo e hio ki lalo e tau tupua oti he lā ke he motu oti a Isaraela; ti liu mai a ia ki Ierusalema.
8 Ko e tau hogofulu ma valu he hana eke mo patuiki, kua fakamea tuai e ia e motu mo e fale, ti fakafano atu e ia a Safana ko e tama a Asalaia, mo Maaseia ko e iki he maga, mo e Ioaa koe tama a Ioaasa ko e tagata fakamau kupu, ke taute e fale a Iehova hana Atua.
9 Kua o atu a lautolu ke he ekepoa ne mua ko Hilikia, mo e ta atu e lautolu kia ia e tau tupe ne ta mai ai ke he fale he Atua, ne tatanaki ai he tau tagata Levi, ko e tau leveki gutuhala, mai he tau lima a Manase, mo Efaraimo, mo lautolu oti ne toe i Isaraela, mo Iuta oti, mo Peniamina, katoa mo lautolu ne nonofo i Ierusalema.
10 Ti ta age ai e lautolu ke he tau ekegahua ne pule ke he fale a Iehova, ti ta age e lautolu ke he tau tagata ekegahua ne gahua ai ke he fale a Iehova, ke fakafou mo e taute ai e fale;
11 Ne ta age e lautolu ke he tau tufuga, mo e tau tufuga ati fale ke fakafua aki e tau maka talai, mo e tau akau ke tutaki aki, mo e tau akau fakalava, ma e tau fale ne moumou, he tau patuiki a Iuta.
12 Ne eke he tau tagata e gahua mo e fakamoli; ne pule kia lautolu a Iahata mo Opetaia ko e tau tagata Levi, mai he fanau a Merari; ko Sakaria foki mo Mesulama, mai he fanau a Koato ke leoleo ai; mo e falu foki he tau tagata Levi, ko lautolu oti ne iloilo ke he tau akau fakatagi.
13 Ne pule foki a lautolu kia lautolu ne hahamo kavega, mo e leoleo kia lautolu oti ne eke gahua ke he tau gahua kehekehe; ko e falu a tagata Levi foki ne eke mo tau tohikupu, mo tau pule foki, mo tau leoleo gutuhala foki.
14 Kua ta mai e lautolu e tau tupe he fale a Iehova, ti moua ai he ekepoa ko Hilikia e tohi he fakatufono a Iehova ne tohi e Mose.
15 Ti tala age e Hilikia, kia Safana ko e tohikupu kua pehe age, Kua moua e au e tohi he fakatufono ke he fale a Iehova. Ti ta age ai e Hilikia e tohi kia Safana.
16 Ti uta e Safana e tohi ke he patuiki, mo e tala age e ia e tala ke he patuiki, kua pehe age, Ko e tau gahua oti ne tuku atu ai e koe ke he tau fekafekau hau, kua eke tuai e lautolu.
17 Kua liligi e lautolu e tau tupe ne moua ai e lautolu ke he fale a Iehova, mo e tuku atu ai e lautolu ke he tau pule mo e tau lima he tau tagata kua eke a gahua.
18 Ti tala age e Safana ko e tohikupu ke he patuiki, kua pehe age, Ne ta mai he ekepoa ko Hilikia e tohi kia au. Ti totou ai e Safana ki mua he patuiki.
19 Kua logona he patuiki e tau kupu he fakatufono, ti hehe ai e ia hana tau tapulu.
20 Ti pehe age e patuiki kia Hilikia, mo Aikamo ko e tama a Safana, mo Apetonu ko e tama a Mika, mo Safana ko e tohikupu, mo Asaia ko e fekafekau he patuiki, kua pehe age,
21 Kia o a a mutolu, ti huhu atu a mutolu kia Iehova maaku, ma lautolu foki ne toe i Isaraela mo Iuta, ke he tau kupu he tohi kua moua; ha kua lahi e ita a Iehova kua liligi hifo kia tautolu, he nakai omaoma e tau matua ha tautolu ke he kupu a Iehova, ke eke e tau mena oti kua tohi ke he tohi na.
