2 Samuela 1:1-27
1 Kua mole e mate a Saulo, ti kua liu mai a Tavita he keliaga he tau tagata Amaleka; ko e po ua foki he nofo ai a Tavita i Tikelaka;
2 Ti hoko ke he aho tolu, kitiala, kua hau ai e tagata mai he kau a Saulo, kua mahehe hana tau tapulu, ti ha he ulu hana e tau kelekele, kua hoko atu a ia kia Tavita, ti fakaveli fakafohifo ai a ia, ti hufeilo a ia kia ia.
3 Ti pehe atu a Tavita kia ia, Ko e hau a koe i fe? Ti pehe mai a ia kia ia, Kua hola au mai he kau a Isaraela.
4 Ti pehe atu a Tavita kia ia, Ko e heigoa kia hau a kupu? kia tala mai la e koe kia au. Ti pehe mai a ia, Kua fehola e motu mai he tau, ti tokologa he motu kua veveli mo e mamate; ti mamate foki a Saulo mo e hana tama ko Ionatana.
5 Ti pehe atu a Tavita ke he fuata ne tala mai kia ia, Kua iloa fefe e koe kua mamate a Saulo mo e hana tama ko Ionatana?
6 Ti pehe mai ai e fuata ne tala mai kia ia, Ne fano fetalia au ke he mouga ko Kilepoa, kitiala, kua falanaki ai a Saulo ke he hana tao, ti kitiala ko e tau kariota mo e tau tagata heke solofanua kua tutuli fakalahi mai kia ia.
7 Ne haga ki tua a ia, ti kitia e ia au, ti ui mai a ia kia au; ti pehe age au, Ko au hanai.
8 Ti pehe mai a ia kia au, Ko hai kia a koe? Ti pehe age au kia ia, Ko au ko e tagata Amaleka.
9 Ti pehe mai a ia kia au, Kia tu mai a koe ke he tapa haku, mo e tamate e koe au, ha kua moua au he fakaatukehe he moui agaia ni au.
10 Ti tu ai au ke he tapa hana, mo e keli e au a ia; ha kua iloa e au nakai tuai moui a ia ha kua veli a ia; ti toto e au e foufou ha ha he fufuga hana, mo e pipi lima ha ha he lima hana, ti ta mai ai e au ki hinai ke he haku a iki.
11 Ti toto e Tavita hana tau tapulu ti hehe e ia; kua pihia foki e tau tagata oti ha ha ia ia.
12 Ti tagi tatuki a lautolu, mo e tagi, mo e fakakanopogi a lautolu, kua hoko ke he afiafi, ha ko Saulo, mo Ionatana hana tama, mo e motu a Iehova, mo e magafaoa a Isaraela, ha kua mamate a lautolu ke he pelu.
13 Ti pehe atu a Tavita ke he fuata ne tala mai ai kia ia, Ne hau i fe a koe? Ti pehe mai a ia, Ko au ko e tama he tagata kehe, ko e tagata Amaleka au.
14 Ti pehe atu a Tavita kia ia, Ko e heigoa e mena nakai matakutaku ai a koe ke fakaolo atu hau a lima ke keli a ia ne fakauku e Iehova?
15 Ti ui age ai a Tavita ke he taha fuata, kua pehe age kia ia, Kia fina atu a koe kia ia, ti keli e koe a ia; ti keli e ia a ia, ti mate ai a ia.
16 Kua pehe atu foki a Tavita kia ia, Kia ha ha i luga he ulu hāu e toto hau ni, ha kua talahau ai hau a gutu kia koe, kua pehe mai, Ne keli e au a ia ne fakauku e Iehova.
17 Kua uhu e Tavita e lologo nai ke fakaalofa ai kia Saulo mo e hana tama ko Ionatana.
18 (Kua pehe atu foki a ia ke fakaako ai ke he fanau a Iuta e lologo he kaufana; kitiala, kua tohi ai ke he tohi a Iasera.)
19 Ko e lilifu a Isaraela kua keli ki luga hau a tau mena tokoluga; oi te! kua matulei ai e tau toa.
20 Aua neke talahau ai i Kata, ti ua fakamatala ke he tau malē i Asekelona; neke fiafia ai e tau tama fifine i Filisitia, neke hula ai e tau tama fifine he tau tagata nakai peritome.
21 Ko e tau mouga ko Kilepoa na e, aua neke ha ha i ai e hahau, aua neke to ai e uha kia mutolu, po ke tau fonua ke tutupu ai e tau mena ke eke mo poa; ha kua tiaki ai e tau akau punuti he tau toa, ko e akau punuti a Saulo tuga ne taha nakai fakauku ai ke he puke lolo.
22 Nakai liu ki tua e kaufana a Ionatana, mo e nakai liu noa mai e pelu a Saulo, mai he toto ha lautolu ne keli, mo e tau tino he tau toa.
23 Ko Saulo mo Ionatana ko e tau tagata fakahele mo e fulufuluola he momoui a laua; kua nakai vevehe kehekehe ai foki a laua ke he ha laua a matulei; ne mua ha laua a mafiti ke he mafiti he tau aeto, ne mua foki ha laua a malolo ke he malolo he tau leona.
24 Ko e tau tama fifine Isaraela na e, kia tagi a a mutolu kia Saulo, ne fakatapulu e ia a mutolu ke he ie kula; ne taute ai e ia ha mutolu a tau tapulu ke he auro ke fakafulufuluola aki.
25 Oi te fakaalofa! kua matulei e tau toa ke he tau; Ionatana na e, kua keli a koe ki luga hau a tau mena tokoluga.
26 Kua mamahi au ha ko koe haku matakainaga na e, ma Ionatana; ne fiafia lahi au kia koe, ko e fakalofa hau kia au ko e mena ke ofo ai haia, ne mua ni ke he fakaalofa he tau fifine.
27 Oi te fakaalofa! kua matulei e tau toa, kua maona ai e tau kanavaakau he tau.