2 Nofoaga he Tau Patuiki 8:1-18
8 KUA mole atu e tau tau ne uafulu ne ta ai e Solomona e fale a Iehova mo e fale hana ni,
2 Ko e tau maga ne ta age e Hairamo kia Solomona ne liu ati e Solomona, ti fakanonofo ai e ia ke he tau mena ia e fanau a Isaraela.
3 Ne fina atu foki a Solomona ki Hamatosopa, mo e kautu ki ai.
4 Ne ati e ia a Tatimora ke he tutakale, mo e tau maga oti ke tuku ai e tau koloa ne ati ai e ia i Hamato.
5 Ne ati foki e ia Petehorono i luga, mo Petehorono i lalo, ko e tau maga ne eke mo tau taue, ha ha i ai e tau kaupa, mo e tau gutuhala, mo e tau akau fakalava;
6 Ko Paalata foki, mo e tau maga oti ha ha ia Solomona ke tuku ai e tau koloa, mo e tau maga oti ma e tau kariota, mo e tau maga ma e tau tagata heke solofanua, mo e tau mena oti ne finagalo ai a Solomona ke eke i Ierusalema, mo Lepanona, mo e motu oti ne pule ai a ia.
7 Ko e tau tagata oti ne toe he tau tagata Heti, mo e tau tagata Amori, mo e tau tagata Perisi, mo e tau tagata Hivi, mo e tau tagata Iepusi, nakai ko e tau tagata Isaraela a lautolu,
8 Ko e fanau ha lautolu ne toe ke he motu, ka kua mole atu a lautolu, ko lautolu nakai fakaotioti ai he fanau a Isaraela, ne pule a Solomona kia lautolu ke ta atu ai e lautolu e poa, hanai ke eke a lautolu mo tau tupa, kua hoko ni ke he aho nai.
9 Ka e nakai eke e Solomona e fanau a Isaraela mo tau tupa ke eke hana tau gahua; ka ko e tau tagata tau a lautolu, mo e tau iki he hana tau takitaki kau, mo e tau iki ne pule ke he hana tau kariota, mo e hana kau heke solofanua.
10 Ko e tau iki ne kotofa he patuiki ko Solomona ke pule hanai, ne ua e teau mo e tokolimagofulu a lautolu, ne pule ke he motu.
11 Ti ta hake e Solomona e tama fifine a Farao mai he maga a Tavita ke he fale ne ta ai e ia māna, he pehe age a ia, Nakai nofo e hoana haku ke he fale he patuiki a Isaraela ko Tavita, ha kua tapu e mena kua ta mai ki ai e puha a Iehova.
12 Ti eke e Solomona e tau poa huhunu kia Iehova ki luga he fatapoa a Iehova ne ati ai e ia ki mua he fakamaluaga,
13 Ko e aho mo e tau mena ke eke poa ai ke lata mo e fakatufono a Mose, ke eke ai ke he tau sapati, mo e tau aho ne pula fou ai e mahina, mo e tau fakapotopotoaga ne kotofa, ke takilaga tolu ke he tau tau, ko e galue he tau areto nakai fakaea, mo e galue he tau vaha tapu, mo e galue he tau fale api.
14 Ne kotofa foki e ia ke lata mo e kotofaaga he matua hana ko Tavita, ko e tau vahega he tau ekepoa mo e tau gahua ha lautolu mo e tau tagata Levi mo e tau kotofaaga ha lautolu, ke fakaheke atu mo e fekafekau ai ki mua he tau ekepoa, ko e aho mo e tau mena ke eke ai; ko e tau leoleo gutuhala foki ke he tau vahega ha lautolu ke he taha gutuhala mo e taha gutuhala; he pihia e poaki he tagata he Atua ko Tavita.
15 Nakai o kehe a lautolu mo e poaki he patuiki ke he tau ekepoa, mo e tau tagata Levi, ke he tau mena oti ni, katoa mo e tau koloa.
16 Ne taute ai e tau gahua oti a Solomona, kua hoko ke he aho ne fakatoka ai e fakaveaga he fale a Iehova ke hoko ke he aho ne mau ai. Ti mau ni e fale a Iehova he eke.
17 Ti fano a Solomona ki Esiokape mo Elata ke he mataafaga he tahi ke he motu ko Etoma.
18 Ne fakafano mai e Hairamo kia ia, e tau foulua ke he tau lima he hana tau fekafekau, mo e hana tau tagata ne mahani mo e tahi; ti o a lautolu fakalataha mo e tau fekafekau a Solomona ki Ofaira, mo e ta mai ai e lautolu fa e teau mo e limagofulu e taleni auro, ti ta mai ai e lautolu ke he patuiki ko Solomona.