2 Samuela 12:1-31
12 KUA fakafano atu e Iehova a Natano kia Tavita, ti fina atu a ia kia ia, kua pehe atu kia ia, Ha ha i ai ke he taha maga e tau tagata tokoua, ko e tagata maukoloa e taha, ka ko e tagata nofogati e taha.
2 Ha ha i ai ke he tagata maukoloa e tau mamoe mo e tau povi loga ni.
3 Ka e nakai fai mena e tagata nofogati, ka ko e taha ni e punua mamoe fifine, ne fakafua e ia, mo e fakamoui ai e ia, ti tupu ai a ia fakalataha mo lautolu mo e hana fanau; ko e hana mena kai tote ne kai ai e ia, ti inu ai a ia ke he hana kapiniu, ne takoto foki a ia ke he hana fatafata, kua eke ni ke tuga ne tama fifine kia ia.
4 Ti fina age e tagata fano fenoga ke he tagata maukoloa; ti nakai mafai a ia ke ta mai he tau mamoe hana, mo e hana tau povi, ke taute ai mo e fenoga kua fina age kia ia; ka e uta e ia e punua mamoe he tagata nofogati, ti taute ai e ia ma e tagata kua fina atu kia ia.
5 Ti tupu lahi ai e ita a Tavita ke he tagata ia; kua pehe mai a ia kia Natano, Kua moui a Iehova, to mate ni e tagata kua eke e mena ia;
6 Ka ko e punua mamoe to taui atu ai e ia ke he tau mamoe ne fa, ha kua eke e ia e mena na mo e nakai fai fakaalofa.
7 Ti pehe atu ai a Natano kia Tavita, Ko koe ni ko e tagata ia. Kua vagahau mai pehe a Iehova ko e Atua a Isaraela. Ko au ni ne fakauku a koe ke eke mo patuiki a Isaraela; ti laveaki foki e au a koe mai he lima a Saulo;
8 Ti ta atu ai e au kia koe e fale he hau a iki, mo e tau hoana he hau a iki ke he hau a fatafata; ne ta atu foki e au kia koe e magafaoa a Isaraela mo e magafaoa a Iuta; ane mai kua tote ia po kua lafilafi atu e au kia koe e mena ia mo e mena ia.
9 Ko e heigoa e mena kua fakavihia ai e koe e finagalo a Iehova, kua eke ai e koe e mena kelea ki mua hana? kua keli e koe a Uria ko e tagata Heti ke he pelu, ti ta mai ai e koe e hoana hana ke eke mo hoana hau, ka ko ia kua keli ke he pelu he fanau a Amoni.
10 Hanai, nakai tuai fano kehe e pelu mai he magafaoa hau tukulagi ha kua fakavihia mai a koe kia au, mo e ta mai e koe e hoana a Uria ko e tagata Heti ke eke mo hoana hau.
11 Kua vagahau mai pehe a Iehova, Kitiala, ko e fakatupu ne fai e au e kelea kia koe mai he magafaoa hau ni; to uta e au hau a tau hoana ki mua hau, mo e ta age ai ke he taha tagata, ti mohe a ia mo e tau hoana hau ke he maama he la na;
12 Ha ko koe ne eke fakagalogalo e mena ia, ka ko au to eke ai e au e mena nai ki mua a Isaraela oti ke he maama he la.
13 Ti pehe mai a Tavita kia Natano, Kua hala tuai au kia Iehova. Ti pehe atu a Natano kia Tavita, Kua uta kehe foki e Iehova hau a hala, nakai mate ai a koe;
14 Ka ko e hanai, kua fakatupu fakalahi ai e koe he mena nai e fakalialia kia Iehova ha lautolu kua fai fi kia Iehova, ko e mena ia ke mate ai e tama kua fanau kia koe.
15 Ti fano a Natano ke he hana fale, ka kua ta e Iehova e tama ne fanau ai he hoana a Uria kia Tavita, ti gagao ai ni a ia.
16 Ti liogi a Tavita ke he Atua ha ko e tama, ti fakakanopogi a Tavita, kua fano foki a ia ke he po ti takoto ai a ia ke he kelekele ato ahogia.
