2 Peteru 1:1-21
1 KO au ko Simona Peteru, ko e fekafekau mo e aposetolo a Iesu Keriso, ko e haku tohi hanai kia lautolu kua moua e tua kua fakatau mitaki mo e ha mautolu, ke he tututonu he Atua ha tautolu, mo e Fakamoui ia ko Iesu Keriso.
2 Kia fakalahi kia mutolu e fakaalofa noa mo e monuina ke he ha mutolu a maama mitaki ke he Atua, katoa mo e Iki ha tautolu ko Iesu.
3 Tuga ne foaki mai kia tautolu he hana mana Atua e tau mena oti kua lata ke he moui mo e mahani Atua, ke he maama mitaki kia ia ne ui a tautolu he hana lilifu mo e hana mitaki;
4 Ha ko ia kua foaki mai ai kia tautolu e tau talahauaga he tau mena lalahi ue atu mo e aoga lahi, kia igatia fakalataha ai a mutolu ke he mahani he Atua ka fehola kehe a mutolu mo e kelea ha he lalolagi ha he tau manako lahi haia.
5 Ko e mena ia kia lalilali ai a mutolu ni ke lafilafi e mahani mitaki ke he tua ha mutolu, kia lafilafi foki e iloilo ke he mahani mitaki,
6 Kia lafilafi foki e nakai matagaoi ke he iloilo, mo e lafilafi e fakauka ke he nakai matagaoi, mo e mahani Atua foki ke he fakauka,
7 Kia lafilafi foki e fakaalofa ke he tau matakainaga ke he mahani Atua, ko e fakaalofa foki ke he fakaalofa ke he tau matakainaga.
8 Ha ko e mena ka ha ia mutolu e tau mena ia, mo e fakaloga, ti uta ai a mutolu mo tau tagata kua nakai teva, po ke teao ke he maama mitaki ke he Iki ha tautolu ko Iesu Keriso.
9 Ha ko ia kua noa mo e tau mena ia, kua matapouli a ia, kua mahegihegi e tau mata, kua nimo foki ia ia kua fakamea a ia he hana tau hala tuai.
10 Hanai, ko e tau matakainaga na e, kia au atu ai he lalilali a mutolu ke fakamau ha mutolu a uiaga mo e ha mutolu a fifiliaga, ha ko e mena ka eke e mutolu e tau mena ia, ti nakai tuai veveli a mutolu.
11 Ha ko e mena ka pihia, ti tuku mai kia mutolu ke hao mo e atā ke he hala he kautu tukulagi he Iki ha tautolu ko e Fakamoui ia ko Iesu Keriso.
12 Ko e mena ia kua manatu mau ai au ke hagaaki fakamanatu atu kia mutolu e tau mena na, pete ni he iloa tuai a mutolu, mo e fakatumau ke he tau kupu moli nai ha ia mutolu.
13 Kua manatu foki au ko e mena lata ke fakalagalaga kia mutolu he fakamanatu atu ke he tau aho oti ha i ai au ke he fale api nai;
14 Ha kua iloa e au to fakatepetepe e tukukeheaga he haku a fale api nai, tuga ne fakailoa mai kia au he Iki ha tautolu ko Iesu Keriso.
15 To lalilali atu foki au kia maeke ia mutolu ke manatu mau ke he tau mena ia ka mole atu haku a fano kehe mo e mouiaga nai.
16 Ha ko e mena nakai fifitaki a mautolu ke he tau tala tuai kua fafati mo e pulotu, he fakailoa atu e mautolu kia mutolu e malolo mo e haele mai he Iki ha tautolu ko Iesu Keriso; ka kua eke a mautolu mo tau kitekite tagata ke he hana lilifu.
17 Ha kua moua ne ia e lilifu mo e fakahekeaga mai he Atua e Matua, he vagahau mai kia ia e leo mai he lilifu kua mua ue atu, kua pehe mai, Ko e haku a Tama fakahele hanā, kua fiafia au kia ia.
18 Ko e leo ia ni ne fanogonogo a mautolu ki ai, ne vagahau mai mai he lagi, he fakalataha ai a mautolu mo ia ke he mouga tapu.
19 Ha ia tautolu foki e kupu he perofetaaga kua mua hana mauoka, kua mitaki he manamanatu a mutolu ki ai, tuga ne lamepa kua kikila ke he mena pouli, ato matafatafaata e aho, ato hake foki e fetu aho ke he tau loto ha mutolu.
20 Kia iloa fakamua e mutolu e mena nai, kua nakai fai kupu perofeta ha he Tohi kua fakamatala noa.
21 Ha ko e mena nakai ko e loto he tau tagata ne tuku mai ai e tau perofetaaga i tuai, ka ko e tau tagata tapu he Atua ne vagavagahau mai he omoi a lautolu he Agaga Tapu.