22 Ti o atu ai a Hilikia, mo lautolu ne kotofa he patuiki, ke he perofeta fifine ko Hulata, ko e hoana a Saluma ko e tama tane a Tikeva, ko e tama a ia a Harehasa, ko e tagata ne leveki e tau tapulu; (ne nofo a ia i Ierusalema ke he mena ne talahaua ko e maga ne ua aki;) ti vagahau ai a lautolu mo ia ke he tau mena na.
23 Ti pehe age a ia kia lautolu, Kua talahau mai pehe a Iehova ko e Atua a Isaraela, Kia pehe age a mutolu ke he tagata ne fakafano mai a mutolu kia au,
24 Kua talahau mai pehe a Iehova, Kitiala, ko e ta mai ha ne fai e kelea ke he mena nai katoa mo lautolu kua nonofo ai, ko e tau malaia oti kua tohi ai ke he tohi ne totou ai e lautolu ki mua he patuiki a Iuta;
25 Ha kua tiaki e lautolu au ka e huhunu e lautolu e tau mena manogi ke he tau atua kehe, kia fakahogohogomanava mai a lautolu kia au ke he tau mena oti ne eke ai he tau lima ha lautolu; ko e mena ia kua liligi atu ai haku a ita ki luga he mena nai, ti nakai ni tamate.
26 Ka ko e patuiki a Iuta ne fakafano mai a mutolu ke huhu kia Iehova, kia tala age pehe a mutolu kia ia, Kua talahau mai pehe a Iehova ko e Atua a Isaraela ke he tau kupu ne fanogonogo a koe ki ai;
27 Ha kua molu hau a loto, ti fakatokolalo ai ki mua he Atua, he fanogonogo a koe ke he tau kupu hana ke he mena nai, mo lautolu ne nonofo ai, mo e fakatokolalo ai a koe ki mua haku, mo e hehe ai e koe hau a tau tapulu, mo e tagi a koe ki mua haku; kua pehe mai a Iehova, Kua fanogonogo foki au kia koe.
28 Kitiala, to lafi atu e au a koe ke he hau a tau matua, to hoko atu foki a koe ke he hau a tukuaga mo e mafola; ka e nakai kitia he tau mata hau e malaia oti ke fakahoko mai e au ki luga he mena nai, ki luga foki ha lautolu ne nonofo ai. Ti liliu a lautolu mo e tala age ai a lautolu ke he patuiki.
29 Ti fakafano atu he patuiki, mo e fakapotopoto ai e tau patu oti a Iuta katoa mo e Ierusalema.
30 Ti hake ai e patuiki ke he fale a Iehova, ko ia katoa mo e tau tagata Iuta oti, mo lautolu ne nonofo i Ierusalema, mo e tau ekepoa, mo e tau tagata Levi, mo e motu oti ni, ko e tau tagata momotua katoa mo e tau tama ikiiki; ti totou atu e ia ke logona ai e lautolu e tau kupu oti he tohi he maveheaga ne moua ai ke he fale a Iehova.
31 Ti tu ai e patuiki ke he hana tuaga mo e eke ai e ia e maveheaga ki mua a Iehova, ke mui atu a ia kia Iehova, mo e omaoma a ia ke he hana tau poaki, mo e hana tau fakatufono, katoa mo e hana tau kotofaaga, mo e hana loto katoa, mo e hana agaga katoa, ke eke foki e tau kupu he maveheaga kua tohi ke he tohi nai.
32 Ne pule foki a ia kia lautolu oti ha ha i Ierusalema mo Peniamina kia fakamau ai e lautolu e maveheaga. Ne eke foki e lautolu ne nonofo i Ierusalema ke lata mo e maveheaga he Atua, ko e Atua he tau matua ha lautolu.
33 Ti uta kehe ai e Iosia e tau mena fakalialia oti he tau motu oti ne toka ai ke he fanau a Isaraela, mo e pule a ia kia fekafekau a lautolu oti ha ha i Ierusalema, ke fekafekau ni kia Iehova ha lautolu a Atua. Nakai o kehe a lautolu he tau aho oti hana he mumui atu a lautolu kia Iehova ko e Atua he tau matua ha lautolu.