17 Ti mamatike atu ai e tau patu he hana magafaoa ke fakatu a ia mai he kelekele; ka e nakai mafai a ia, ti nakai kai a ia mo lautolu.
18 Kua hoko ke he aho fitu, ti mate ai e tama; ti matakutaku e tau fekafekau a Tavita ke tala age kia ia kua mate e tama; ha kua pehe a lautolu, Kitiala, ne vagahau atu a tautolu kia ia he moui e tama, ka e nakai fanogonogo mai a ia kia tautolu; ti nakai kia au atu he fakamamahi ai e ia a ia, ka tala age a tautolu kia ia kua mate e tama.
19 Kua kitia e Tavita kua fefanafanaaki hana tau fekafekau, ti iloa ai e Tavita kua mate tuai e tama; ti huhu atu ai a Tavita ke he hana tau fekafekau, Po kua mate nakai e tama? Ti pehe mai a lautolu, Kua matulei tuai a ia.
20 Ti matike a Tavita mai he kelekele, kua koukou a ia, ti takai e ia a ia, mo e totogi e ia hana tau tapulu; ti fina atu a ia ke he fale a Iehova mo e hufeilo ai a ia, ti hau ai a ia ke he hana fale, ti fekau atu e ia kia lautolu, ti fakatokatoka mai e ia e tau mena kai, ti kai ai e ia.
21 Ti pehe mai hana tau fekafekau kia ia, Ko e heigoa e mena nai kua eke e koe? Ne fakakanopogi a koe mo e tagi, ka e moui e tama; ka kua mate e tama ti matike ai a koe mo e taumafa.
22 Ti tali atu ai a ia, Ne fakakanopogi au mo e tagi he moui e tama, ha kua pehe au, Ke iloa e hai po ke fakaalofa mai nakai a Iehova kia au ke moui ai e tama?
23 Ka ko ainei kua mate a ia ke fakakanopogi au he ha? Kua maeke kia kia au ke liuaki mai a ia? to fano au kia ia, ka e nakai liu mai a ia kia au.
24 Ti fakamafana ai e Tavita a Patesepa hana hoana, mo e fina atu a ia kia ia, ti momohe ai a laua mo ia; ti fanau ai e ia e tama tane, ti ui e ia hana higoa ko Solomona. Kua fakaalofa a Iehova kia ia.
25 Ti fakafano atu e ia kia Natano ko e perofeta, mo e ui ai e ia hana higoa ko Ietitaia, ha ko Iehova
26 Kua tau a Ioapo mo Rapa ko e maga he fanau a Amoni, ti fofo ai e ia e maga he patuiki.
27 Ti fakafano atu e Ioapo e tau fekau kia Tavita, kua pehe atu, Ne tau a mautolu mo Rapa, kua fofo mai foki e au e maga he tau vai.
28 Hanai, kia fakapotopoto e koe e tau tagata ne toe ti he api ai a koe ki mua he maga mo e eke ai e koe māu, neke moua e au e maga, ti fakahigoa ai ke he haku a higoa nai.
29 Ti fakapotopoto ai e Tavita e tau tagata oti, ti fina atu a ia ki Rapa; ti tau a ia ki ai, ti fofo ai e ia e maga.
30 Ti uta ai e ia e foufou he patuiki ha lautolu mai he fufuga hana, (ko e hana mamafa, ko e taleni auro ti ha ha i ai e tau maka uho,) ti tuku ai ke he fufuga a Tavita; ti uta ai e ia e tau mena ne fofo he tau mai he maga ia kua loga lahi ni.
31 Ka ko e tau tagata ha ha i ai kua takitaki atu e ia a lautolu, mo e tuku atu e ia a lautolu ke he tau kili, mo e tau hoehoe lapatoa, mo e tau toki lapatoa, ti tuku atu e ia a lautolu ke o atu ai ke he mena ne tunu ai e tau maka kelekele; kua eke pihia ni e ia ke he tau maga oti he fanau a Amoni; ti liu atu ai a Tavita mo e motu oti ki Ierusalema.