2 Peteru 2:1-22
2 HA i ai foki ke he moto tagata e tau perofeta pikopiko; to ha ia mutolu foki pihia e tau akoako pikopiko, ti fakatupu fakagalo e lautolu e tau taofi kehekehe ke malaia ai, mo e fakatikai e Iki ne fakafua mai a lautolu, kua fakahoko ai e lautolu kia lautolu e malaia fakatepetepe.
2 To tokologa foki he mumui atu ke he tau mena ha lautolu ke malaia ai, to eke fekakelea ai e puhala he kupu moli ha ko lautolu ni.
3 Ko e velevelemena foki ke eke ai e lautolu a mutolu mo tau mena ke fakafua ke he tau kupu fakatupua ha lautolu; nakai fakatuai foki ha lautolu a fakahala kua talahaua tali mai i tuai, ko e ha lautolu a malaia foki nakai mohe ia.
4 Ha ko e mena kaeke kua nakai toka he Atua e tau agelu ne hala, ka e tuku atu a lautolu ke he tau toua lapatoa ko e pouli i hate, kia taofi a lautolu ke hoko ke he fakafiliaga,
5 Ti nakai toka foki e lalolagi tuai, ka e laveaki a Noa kua tokovalu aki, ko e ogo he tututonu, ka e ta mai e fakapuke ke he lalolagi matahavala;
6 Ko e tau māga foki ko Sotoma mo Komora, ne fakahala ke ulu ki lalo, kia eke mo efuefu afi, kua tuku mo fakamailoga ke he tau tagata matahavala a mui;
7 Ne laveaki foki e ia a Lota ko e tagata tututonu, ne oti e manava hana he tau mahani matahavala he tau tagata hemu;
8 (Ha ko e tagata tututonu ia, ne fakamamahi e ia hana loto tututonu he nofo a ia fakalataha mo lautolu, he kitekite atu mo e fanogonogo atu ke he taha aho mo e taha aho ke he tau mahani hemu ha lautolu;)
9 Kua fioia he lki ke laveaki e tau tagata mahani Atua mai he kamatamata, ka e taofi e tau tagata mahani hepehepe ke hoko ke he aho fakafiliaga ke fakahala ai a lautolu;
10 Ka e au atu ni a lautolu kua mumui ke he tau mena he tino ke he tau manako lahi matahavala, mo e fakalialia a lautolu ke he tau iki; kua fakahanoa a lautolu, kua fakatokoluga, ti nakai matakutaku a lautolu ke vagahau kelea kia lautolu kua lilifu.
11 Ha ko e tau agelu kua mua e malolo mo e mana, kua nakai hokotaki mo e vagahau kelea kia Iautolu ke fakahala ai a lautolu ki mua he Iki.
12 Ka ko lautolu nai, tuga ne tau mena momoui a lautolu kua tutupu mai nakai fai manamanatu, ne fanau mai kia tapaki mo e keli, kua vagahau kelea a lautolu ke he tau mena kua nakai iloa e lautolu, to mahakava ni a lautolu ke he ha lautolu a kelea ni;
13 To moua e lautolu e taui he mahani hepehepe; piko na lautolu ko e mena ke fiafia ki ai ke matahavala ke he aho, ko e tau ila a lautolu mo e tau tepu, kua matahavala a lautolu ke he ha lautolu ni a fakahehe, ka kua eke e lautolu e kaiaga mena fakalataha mo mutolu;
14 Kua puke ha lautolu a tau mata ke he fifine faivao, to nakai maeke ia lautolu ke okioki he hala, kua tauhele e lautolu e tau tagata hikihikifano, ha ia lautolu e loto kua fakamahani e lautolu ke he velevelemena, ko e tau tagata kua ulaafia;
15 Kua tiaki e lautolu e puhala tonu, kua hehe a lautolu, kua mumui atu ke he puhala a Palaamo ko e tama a Posoro, ko ia ne manako ke he palepale he mahani hepehepe;
16 Ka kua akonaki a ia ha ko e hana holifono, kua vagahau mai ke he leo he tagata e manu kua nakai vagahau, kua hataki e ia e goagoa he perofeta.
17 Ko e tau vai puna a lautolu nakai toka ai ha vai, ko e tau aolagi kua havilia he afa, kua toka ma lautolu e pouli kiki tukulagi.
18 Ha kua vagavagahau fakatokoluga a lautolu ke he tau mena nakai aoga, kua tauhele ai e lautolu ke he tau manako lahi he tino mo e matahavala kia lautolu kua fehola kehe tuai ia lautolu kua nonofo mo e hehe.
19 Kua talahau atu e lautolu kia lautolu e tokanoaaga, ka ko lautolu kua eke mo tau tupa ke he kelea; ha ko ia kua mahala ki ai e taha tagata, kua fakatupa a ia kia ia ni.
20 Ha ko e mena kaeke kua fehola kehe a lautolu mai he tau mena kelea he lalolagi ha kua maama mitaki ke he Iki, ko e Fakamoui ia ko Iesu Keriso, ka e liu foki lavelave ke he tau mena na ti mahala ni, ati au atu ai e mahani kelea he fakahikuaga ha lautolu ke he kamataaga ha lautolu.
21 Ha kua mitaki ane mai nakai iloa e lautolu e puhala he tututonu, ka e kelea he iloa ai e lautolu, ti liliu kehe mo e poakiaga tapu ne tuku age kia lautolu.
22 Ka kua hoko kia lautolu e kupu fakatai moli, Kua liu foki e kuli ke he hana ni a koko, mo e kupu ē, Ko e puaka ne koukou kua liu taveli foki a ia ke he pelapela.